Luka 22 - KAKAƊU NA ƁƊAKKARKARA

Mji Ku Pəli Mnya Ata Kəra Yesu

¹ Sakatə sakar Kucalər Buradi Na Kula Yist tə mda ana pəla Kucalər Fəlɓəla Kəi ni abaka hara,

² antə pristayeri na ol'ola kəga maləmayeri ar thlipə tsawur Musa ni, ləkwa bara laku tə ka da tsi Yesu akwa ɗuwari, kamnyar da akwa thlivər mji.

Yahuda Iskariyoti Ku Kələngkər Ka Tsa Ɓəli Yesu

³ Antə Shatan ləkwa ɗəffa Yahuda natə mda ana kəga ni Iskariyoti, pal akwa nca mjirthlipərni na kumnya suɗə ni.

⁴ Antə Yahuda mwari ka gari ka pristayeri na ol'ola ka mji na ol'ola ata kəra mbwar vəngkər aka Hyel ni, ata kəra laku tə tsa ata ɓəli Yesu ala ɗa.

⁵ Apani ɗəffa ɗa ku ndzi msəra ala ɗa, har tə da kələngkər abbər da ata hamta alari kwaba.

⁶ Antə Yahuda ku kələngkər, ka ləkwa bara lakur ɓəli Yesu ala ɗa, ma sakatə mji aɗi hang wa.

Yesu Ku Səm Susəmər Kucalər Fəlɓəla Kəi Kəga Mjirthlipərni

⁷ Sakatə vir Buradi Na Kula Yist, vir tə mda ana tsi ɓzər gam kamnyar Kucalər Fəlɓəla Kəi ni ku hara,

⁸ antə Yesu thlentə Bitrəs ka Yahwana, ka pəla ala ɗa, “Mwar giri, ka giri ɗəmha ala mburu vəi tə mburu ata səm susəmər Kucalər Fəlɓəla Kəi ni ata.”

⁹ Antə da yu ni abbər, “Ama antə ga ata bara ka yeru ɗəmhə nə ri?”

¹⁰ Antə Yesu pəla, “Ma sakatə giri ku ləkwa kuta di, giri ata kəɓa ka mdə laga na ka tughum ka yimi ata kərari. Nu giri ni akwa kəlara kəi tə tsa ku ləkwa,

¹¹ ka giri pəla aka mthlakər kəi ni abbər, ‘Maləm pəla akwa mbwar mətəpi madi antə tsa ata səm susəmər Kucalər Fəlɓəla Kəi kəga mjirthlipərni ri?’

¹² Antə tsa ata ncanta ala giri, mbwa laga na ola amta namnamari. Anda antə ka giri ɗəmhə shanga su.”

¹³ Antə da ku mwari ka wutə tsu apatə Yesu ku pəla ala ɗa. Antə da ku ɗəmhə susəmər Kucalər Fəlɓəla Kəi ni.

Səm Susəmər Hirdzi Ar Mthlaku

¹⁴ Sakatə saka ni ku hara, antə Yesu ndzəndzi ata vəi səm susəma kəga aposəlayeri arni.

¹⁵ Antə tsa pəla ala ɗa, “I ku mwaɓə ka duna kəi səm susəma ngəni kəga giri akəmata I a ɗar bwani!

¹⁶ Kamnyar I akwa pəla ala giri abbər, I aɗi ata jaktə səmari kəra wa, tar ma karapwari ku nghyaɓəladzi akwa kuthlikurər Hyel.”

¹⁷ Antə Yesu ku kətə kwapə ka usar Hyel ata kər, ka pəla ala ɗa, “Dlu giri ngəni ka giri ndəkəmta akwa nca giri.

¹⁸ Kamnyar I akwa pəla ala giri, I aɗi ata jaktə sa yimər anap ngəni kəra wa, tar ma kuthlikurər Hyel ku si.”

¹⁹ Antə tsa kətə buradi, ka usar Hyel ata kər, ka ɓəgəlwa, ka hamta ala ɗa, akwa pəla, “Ngəni an dzi, tə mdə hamta kamnyar giri. Ka giri hara ngəni kamnyar ɗangtə ra.”

²⁰ Tsu apani, aghəla susəm ni, antə tsa kətə kwapu, akwa pəla, “Ngəni an kwapər alkawalər na bilən tə mdə hara ka mamshirna, mamshi na pumtadzi kamnyar giri.

²¹ “Amma nggədza mdə na ata ɓəli ra ni, akwa səm susəma ata vəi duku ka iya!

²² Ɓzər Mda ata sə mta tsu apatə Hyel ku thlamta. Amma sha ku wutə mdə na ata ɓəli Ɓzər Mdə ni!”

²³ Antə mjirthlipərni baɗitə yu nvwa ɗa abbər, wa akwa nca ɗa an ata hara su ngəni ri?

Beɗi Ata Kəra Olkur

²⁴ Antə beɗi laga thlata akwa daɓwa ɗa abbər wan tə kalkal ka tsa ndzi olta shang akwa nca ɗa ri?

²⁵ Antə Yesu pəla ala ɗa, “Kuthlyayeri na ar mji na aɗi səndə Hyel wa ana nca kuthlikur ata kəra mji na akira ɗa, tsuwa mji na ka kuthlikur ata kəra ɗa ni ana kəga kərɗa abbər, ‘Mjir dlar mji.’

²⁶ Amma ar giri aɗiya ndzi apani wa. Ata vəya ndaga ka mdə na ola akwa nca giri ndzi apa tsa an raka ta shang, ka mdə na olər giri ndzi apa tsa an mafar giri.

²⁷ Kamnyar wa an olari ri, mdə na andzəndzi ata vəi səm susəma, nənga mdər mwanta alari susəm nə ri? Ai mdə na andzəndzi akwa vəi səm susəm ni. Amma arna I akwa nca giri apa mdər mwantə susəm ni.

²⁸ “Kamnyar giri an mji na ku nggitə ka ndzəndzi adzə ra akwa shanga su na wutə ra.

²⁹ Antə apatə Təddarna ku hamta ali dunar hara kuthlikur, antə I ata hamta ala giri dunari,

³⁰ kamnyar ka giri sə səm ka sa ata vəi duku ka iya akwa kuthlikurərna. Tsuwa giri ata ndzəndzi ata dəkəl kuthlikurayeri, ka hara shariya aka nyarmbwayeri na kumnya suɗa akwa Israila.”

Bitrəs Ata Sə Kampikər Səndə Yesu Ka Makər

³¹ “Siman, Siman! Psi thləma ga! Shatan ku bara abbər ka mdə nar laku ka tsa ngkərtə giri shang, ka tsa kərtərɓəla giri apatə mda ana kətərɓəla alkama kazhar binari.

³² Amma I ku hara adduwa kamnyar nga, abbər ka hamta jirər nga sə kətə wa. Tsuwa ma sakatə ga ku ngka adzə ra, ka gə dunautə maɗama' nga.”

³³ Antə Bitrəs pəla aka Yesu, “Mthlaku, I ku ɗəmhədzi kəi nu nga ba akwa pərsəna, wala mwa an ata mta.”

³⁴ Antə Yesu pəla, “Bitrəs, I akwa pəla ala ga akwabə fugəm atuwa ashina, ga ata sə kampiku ka makər abbər ga aɗi səndə ra wa.”

Ka Giri Kətə Pirti Ka Thləvu Ka Katsakar

³⁵ Antə Yesu pəla aka mjirthlipərni, “Saka tə I thlentə giri kula pirti, kula thləvu, kula ɓaɓi ni, giri ku tur su ya?” Antə da pəla, “Awa.”

³⁶ Antə tsa pəla ala ɗa, “Amma kulini ma mdə na ka thləvur kəs kwaba ka tsa kəta, har ma wala thləvu. Tsuwa ma mdə na aɗi ka katsakar wa, ka tsa ɗələmta ləptərni ka tsa mastə pal.

³⁷ Kamnyar I akwa pəla ala giri abbər tar ka kakaɗə na pəla, ‘Da ku jikau ni akwa nca mjir biku,’ ni nghyaɓəladzi ata iya. Kamnyar su tə mdə rəbuta ata kəri ni akwa nghyaɓəladzi.”

³⁸ Antə mjirthlipərni pəla, “Mthlaku, nggədza katsakarayeri suɗa.” Antə tsa pəla ala ɗa, “Ku mzhi.”

Yesu Ku Hara Adduwa Ata Gar Zaitun

³⁹ Antə Yesu ku ləɓəla akwa bərni ni ka mwari akwa Gar Zaitun, apatə tsa ana hara hwatu. Antə mjirthlipərni nutə ni.

⁴⁰ Sakatə tsa mzhitə vəi ni, antə tsa pəla ala ɗa, “Ka giri hara adduwa ta giri asə ləkwa ngkərtədzi.”

⁴¹ Antə tsa ɗar ləkəma kazhar ɗa, tə daɓwa ndzi apa cijukurər ndzəhər pela. Antə tsa zuzuri ka hara adduwa

⁴² abbər, “Tədda, ma ga hira, ka gə kələmta ali kwapər bwani ngəni. Wala apani aɗi abbər ka gə hara su tə I akwa barari ni wa, amma su tə gə hira.”

⁴³ Antə mdərthlentərhyel səghəi amtazi ka jakə alari duna.

⁴⁴ Sakatə tsa akwa bwani na mwavər, antə tsa hara adduwa ka duna, tə vəi ufu ku səɓəla ata dzari apa mamshi akwa təgəri ata di.

⁴⁵ Sakatə tsa thlata akwa hara adduwa ni, ka ngka adzə mjirthlipərni, antə tsa wutə ɗa akwa heni, kamnyar ɗəffa ɗa ku ɓzi duna.

⁴⁶ Antə tsa pəla ala ɗa, “Kamnyar mi tə giri akwa heni ri? Thlatə giri ka giri hara adduwa ta giri asə ləkwa ngkərtədzi.”

Mdə Ku Ngkəi Yesu

⁴⁷ Sakatə Yesu tsu akwa gari ni, antə dlamar mji laga si. Tsuwa Yahuda na pal akwa nca mjirthlipərni na kumnya suɗə ni, akəma ɗa akwa pwar ɗa. Antə tsa si adzə Yesu kamnyar ka tsa vədzə mnyari aka Yesu.

⁴⁸ Amma Yesu pəla alari, “Yahuda, ka vədza kəsəm mnya aka mda, antə ga ata ɓəli Ɓzər Mdə ya?”

⁴⁹ Sakatə mjirthlipərni na adzə ni ku wutə su ngəni, antə da pəla, “Mthlaku, ka yeru mpa ɗa ka katsakar ya?”

⁵⁰ Təng jiri pal akwa nca ɗa nthlə mafar prist na ol ni kəgari, ka nthləmta thləmari na abwa mazəm.

⁵¹ Amma Yesu pəla, “Giri aɗiya jaktə wa!” Antə tsa ku tsəkwar thləma na abwa mazəm.

⁵² Antə Yesu pəla aka pristayeri na ol'ola, ka mji na ol'olər sək kəra mbwar vəngkər səli, ka mji damwa na ol'ola, na si kamnyar ngkəi ni ni abbər, “Giri si ka katsakarayeri, kəga zwalayeri kamnyar ngka ra apa dlu I mdər thla laku ya?

⁵³ Tədəku viri I adzə giri akwa mbwar vəngkər səli, giri aɗi ngkəi ra wa. Amma ngəni an sakar giri, sakatə kuthlu akwa hara kuthlikur.”

Bitrəs Ku Kampikər Səndə Yesu

⁵⁴ Sakatə da ku ngkəi Yesu, antə da təra ka tsa ka mwantə ni akwa kəyir prist na ola. Bitrəs akwa nu ghəla ɗa ka daɓwa ɗa tauwa.

⁵⁵ Sakatə da ku mbahə u'u ata kutakəi, ka ndzəndzi akwa thlirari, antə Bitrəs ndzəndzi adzə ɗa.

⁵⁶ Sakatə ngkwa laga ku wutə Bitrəs andzəndzi ata mnya u'u ni. Antə ngkwa ni wul ni ɓɗaku, ka pəla, “Mdə ngəni ma tsa ata vəi duku ka Yesu!”

⁵⁷ Amma Bitrəs kampiku ka pəla, “Awa, ngkwargai, I asəndə ni wa!”

⁵⁸ Aghəla nda raka antə mdə damwa wutə Bitrəs ka pəla alari, “Gə ma ga akwa nca ɗa!” Amma Bitrəs pəla, “Mdə ragai, I aɗi akwa wa.”

⁵⁹ Aghəla nda ka awur pal, antə mdə damwa pəla, “Jiri kula nuhum, mdə ngəni ata vəi duku ka Yesu, kamnyar tsa mdər Galili.”

⁶⁰ Amma Bitrəs pəla, “Mdə ragai, I asəndə su tə ga akwa gari ata kər nə wa.” Tsa tsu akwa gari ni təng təkəma fugəm baɗitə tuwa.

⁶¹ Antə Mthlaku ku shinardzi ka wulhə Bitrəs. Antə Bitrəs ɗangtə su tə Mthlaku pəla alari nda abbər, “Akwabə fugəm atuwa ashina, ga ata sə pəla abbər ga asəndə ra wa ka makər.”

⁶² Antə Bitrəs ku ləɓəla ka tuwa ka duna.

Mji Ku Hara Kyartəkur Aka Yesu Ka Dlaɓu Ni

⁶³ Antə mji na akwa sək kəra Yesu ni hara kyartəkur alari ka dlaɓu ni.

⁶⁴ Da hartə ncari, ka pəla alari, “Hara naɓikur ja! Wan tsa ngə nə ri?”

⁶⁵ Antə da kəɗar mnya ɗimi alari suayeri ka damwa, akwa nggənggəl ni.

Mji Ku Mwantə Yesu Akəma Majalisa

⁶⁶ Sakatə viri ku kuri, antə mji na ol'olər mji, ka pristayeri na ol'ola, ka maləmayeri ar thlipə tsawur Musa, tsaptədzi ata kəma duku. Antə mdə səntə Yesu akəma ɗa.

⁶⁷ Antə da pəla, “Ma ga an Kristi ni, pəla ala yeru.” Antə tsa pəla, “Wala mi pəla ala giri, giri aɗi ata hamta jiri ali wa.

⁶⁸ Tsuwa wala mi yu giri, giri aɗi ata hamta ali amsa wa.

⁶⁹ Amma akəmazi, Ɓzər Mda ata sə ndzəndzi abwa mazəma Hyel na ka duna ta shang.”

⁷⁰ Antə shanga ɗa yu ni abbər, “Antə ngəni gə Ɓzər Hyel ya?” Antə tsa pəla, “Giri ata mzhi pəla, I Ɓzər Hyel.”

⁷¹ Antə da pəla, “Kamnyar mi tə mburu akwa bara seɗa damwa ri? Mburu ku nggata akwa mnyari surni.”