Luka 19 - KAKAƊU NA ƁƊAKKARKARA

Yesu Ka Zakka

¹ Sakatə Yesu ku ləkwa Yariko, akwa təramta akwa kuta di,

² təng tsa wutə mdər dlu tsəma laga ka thləmari Zakka. Tsa mdə na ola akwa dlu tsəma ni, tsuwa tsa ka gəna.

³ Zakka ku kəɗar ka tsa wutə mdə na Yesu ni, amma tsa aɗi mzhi wa, kamnyar tsa mdə na kwadang, tsuwa mji ku hara hang.

⁴ Antə tsa ku hwi ka dlu kəma akəla ɗa ka ra ndlətə nfur kwataɓəla laga kamnyar ka tsa wutə ni, kamnyar Yesu ata təramta anda.

⁵ Sakatə Yesu ku si ata vəi ni, antə tsa haptə ncari, ka pəla, “Zakka, Mwa taktar ka gə səghəi, kamnyar ashina I ata ra ndzi aviyar ngkiri.”

⁶ Antə Zakka ku mwa taktar ka səghəi, ka dlu ni ka kucali.

⁷ Sakatə mji wutə su ngəni, təng shanga ɗa baɗitə nggungguni akwa pəla, “Tsa ata ra ndzi mətəpiyir mdər biku!”

⁸ Antə Zakka ku thlatə ka thləthlata, ka pəla aka Mthlaku, “Mthlaku, I ata hamta retar gənarna aka mjir bwani. Tsuwa ma har I ku dlutsə kəlara su akəla mda, I ata ntəmta alari bwa ka nfwar.”

⁹ Antə Yesu pəla alari, “Ashina mbantədzi ku si akwa kəi ngəni, kamnyar wala tsa ma tsa kəkar Ibrahim.

¹⁰ Kamnyar Ɓzər Mdə si dzak kamnyar pakə mji na ku sha, ka tsa mbantə ɗa.”

Karapu Ata Kəra Mjir Fəli Kuma

¹¹ Sakatə mji akwa psi thləm aka surthlipayeri ngəni, antə Yesu ləkəma ka ngkər ala ɗa karapu, kamnyar tsa ku hara kudzəhə ka Urushalima, tsuwa da akwa tamata abbər kuthlikurər Hyel ni ata si təkəma.

¹² Kamnyar ngəni antə tsa pəla, “Mdə ol laga aɗi na ku mwari akwa tsəɗi laga na ciju kamnyar ka mdə bartə kərari ka tsa ndzi kuthli, ka tsa ngka.

¹³ Amma akəmata tsa atəra ni, tsa kəga mjir kəthlərərni kuma, ka hamta aka waskəi kwaba tə mdər kəthlər ata wutari akwa thliya makər, ka pəla ala ɗa, ‘Fəli gir kəgari, tar ma I ku si.’

¹⁴ Amma mjir tsəɗiyirni aɗi akwa hir ni wa. Antə da thlentə mji laga aghəlari ka da ra pəla, ‘Yeru aɗi akwa bara ka mdə ngəni ndzi kuthlir yeru wa.’

¹⁵ “Saka tə mdə ku bartə kəra mdə ni, tə tsa ngka, antə tsa tsawa abbər ka mdə kəga alari mjir kəthlərərni natə tsa hamta ala ɗa kwaba ni, kamnyar ka tsa səndə riɓa tə da wuta akwa fəli ni.

¹⁶ Antə mdə na ntangkəma si akəma ri ka pəla, ‘Mdərkəi, kwabar ngə ni ku wutə riɓa ar kəra gəna ni vəyari kuma!’

¹⁷ Antə mdərkəyirni pəla alari, ‘Yauwa, ku hara ɓɗaku! Gə buɗa na pwa! Təng tə ga ku ndzi ka jirkur ata kəra su na raka, I ata vəngkər nga ata kəra bərniyayeri kuma.’

¹⁸ Antə mdə na suɗkur ku si tsuwa ka pəla, ‘Mdərkəi, kwabar ngə ni ku wutə riɓa ar kəra gəna ni vəyari ntəfu.’

¹⁹ Antə mdərkəyirni ni pəla, ‘Ga ata ndzi kuthli ata kəra bərniyayeri ntəfu tsuwa.’

²⁰ “Antə mdə na duku ni ku tsuwa si ka pəla, ‘Mdərkəi, nggədza kwabar nga nda ja, I pərta akwa zhaɓi laga kaptangnga ka ɗuwari.

²¹ Kamnyar I akwa thlivər nga, kamnyar wujirər ngə mwavər. Kamnyar ga ana kəɓəla su tə aɗi ga an vu wa, ka tsaptə su tə aɗi ga an titilar wa.’

²² Antə mdərkəyirni ni pəla alari, ‘Gə buɗa na kəmanggar! Ka su tə ga an pəla ka mnya ga antə I ata hara ala gə shariya. Azha ga ku sənda abbər wujirərna mwavər, tə I ana kəɓəla su tə aɗi I an vu wa, ka thli su tə aɗi I an thləka wa.

²³ Kaha, kamnyar mi tə ga aɗi mwantə kwabarna ni akwa vəi pwi kwaba wa ri, natə ma I ku ngka kəi wutə riɓa ata kər?’

²⁴ “Antə tsa pəla aka mji na athləthlata anda abbər, ‘Dlutsə gir kwaba na akəlari ni, ka giri na aka mdə na kəgari vəyari kum ni.’

²⁵ Antə da pəla alari, ‘Mthlaku, diya tsa ka kwaba tə mdər kəthlər ata wutari akwa thliya makər ni vəyari kuma!’

²⁶ Kamnyar I akwa pəla ala giri, kəlara mdə na ka su, mda ata jakəngkər alari damwa. Amma mdə na aɗi ka su wa, wala su tə tsa kəgari ma, mda ata dluɓəlari.

²⁷ Amma ata kəra mji ngəni dawarna, na pəla da aɗi ata bara kəi hara kuthlikur ata kəra ɗa wa ni, səntə gir ɗa azi, ka giri thlagamta wulya ɗa akəmi!”

Yesu Ku Ləkwa Urushalima Ka Kuthlikur

²⁸ Sakatə Yesu ku kuri pəla karapu ngəni, antə tsa pwa akəma ɗa akwa mwari ahar Urushalima.

²⁹ Sakatə tsa si kudzəhə ka Bethfaji ka Bethlani adzə gar tə mda ana kəga Zaitun ni, antə tsa thlentə mjirthlipərni suɗa,

³⁰ ka pəla ala ɗa, “Mwar giri akwa di na akəma giri ni. Təkəma tə giri ku ləkwa kutadi ni, giri ata wutə ɓzər kwara mbwimbwiyari natə mda aɗi ɗar fəltə ni wa. Mpəli gir ni ka giri səntə ni azi.

³¹ Kəlara mdə na ku yu giri abbər, ‘Kamnyar mi tə giri akwa mpəli ni nə ri?’ Ka giri pəla alari, ‘Mthlaku an akwa barari.’ ”

³² Antə mji tə Yesu thlentə ni ku mwari ka wutə kwara ni tsu apatə tsa pəla ala ɗa.

³³ Sakatə da akwa mpəli ɓzər kwara ni, antə mji na mthlakari ni pəla ala ɗa, “Kamnyar mi tə giri akwa mpəli ɓzər kwara nə ri?”

³⁴ Antə da pəla, “Mthlaku an akwa barari!”

³⁵ Antə da səntə ɓzər kwara ni aka Yesu, ka putə ləptayeri arɗa ata hila ɓzər kwara ni, ka vətə Yesu ata kər.

³⁶ Sakatə tsa akwa mwa, antə da pshari ləptayeri arɗa akwa laku, kamnyar ka Yesu mwa ata kər.

³⁷ Sakatə tsa ku hara kudzəhə ka Urushalima, ata vəi tə laku səghəi ata dzər Gar Zaitun ni, antə shanga mji na akwa nu ni ni baɗitə hara kucali akwa hu Hyel ka kuraku na ola, kamnyar surndatayeri na ol'ola tə da wuta.

³⁸ Antə da pəla, “Ka Hyel vədza barka aka Kuthli na ata si akwa thləma Mthlaku! Ka msərakur ndzi akwar amtazi ka səli tsuwa aka Hyel!”

³⁹ Antə mjir Farisi laga na akwa nca dlamar mji ni ku gari aka Yesu ka pəla, “Maləm, mnya aka mjirthlipər ngə ni ka da ndzi ɗiɗi!”

⁴⁰ Amma Yesu shinau ka pəla, “I akwa pəla ala giri, ma da ku ndzi ɗiɗi, pelayeri ngəni ata hara kuraku.”

Yesu Ku Tuwa Kamnyar Bərni Urushalima

⁴¹ Sakatə Yesu ku hara kudzəhə ka Urushalima, ka wutə di ni, antə tsa ləkwa tuwa,

⁴² akwa pəla, “I tur abbər wala an ashina ka gə səndə sur səntə ndzəndzi lapiyakur! Amma suari ku ɗuwamtadzi ala ga.

⁴³ Kamnyar saka ata sə si tə dawayeri ar nga ata sə kalaktə nga apa katangga, ka vəi nga ata ɗəffu, ka hartə nga akwa kəlara bwa.

⁴⁴ Da ata pukthləmta nga ata di, ga ka shanga mji na akwa kuta katanggar nga. Da aɗi ata zhar pela wala duku ata kəra nvwa ni akwa gə wa, kamnyar ga aɗi kəthlər ka sakatə Hyel na gə kamnyar mbantədzi wa!”

Yesu Ku ləkwa Mbwar Hyel

⁴⁵ Antə Yesu ləkwa mbwar vəngkər səli ka baɗitə kədləɓəla mjir ɗəl su,

⁴⁶ Tsa pəla ala ɗa, “Mdə ku rəbuta abbər, “ ‘Mbwarna ata ndzi mbwar adduwa,’ amma giri ku namtə ni vəi ɗuwar mjir thla laku!”

⁴⁷ Aghəla nda, antə Yesu ləkwa thlipa akwa mbwar vəngkər səli tədək viri. Amma pristayeri na ol'ola, kəga maləmayeri ar thlipə tsawur Musa, kəga mji ol'ola akəma mji, ku bara ka da tsi ni.

⁴⁸ Amma da aɗi wutə lakwari wa, kamnyar tə gariyirni ni akwa səm ɗəffa shanga mji.