Luka 17 - KAKAƊU NA ƁƊAKKARKARA

Su na Ana Vu Mda Akwa Hara Biku

¹ Antə Yesu pəla aka mjirthlipərni abbər, “Jiri suayeri aɗi hang na ata mzhi vu mda akwa hara biku. Amma ata ndzi sur kətadza aka kəlara mdə tə ngkərtədzi ata si atar ni!

² Mnyar tə mdə laga avu pal akwa nca maɗankyar ngəni raka raka ni ka tsa hara biku, ata ndzi hərku alari ka mdə mbwatə bur ata wulyari, ka psu ni akwa manda.

³ Apani, ka giri hara hangkal ka su tə giri akwa harari! “Ma ɓzərma' nga ku hara biku, ka gə mnya alari. Antə ma tsa ku tubi, kara yafitə ni.

⁴ Wala ma tsa an ku hara ala gə biku ka murfa akwa vir pal, ma tsa ku si adzə nga ka murfa akwa pəla, ‘I ku tubi,’ kalkal ka gə yafitə ni.”

Ka Gə Jaka Ala Yeru Hamta Jiri

⁵ Antə aposəlayeri pəla aka Mthlaku abbər, “Jaka ala yeru hamta jirər yeru.”

⁶ Antə Mthlaku pəla ala ɗa, “Ma giri an ka hamta jiri wala raka apa munya mastad, giri ata mzhi pəla aka nfur kwataɓəla ngəni abbər, ‘Ntsutədzi, ka gə ra ncidzi akwa manda!’ Tsuwa suari ata hara apatə ga ku pəla alari.”

Mafa Na Pwa

⁷ “Mdə madi akwa nca giri na ka mafarni akwa kukula, wala akwa ɓəla təma, natə ma sakatə tsa ku səvi akwa mtaku ni, ata pəla alari, ‘Mwa taktar ka gə si, ka gə ndzəndzi kara səm susəm ya?’

⁸ Ata vəyari, tsa aɗi ata pəla alari, ‘Ɗəmha ali susəmər tahaku katagu, hatə ləptər ta, ka gə namta ali susəma, kəi səməmnya, kambəla gə səm ar ngə wa ya?’

⁹ Tsuwa tsa ana usar mafa ni kamnyar, kamnyar tə tsa ku hara su tə mdə tsawa alari abbər ka tsa hara ya?

¹⁰ Tsu apani tsuwa ma sakatə giri ku hara shanga suayeri natə mdə ku pəla ala giri ka giri hara, ka giri sə pəla, ‘Yeru an mafayeri na kətəikətəyari, yeru hara su na hwatu kəthlərər yeru daci.’ ”

Yesu Ku Mbantə Mji Kuma Na Ka Shilkər Kəsəm Dza

¹¹ Sakatə Yesu akwa mwari ahar Urushalima, antə tsa ku təramta akwa daɓwa tsəɗiyir Samariya ka tsəɗi Galili.

¹² Sakatə tsa ata ləkwa kuta di laga, antə da kəɓa ka mji kuma na ka shilkər kəsəm dza, antə da thləthlatə tsu ciju,

¹³ tə da haptə kuraku ka pəla, “Yesu Mthlaku, kətadzə yeru.”

¹⁴ Sakatə Yesu wutə ɗa, antə tsa pəla ala ɗa, “Mwar giri, ka giri ra ncantə kər giri aka pristayeri, kamnyar ka da wulhə giri.” Amma sakatə da tsu akwa lakur mwari, təng dza ɗa kəcimtadzi.

¹⁵ Sakatə pal akwa nca ɗa wuta abbər, tsa ku mbantədzi, antə tsa ngka akwa hu Hyel ka kuraku na ola.

¹⁶ Antə tsa zuzuri adzə səla Yesu akwa usar ni. Mdə ngəni an mdər Samariya.

¹⁷ Antə Yesu pəla, “Aɗi mji kuma an kəcimtadzi wa ya? Mji na əmdlari ni ama ri?

¹⁸ Mda aɗi akwa nca ɗa na ngka kamnyar hu Hyel wa, tar mətəpi ngəni ya?”

¹⁹ Antə Yesu pəla alari, “Thlatə kara təra, hamta jirər nga ku mbantə nga.”

Səyir Kuthlikurər Hyel

²⁰ Sakatə mjir Farisi laga yu Yesu abbər nawa antə kuthlikurər Hyel ata sə si ri? Antə tsa pəla ala ɗa, “Kuthlikurər Hyel aɗi ata si ka seɗa laga tə mda ata wutari ka nca wa.

²¹ Tsuwa mda aɗi na ata mzhi pəla, ‘Wula, nggədza ni’ wa. Wala ‘Ndaka ni’ wa. Kamnyar kuthlikurər Hyel ni azi akwa nca giri.”

²² Antə Yesu pəla aka mjirthlipərni abbər, “Saka ata sə hara tə giri ata sə mwaɓa abbər ka giri wutə wala vir duku ar Ɓzər Mda, amma giri aɗi ata wutari wa.

²³ Kamnyar mji ata sə pəla ala giri abbər, ‘Ndaka ni anda!’ Wala ‘Nggədza ni azi!’ Amma giri aɗiya mwari wa, tsuwa giri aɗiya nu ɗa wa.

²⁴ Kamnyar tsu apatə wurka ana hara wurək ka mbəlantə vəi na amtazi, baɗita abwani har ba abwanda, tsu apani antə Ɓzər Mda ata sə harari vir tə tsa ata ngka.

²⁵ Amma na ntangkəma antə tar ka tsa ɗar bwani ar suayeri hang katagu, ka mjir zaman ngəni nggəlar ni.

²⁶ Tsu apa su na hara akwa zamanər Nuhu, antə ata sə hara akwa sakar səyir Ɓzər Mda.

²⁷ Kamnyar mji akwa ləkəma ka səm ka sa, mji shili akwa kəl mwala, ka hamta mwala aka sal, har ka vədza aka vir tə Nuhu ləkwa shar ni, tə avava ku si ka shamta ɗa shanga.

²⁸ Tsu apani antə mdə hara akwa sakar Lot. Da akwa səm ka sa, da akwa masə su ka ɗələmta su, da akwa thləka, tsuwa da akwa həgən kəyayeri.

²⁹ Amma vir tə Lot ləɓəla kazhar Sodom, antə u'u ka kəga u'u mwapu na akwa shiwura, thlata amtazi ka səghəi apa yimərhyel ata kəra ɗa, ka kurəmta ɗa.

³⁰ Tsu apani antə ata sə hara akwa vir tə Ɓzər Mda akwa si.

³¹ “Vir nda, mdə na ata kəra mbwarni amta, ka kariyirni ambwa, aɗiya səghəi kamnyar kətari wa. Tsuwa mdə na akwa fakəu aɗiya ngka avi wa.

³² Ɗangtə giri mwalar Lot.

³³ Kəlara mdə na akwa bara mbantə mpikari, mpikari ata sha. Amma kəlara mdə na akwa shamta mpikari, tsa ata mbantə mpikari.

³⁴ I akwa pəla ala giri abbər vir nda viri, ma mji suɗa apəpəi ata dəkəl duku, mda ata kətə mdə pal ka zhar na palari.

³⁵ Ma mwanki suɗa an akwa hadla ata kəma duku, mda ata kətə mdə pal, ka mdə zhar mdə pal.”

³⁷ Antə mjirthlipərni pəla, “Amari, Mthlaku?” Antə tsa pəla ala ɗa, “Vəi tə mshiyir su ata, antə kutəkcivi ana tsaptədzi.”