Luka 15 - KAKAƊU NA ƁƊAKKARKARA

Karapu Ata Kəra Təma Na Ku Sha

¹ Vir laga mjir dlu tsəma ka mjir biku ku si adzə Yesu kamnyar ka da nggatə ni.

² Antə mjir Farisi kəga maləmayeri ar thlipə tsawur Musa baɗitə nggungguni alari, akwa pəla, “Mdə ngəni ana hir mwardzi ka mjir biku har tsa ana səm susəma kəga da.”

³ Kamnyar ngəni antə Yesu ngkər ala ɗa karapu ngəni abbər,

⁴ “Ma mdə laga akwa nca giri ka təmarni aru pal, antə pal akwa nca ɗa sha alari, tsa aɗi ata zhar na əmdləkumari ka əmdlə ni tsu akwa vəi ɓəla, ka tsa ra pakə na sha duku ni, har ta ma tsa ku wutə ni wa ya?

⁵ “Ma sakatə tsa ku wutə ni, antə tsa ata ndzi ka kucali na hang ka duna ka kətə ni ata pathlahari.

⁶ Ka mwantə ni aviyarngkiɗa, antə tsa ata kəga pazhayeri arni, ka ntəwulayeri arni ata kəma duku ka pəla ala ɗa, ‘I ka kucali kamnyar tə I ku wutə təmarna, na ku sha ali ni, antə ka mburu hara kucali ali ata kəma duku.’

⁷ Tsu apani, antə I akwa pəla ala giri abbər mda ata hara kucali ka duna akwa vəi amtazi ata kəra mdər biku duku ngəni tubi ni, təramta ata kəra mji na kəcəkəcari əmdləkumari ka əmdla na aɗi akwa tur tubi wa ni.”

Karapu Ata Kəra Kwaba Na Ku Sha

⁸ “Wala tsuwa ma mwala laga ka kwabar adzərfa kuma, antə ma duku sha alari, man tə tsa ata harari ri? Tsa ata njiu u'u akwa pitəla ka tsa tsarɓəla kutambwarni ka tsa wul shanga su na ambwa ka hangkal tar ma tsa ku paktə kwabar adzərfa ni.

⁹ Ma sakatə tsa ku wutə kwaba ni, tsa ata kəga pazhayeri ka ntəwulayeri ni ata kəma duku ka pəla ala ɗa, ‘I ka kucali ka duna kamnyar tə I ku wutə kwabarna na ku sha ali ni, antə ka mburu hara kucali ali ata kəma duku.’

¹⁰ Tsu apani antə I akwa pəla ala giri abbər mjirthlentərhyel ka kucali ata kəra mdər biku duku na ku tubi.”

Karapu Ata Kəra Ɓzər Na Shashari

¹¹ Antə Yesu ləkəma akwa pəla, “Mdə laga aɗi ka maɗashilərni suɗa.

¹² Antə ɓzər na ntsahari ni pəla aka baba'ni abbər, ‘Baba, na ali bwar kifər nga na ata sə ndzi ali,’ antə mdə ni ku ndəkəi kifərni aka maɗa'ni na suɗə ni.

¹³ Aɗi fəi vir hang aghəla nda wa, antə ɓzər na ntsaha ni ku tsaptə bwa na arni shang ka ɗələmta, antə tsa fatə kwabari ka təra mwari akwa tsəɗi na ciju. Anda antə tsa gyalntə shanga kwabarni akwa kafwakur.

¹⁴ Aghəla tə tsa ku shamta shanga su tə tsa kəgari, antə mi na ola ku təri akwa shanga tsəɗi ndaga. Antə tsa baɗitə ndzi mdər tur su.

¹⁵ Antə tsa ku mwari ka wutə kəthlər akəla mdər tsəɗi nda, antə mdə ni thlentə ni akwa fakərni kamnyar ka tsa ɓəla alari gaduwayeri arni.

¹⁶ Antə tsa ku bara abbər ka tsa ndlantə kutari ka su tə gaduwayeri ni ana ɓɗə ni, amma mda aɗi nar alari wa.

¹⁷ Antə sakatə tsa ngka akwa hangkalari, antə tsa pəla, ‘Nggədza buɗayeri ar baba'na ana wutə susəma ka mzhi ɗa har ka təramta amma nggədza ra azi ata mta ka mi!

¹⁸ I ata thlatə kəi mwari adzə baba'na kəi pəla alari, “Baba, I ku hara biku akəma Hyel ka akəma ga tsuwa.

¹⁹ I aɗi mzhi ka mdə kəga ra abbər I ɓzər nga kəra wa, amma ka gə namtə ra apa pal akwa nca buɗayeri ar nga.” ’

²⁰ Antə tsa ku thlata, ka si adzə baba'ni. “Amma sakatə tsa tsu ciju ka kəi ni, antə baba'ni ku wutə ni, ka kətadzə ni, ka pthli hwi ka mwari adzə ni, ka fəfahə ni akwa kərathlari, ka vədza kəsəm mnyari alari.

²¹ Antə ɓzər ni pəla aka baba'ni, ‘Baba, I ku hara biku akəma Hyel ka akəma ga tsuwa, I aɗi mzhi ka mdə kəga ra abbər I ɓzər nga kəra wa.’

²² Amma baba'ni ku kəga buɗayeri arni ka pəla ala ɗa, ‘Səntə giri ləptu na ɓɗakta shang ka giri hadza alari, ka giri hatə lenduwa ata kuleng tsiyari, ka pu ɓaɓi akwa səlari.

²³ Ka giri səntə kəna na təksətəksari ka thlamta wulyari ka mburu səma ka mburu hara kucali!

²⁴ Kamnyar ɓzərna ngəni ku mti, amma tsa ku jaktə wutə mpika, tsa ku sha, amma kulini tsa ku jaktə wutədzi!’ Antə da ku baɗitə hara kucali.

²⁵ “Akwa saka nda, ɓzər na olari ni tsu aɓəla akwa faku. Amma sakatə tsa akwa ngka avi, tə tsa ku hara kudzəhə ka kəi, antə tsa nggatə tsa su ka ɓathla.

²⁶ Antə tsa kəga pal akwa nca buɗayeri ka yuta alari abbər, ‘Man hara ri?’

²⁷ Antə buɗa ni pəla alari, ‘Ɓzərma' nga an ngka avi, antə baba' giri tsi kəna na təksətəksari kamnyar tə tsa ku jaktə ngka lapiya kula asar.’

²⁸ Amma ɗəffa ɓzər na ol ni ku ɓzi ka duna, antə tsa ku gyalntə ləvəi, amma baba'ni ku səɓəla ka kiɗə kərari abbər ka tsa ləvəi.

²⁹ Amma tsa shinau ka pəla aka baba'ni abbər, ‘Wul, shanga məvayeri ngəni, I akwa hara kəthlər ala ga apa mafa, I aɗi ɗar ɓəli tsawur ngə wa. Amma ba sakani ga aɗi ɗar na ali ɓzər kwi, kəi hara kucali kəgari kəga pazhayeri arna wa!

³⁰ Amma ɓzər ngə ngəni na shamta shanga gənar nga aka karwayeri ku ngka, antə gə tsi alari kəna na təksətəksari!’

³¹ Antə baba'ni pəla alari, ‘Ɓzərna, ar ngə ga adzə ra tədəku, antə shanga su tə I kəgari ku ndzi ar nga.

³² Amma ai kalkal ka mburu hara kucali ka ndzi ka ɗəffu mwapu, kamnyar ɓzərma' ngə ni ku mti, amma kulini tsa ka mpika, tsa ku sha, amma kulini mdə ku wutə ni.’ ”