Luka 11 - KAKAƊU NA ƁƊAKKARKARA

Thlipər Yesu Ata Kəra Hara Adduwa

¹ Vir laga Yesu akwa hara adduwa ata vəi laga. Sakatə tsa ku kuri, antə mdə pal akwa nca mjirthlipərni ni pəla alari, “Mthlaku, thlipa ala yeru hara adduwa, tsu apatə Yahwana thlipta aka mjirthlipərni ni bu.”

² Antə Yesu pəla ala ɗa, “Ma sakatə giri ata hara adduwa, ka giri pəla, “ ‘Tədda, ka mdə ɓəlatə thləma ga ka tsa ndzi ɓɗakkarkara. Ka kuthlikurər nga si.

³ Ka gə na ala yeru susəmər ɓukci yeru tədək viri.

⁴ Ka gə tifəmta ala yeru bikər yeru, kamnyar yeru ka kəra yeru ana tifəmta aka kəlara mdə na ku hara ala yeru biku. Ga aɗiya mwantə yeru akwa ngkərtədzi wa.’ ”

⁵ Antə Yesu pəla aka mjirthlipərni, “Ma pal akwa nca giri ata mwari adzə pazhirni ata kərathlər viri ka pəla alari ‘Pazhi, təpata ali kər buradi makər,

⁶ kamnyar pazhirna laga an thlata anggu ka si kulini, tsuwa I aɗi ka susəma tə kəi vəi akəmari wa.’

⁷ Antə ma pazhi tə gə mwari adzə ni pəla, ‘Ga aɗiya damitə ra wa, I ku kurtə hartə nyarmbwa, tsuwa yeru ku kurtə pəpəi kəga maɗa'na, antə I amzhi thlatə kəi na gə su wa.’

⁸ I akwa pəla ala giri, wala ma tsa an alari su kamnyar pazhikur na akwa daɓwa ɗa wa, tsa ata thlatə ka na alari shanga su tə tsa akwa turari kamnyar laku tə tsa ndzangkir kiɗə su akəlari kula ngga səli ni.

⁹ “Apani I akwa pəla ala giri abbər, ka giri kiɗa antə mda ata na ala giri, ka giri bara, antə giri ata wutari, ka giri tsarar nyarmbwa, antə mda ata kəlar ala giri.

¹⁰ Kamnyar kəlara mdə na ku kiɗa, mda ata na alari, kəlara mdə na ku pakə su, tsa ata wutari, tsuwa kəlara mdə na ku tsarar nyarmbwa, mda ata kəlar alari.

¹¹ Nənga wan akwa nca giri tə ma ɓzərni ku kiɗə kəlfa, tsa na alari pwapu ata vəya kəlfa nə ri?

¹² Wala ma tsa ata kiɗə thlithli, tsa na alari hiɗi ri?

¹³ Ma giri na ɗimi ni ata səndə hamta suayeri na ɓɗakɓɗaku aka maɗa' giri apani, to ai ma Təddar giri na amtazi shang tsa ata hamta Mambəl na Ɓɗakkarkara aka mji na ku kiɗə su akəlari”

Yesu Ka Beyelzebul

¹⁴ Vir laga Yesu akwa kədləɓəla shatan akwa dza mdə na ka mnyari dləɓdləɓari. Sakatə shatan ni ku ləɓəla, antə mdə ni ku baɗitə gari, antə mji na tsaptədzi ni ku ndatədzi.

¹⁵ Amma mji laga pəla, “Ka dunar Beyelzebul na kuthlir shatanayeri antə tsa akwa kədləɓəla shatanayeri ni.”

¹⁶ Mji laga tsuwa akwa bara ngkərtə Yesu, antə da yu ni abbər ka tsa ncantə ala ɗa sur ndatə na ata thlata amtazi.

¹⁷ Amma Yesu ku səndə dzamər ɗa, antə tsa pəla ala ɗa, “Kəlara kuthlikur na ku ndəkəmtadzi ka bwa suɗa, aɗi ata ndzəndzi wa. Tsuwa kəlara kutakəi na ku ndəkəmtadzi na ku ka bwa suɗa, aɗi ata ndzəndzi wa.

¹⁸ Tsuwa ma Shatan ku ndəkəmtadzi ka bwa suɗa akwa mpa aka kərni, apa madi tə kuthlikurərni ata mzhi thləthlatə ri? I akwa pəla ngəni kamnyar giri pəla I ana kədləɓəla shatanayeri ni ka dunar Beyelzebul.

¹⁹ Antə ma I ana kədləɓəla mambəlayeri na ɗimi ɗimi ka dunar Beyelzebul ka dunar wa antə mji na ata nu giri ana kədləɓəla ɗa ri? Kamnyar ngəni antə da an alkaliyayeri ata kəra giri abbər giri ku sha!

²⁰ Amma ma atar dunar Hyel antə I ana kədləɓəla shatanayeri, antə ngəni ata ncanta abbər kuthlikurər Hyel ku si ala giri.

²¹ “Ma mdə na ka duna, na ɗəmhəɗəmhari ka kari mpa, akwa sək kəyirni surni, shanga kariyirni ata ndzi lapiya.

²² Amma ma mdə na ka duna ta tsa ku si ata kərari, ka təra dunari, tsa ata dluɓəla shanga kari mpa tə mdə ni akwa gayari ni, ka ndəkəmta kariyayeri tə tsa fatə ni akwa mpa ni.

²³ “Kamnyar kəlara mdə na aɗi abwar na wa, antə tsa an dawar na, tsuwa kəlara mdə na aɗi ana dlar ra akwa tsapta ali su wa, tsa an mdər titiləmtari.”

Ngkar Mambəl Na Ɗimi

²⁴ “Saka tə mambəl na ɗimi ku ləɓəla akwa kuta mda, antə tsa ata mwa akwa vəyayeri na kula yimi, ata paka vəi ghərəmtaghəra, amma ma tsa aɗi mzhi wutari wa, antə tsa ata pəla akwa ɗəffari abbər, ‘I ata jaktə ngka akwa kəyirna natə I ku thlata akwa.’

²⁵ Antə ma sakatə tsa ku ngka ka wutə kəi ni tsartsarari, namnamari ndəlang.

²⁶ Antə tsa ata mwari ka səntə mambəlayeri damwa murfa na ɗimi ɗimi ta tsa, antə da ata ləvəi ka ndzəndzi anda, antə ndzəndziyir mdə ni na akwa tsikərari ata təramta ndzəndziyirni na ntangkəma ka ɗimikur.”

Msərakur Na Jirari

²⁷ Sakatə Yesu ku pəla ngəni, antə mwala laga akwa nca dlamar mji ni pəla alari, “Ka Hyel vədzə barka aka mwala na yaɓəla nga, ka uwa na kəlantə nga.”

²⁸ Amma Yesu pəla, “Jiri, amma na olari ka Hyel vədzə barka aka mji na ana psi thləm aka ndərərna ka ɓəlata!”

Mji Akwa Bara Surndata Akəla Yesu

²⁹ Sakatə dlamar mji akwa jakjaka antə Yesu pəla, “Ngəni an zaman na ɗimi! Tsa akwa bara seɗa, amma mda aɗi ata hamta alari seɗa wa, tar seɗar Jona.

³⁰ Kamnyar apatə naɓi Jona ku ndzi sur data aka mjir Nineva, tsu apani tsuwa antə Ɓzər Mda ata ndzi seɗa aka zaman ngəni.

³¹ Akwa vir shariya antə kuthli mwala ar Anəm ata sə thlata ata kəma duku kəga mjir zaman ngəni ka tsa burkatə ɗa, kamnyar tsa ku thlata akwa tsəɗiyirni na ciju ka si ngga ɗəɗukur ar kuthli Solaman, antə nggədza mdə na ku təramta Solaman ka olkur aɗi azi.

³² Ma vir shariya mjir Nineva ata səɓəla ka pəlangkər ala ɗa abbər da aɗi hara kalkal wa, kamnyar wala da natə Jona an ngkər ala ɗa ma da ku tubi. Antə har mdə na təramta Jona ka olkur ku si azi, amma wala apani giri aɗi hir tubi wa!”

Nca An Pitəlar Dza

³³ “Mda aɗi ana njiu u'u akwa pitəla ka vəi akwa vəi na ɗuwarɗuwarari wa, wala akira balang wa. Amma tsa ana vəi ni ata vəi vətə ni, kamnyar ka mji na akwa səmbwa wutə parakari.

³⁴ Nca ga an pitəlar dza ga. Ma nca ga an lapiya, dza ga tsuwa ata ndzi ncir parakəu. Amma ma nca ga aɗi lapiya wa, shanga dza ga ata ndzi ncir kuthlu.

³⁵ Antə tar gə pwi nca ga, ka gə wuta abbər parakəu na akwa dza gə ni kuthlu wa.

³⁶ Kamnyar ma shanga dza ga an nghyinghyari ka parakəu, tə wala bwa duku aɗi na akwa kuthlu wa, to, shanga dza gə ni ata ndzi akwa parakəu, apatə pitəla na akwa mbəla ana hamta ala gə parakəu.”

Yesu Ku Mpa Aka Mjir Farisi Ka Maləmayeri Ar Tsawa

³⁷ Sakatə Yesu ku kuri gari ni, antə mdər Farisi laga yu ni abbər ka da ra səm susəma aharngkiɗa. Antə Yesu ku mwari ka ndzəndzi akwa vəi səm susəm ni.

³⁸ Sakatə mdər Farisi ni wuta abbər Yesu aɗi kəcimta tsiyari akəmata tsa asəm susəm nə wa, antə tsa ndatədzi.

³⁹ Antə Mthlaku pəla alari, “Giri na mjir Farisi, giri ana kəcimta hila kwapə ka tasa ɗəva, amma avivi, ɗəffa giri an nghyinghyari ka zamba ka kəmanggarkur.

⁴⁰ Cakwayeri! Aɗi Hyel na namtə bwa na aɓəlaɓəla an namtə bwa na avivi ni wa ya?

⁴¹ Apani kəcimta giri kutari ni atar hamta suayeri na akwa ni cauta aka mjir tursu, antə giri ata ndzi kəcəkəcari akwa kəlara bwa.

⁴² “Sha ku wutə giri, giri na mjir Farisi! Kamnyar giri ana hamta zaka ar thlali yaji, apa mint, ka ruwe, ka shanga mambila thlaliyir səkwar na aɗi, amma giri ku nggəlar jirkur ka hirkur na ar Hyel. Nayeri ni an su tə kalkal ka giri hara ntangkəma, wala tə aɗi abbər ka giri zhar hara suayeri ndagə wa.

⁴³ “Sha ku wutə giri, giri na mjir Farisi! Kamnyar giri hir vəi ndzəndzi na ka daraja akwa mbwar vəngkər səl. Tsuwa giri hir ka mji thlawar giri akwa kasukayeri.

⁴⁴ Sha ku wutə giri! Kamnyar giri ndzi apa kulayeri na kula seɗa, tə mji ana mwa ata kər kula səndər ɗa.”

⁴⁵ Antə pal akwa nca mjir səndə Tsawu ni shinau alari ka pəla, “Maləm, akwa gari ngəni diya ga akwa nggəl yeru tsuwa.”

⁴⁶ Antə Yesu pəla, “Sha ku wutə giri, giri na mjir thlipə tsawur Musa! Kamnyar giri ana pungkər kəlayeri na kəgəɓu tə mda amzhi kətari wa aka mji, amma ar giri, giri aɗi ana dlara akwa haptari wala ka kulenga giri duku wa.

⁴⁷ Sha ku wutə giri! Kamnyar giri ana namtə kulər naɓiyayeri ɓɗakɓɗaku, naɓiyayeri natə kəkayeri ar giri an tsəgəi ɗa.

⁴⁸ Apani giri ku ndzi seɗayeri na ku kələngkər aka su tə kəkayeri ar giri hara ni. Kamnyar da tsəgəi naɓiyayeri ni, antə giri hənta ala ɗa kulayeri.

⁴⁹ An su na hara tə Hyel pəla akwa Ɗəɗukur ar Hyel abbər, ‘I ata thlenta ala ɗa naɓiyayeri ka aposəlayeri, natə bwaduku da ata tsəgəi ɗa, bwaduku tsuwa da ata hara bwani ala ɗa.’

⁵⁰ Kamnyar ngəni, mjir zaman ngəni ata sə ɗar bwani kamnyar shanga naɓiyayeri ngəni tə mdə tsi təng akwa baɗitər duniya ni,

⁵¹ baɗitə ka mamshir Habila, har ka vədza aka mamshir Zakariya, natə mdə tsi ni akwa daɓwa bagaɗi ar hamta saɗaka ka Vəi na Ɓɗakkarkara ni. I akwa pəla ala giri jirkur, mjir zaman ngəni ata sə ɗar bwani kamnyar su ngəni shang!

⁵² “Sha ku wutə giri, giri na maləmər thlipə tsawur Musa! Kamnyar giri ku kəsəmta tsəkuram nyarmbwar səndə su! Giri ka kəra giri aɗi ləmbwa wa, tsuwa giri ku ngkatə mjir bara ləmbwa ta da aləmbwa!”

⁵³ Sakatə Yesu ku təra ka zhar vəi na ndaga, antə maləmayeri ar thlipə tsawur Musa ka mjir Farisi baɗitə dzəktə ni, akwa ngga mnyari ka yu su ata kəra suayeri hang.

⁵⁴ Da ngga alari dərku, abbər nuhum da ata ngkəi vəi sharni akwa su tə tsa ata pəlari.