Luka 1 - KAKAƊU NA ƁƊAKKARKARA

Thlawardzi Aka Thliyofilus

¹ Tsu apatə mji hang ku vu duna ɗa abbər ka da rəbutə labar ata kəra suayeri na ku hara akwa nca mburu,

² antə da ku rəbutə tsu apatə mji na akwa baɗitari ku ngkər ala mburu, da na ku wutə suayeri ni ka nca ɗa, tə da ku ngkər labarari tsuwa.

³ Apani tsuwa antə ku ndzi kalkal ali, abbər kəi rəbuta ala gə ndərayeri ni ka vəyari ka vəyari, kamnyar I ku karatə shanga suayeri ngəni ka nuɓəla ɗa ata ata tsu ɗəm, ya Thliyofilus gə na təramta ka ɓɗakkur.

⁴ I ku hara apani kamnyar ka gə səndə jirkurər labar ata kəra suayeri natə mdə ku thlipa ala gə hwatu.

Yaɓəladzər Yahwana Na Mdər Hara Baptizma

⁵ Akwa sakatə Hirudus an kuthlər mjir Yahudiya, antə prist laga aɗi na ka thləmari Zakariya, natə tsa akwa zarar pristkur ar Abija, antə tsa ka mwala akwa nca maɗankwiyir Haruna, ka thləmari Alisabatu.

⁶ Antə japwa ɗa tsuwa harar ɗa ɓɗaku akəma Hyel, da ana kələngkər aka shanga tsawayeri ka suayeri tə mdə thlamta abbər ka mdə hara na ar Mthlaku kalkal.

⁷ Amma da aɗi ka ɓzər wa, kamnyar Alisabatu aɗi wutə ɓzər wa, antə tsuwa japwa ɗa ku hali.

⁸ Vir laga sakatə Zakariya akwa hara kəthlərərni na ar pristkur akəma Hyel akwa mbwar vəngkər səli, akwa sakar kəthlər na arni,

⁹ apatə pristayeri ana hara, antə cara ku kətə ni abbər ka tsa an ləkwa mbwar vəngkər səli ka tsa mbamta sur shiwura.

¹⁰ Sakatə tsa akwa mbamta sur shiwura, shanga dlamar mji aɓəla akwa hara adduwa ata saka na ndaga.

¹¹ Antə mjir Thlentər Hyel Mthlaku ku si ka thləthlata adzə ni abwa mazəma vəi hamta saɗaka ar mbamta sur shiwura ni.

¹² Sakatə Zakariya ku wutə ni, antə thlivəra ku ngkəi ni tə tsa ku yakata.

¹³ Amma mdərthlentərhyel ni pəla alari, “Ga aɗiya thlivər wa, Zakariya! Kamnyar Hyel ku nggatə adduwar nga, antə mwalankiri Alisabatu ata sə yaɓəla ala gə ɓzər sal, tə ga ata sə vəta alari thləmari Yahwana.

¹⁴ Antə ga ata sə ndzi ka kucali ka ɗəffu mwapu, tsuwa mji hang ata sə hara kucali akwa sakar yaɓəladzərni.

¹⁵ Tsa ata sə ndzi mdə na ka olkur akəma Mthlaku, antə tsa aɗi ata sə sa yimər anap wa, wala sur sa damwa na mwavər wa, kamnyar Hyel ata sə nghyantə ni ka Mambəl na Ɓɗakkarkara tsu akwa kuta mama'ni.

¹⁶ Antə tsa ata sə səntə mjir Israila hang adzə Mthlaku na Hyel arɗa.

¹⁷ Antə tsa ata sə mwa akəma Mthlaku, tsuwa ka tsa hara kəthlərərni ka shanga dunari ka dunar ɗəffari apa ar naɓi Eliya. Tsa ata sə səntə mjir ya ka maɗankyar ata kəma duku ka damwa, antə tsa ata sə shinantə ɗəffa mji na aɗi ana kələngkər wa ka da ndzi ka hal na pwa, tə apani antə tsa ata ɗəmhə mjir Mthlaku alari.”

¹⁸ Antə Zakariya pəla aka mdərthlentərhyel ni, “Apa madi antə I ata sə səndari abbər, su ngəni ata sə ndzi tsu apani ri?” Kamnyar I mdə na ku hali antə mwalankiya tsuwa ku hali.

¹⁹ Antə mdərthlentərhyel ni shinau alari ka pəla, “I an Jibrailu, na ana thləthlata akəma Hyel, antə tsa ku thlentə ra kəi gari ala ga, kəi pəla ala gə labar ngəni na ɓɗaku ni.

²⁰ Amma nggədza ga ku nggəlar ta kələngkər aka ndər ni, na ata ndzi jiri ma virari ku sə hara. Ata kəra ngəni, kamnyar tə ga ku nggəlar ta kələngkər ali antə ga aɗi ata mzhi gari kəra wa, tar ma vir tə alkawal ngəni ku nghyaɓəladzi.”

²¹ Antə mji na aɓəla akwa səka Zakariya ni, ku ndatədzi kamnyar tə tsa ku fəi akwa mbwar vəngkər səli.

²² Sakatə tsa ku səɓəla, antə tsa aɗi mzhi ndəra ala ɗa wa, antə da ku sənda abbər tsa ku wutə su akwa wulsu akwa mbwar vəngkər səli, antə kamnyar tə tsa aɗi mzhi pəla wala ndər duku wa, tsa ku hara seɗar gari ala ɗa ka tsiyari daci kula ndəra.

²³ Sakatə sakar kəthlərərni akwa mbwar vəngkər səli ku kuri, antə tsa ku təra ka laha ngkiɗa.

²⁴ Aghəla virayeri ngəni antə mwalankiɗa Alisabatu ku kətə hur, antə har thliya ntəfu tsa ku ɗuwar kərni avi, antə tsa ana pəla.

²⁵ “Kulini antə Mthlaku ku dlar ra akwa virayeri ngəni, sakatə tsa ku wulha ra, ka kələmta səli ali ata nca mji.”

Yaɓəladzər Yesu Kristi

²⁶ Akwa thliya na ngkwakur ar Alisabatu sakatə tsa ku kətə hurər Yahwana, antə Hyel ku thlentə mdərthlentərni, Jibrailu akwa di na ola akwa tsəɗi Galili, tə thləmari an Nazareth.

²⁷ Ka tsa mwari adzə ɓzərngkwa laga natə sal laga ka thləmari Yusuf na akwa dur ar Dauda an zhutə ni, thləma ɓzərngkwa ni an Maryamu.

²⁸ Antə mdər thlentə ni ku si adzə Maryamu ka pəla alari, “Usa gə na mdər wutə msərakur, tə Mthlaku andzi adzə nga!”

²⁹ Amma tsa ku ndatədzi mwavər ata kəra ndər ngəni, ka dzama ata kər akwa ɗəffari abbər, thlawardzi jili madi ngəni ri?

³⁰ Antə mdərthlentərhyel pəla alari, “Ga aɗiya thlivər wa, Maryamu, kamnyar gə mdər wutə msərakur akəla Hyel.

³¹ Nggədza tsuwa ga ata sə kətə hur, ka yaɓəla ɓzər sal, antə giri ata sə vətə thləmari Yesu.

³² Tsa ata sə ndzi mdə na ola, antə mda ata sə kəga ni abbər, Ɓzər Hyel na Amta ta Shang: Antə Hyel Mthlaku tsuwa ata sə hamta alari dəkəl Kuthlikur ar kəkarni Dauda.

³³ Antə tsa ata sə hara kuthlikur ata kəra dur ar Yakub ba saka madi, kuthlikur arni tsuwa akur wa.”

³⁴ Antə Maryamu pəla aka mdərthlentərhyel ni, “Apa madi tə su ngəni ata sə harari, kamnyar tə I aɗi səndə sal wa?”

³⁵ Antə mdərthlentərhyel ni shinau alari ka pəla, “Mambəl na Ɓɗakkarkara ata sə si ata kəra ga, dunar Hyel na Amta ta shang tsuwa ata sə hara shanggur ala ga, kamnyar ngəni antə Ɓzər na ɓɗakkarkara na ata sə yaɓəladzi ni, mda ata sə kəga ni abbər, Ɓzər Hyel.

³⁶ Nggədza tsuwa, Alisabatu na yangkura ga, wala tə tsa ku hali, tsu tsa ka hur ar ɓzər sal adzə ni, antə ngəni an thliyar ni na ngkwakur tə tsa ka hur ni, tsa tə mji ana pəla abbər tsa aɗi ata wutə ɓzər wa.

³⁷ Amma su aɗi na kula Hyel amzhi harari wa.”

³⁸ Antə Maryamu pəla, “Nggədza ra, I mafar Mthlaku, ka tsa ndzi ali tsu apa ndər natə ga ku pəla ni.” Antə mdərthlentərni ku zhar ni ka təra.

Maryamu ku Mwari Ra Thlawar Alisabatu

³⁹ Akwa virayeri ni antə Maryamu ku ɗəmhədzi ka mwari ka huva akwa tsəɗi na ka garayeri, akwa di na ola akwa tsəɗiyir Yahuda.

⁴⁰ Antə tsa ku ləvəi akwa kəyir Zakariya ka thlawar Alisabatu.

⁴¹ Amma sakatə Alisabatu ku nggatə thlawardzi Maryamu, antə ɓzərni ku ɓuji akwa kutari, antə Alisabatu tsuwa ku nghyantədzi ka Mambəl na Ɓɗakkarkara,

⁴² antə tsa ku pəla ka kuraku na ola abbər, “Gə ka barka akwa nca mwanki, barka tsuwa aka ɓzər natə ga ata sə yaɓəlari!

⁴³ Antə apa madi tə I wutə ɓɗakkur ngəni ri, har tə mama' Mthlakərna ku si adzə ra?

⁴⁴ Kamnyar nggədza, sakatə I ku nggatə kurakər thlawardzər nga akwa thlimi, antə ɓzər na akwa kuti ku ɓuji kamnyar kucali.

⁴⁵ Tsa ka barka tsuwa, tsa na ku hamta jiri aka su tə mdə ku pəla alari, na thlata akəla Mthlaku, abbər ata sə ndzi jiri.”

Har Huwa Natə Maryamu Ku Hara

⁴⁶ Antə Maryamu pəla, “Ɗəffi ata na olkur aka Mthlaku,

⁴⁷ mambələrna tsuwa ata hara kucali kamnyar Hyel an Mdər mbantə ra.

⁴⁸ Kamnyar tsa ku wulha talakakur ar mafarni, kamnyar nggədza akəmazi, antə shanga zamanayeri ata sə kəga ra mdər barka.

⁴⁹ Kamnyar Hyel na ka duna ku hara suayeri na ol'ola ali. Thləmari tsuwa an Ɓɗakkarkara.

⁵⁰ Tsa ana kətadzə mji na ana thlivər ni akwa shanga zamanayeri.

⁵¹ Tsa ku hara kəthlərayeri na ol'ola ka tsiyari, mji na ka ɗəffər olkur tsa ku titiləmta ɗa ka dzamər ɗəffa ɗa.

⁵² Tsa ku kəlghəi kuthlyayeri na ol'ola ata dəkəlayeri arɗa, talakayeri tsuwa antə tsa ku jakə olkur ala ɗa.

⁵³ Mji na ka mi ku ndlantədzi ka suayeri na ɓɗakkarkara, mjir gəna tsuwa antə tsa ku kədləmta ka tsiya ɗa gapani kula su akwa.

⁵⁴ Tsa ku kəsi alkawal tə tsa ku hara aka kəkayeri ar mburu, antə tsa ku sə dlar buɗar ni Israila,

⁵⁵ tə tsa ku nghyantə alkawal arni aka kəkayeri ar mburu, ka aka Ibrahim ka durər ni ba saka madi.”

⁵⁶ Antə Maryamu ku ɗarndzi adzə Alisabatu apa thliya makər kambəla tsa ngka aharngkiɗa.

Yaɓəladzər Yahwana Na Mdər Hara Baptizma

⁵⁷ Kulini antə sakar yar Alisabatu ku hara, antə tsa ku yaɓəla ɓzər sal.

⁵⁸ Antə ntəwulayeri arni kəga mji na yangkurari ku nggata abbər Mthlaku ku ncantə kətadzər mdərni na ola alari, antə da ku hara kucali kəga tsa.

⁵⁹ Sakatə ɓzər ni ku hara vir ncisu antə da ku si kamnyar thla kaciya alari, antə da ku bara ka da vəta alari thləmari Zakariya tsu apa thləma baba'ni,

⁶⁰ amma mama'ni pəla, “Aɗi apani wa, mda ata kəga ni Yahwana.”

⁶¹ Antə da pəla alari, “Amma aɗi akwa nca dur nga na ka thləm ngəni wa!”

⁶² Antə da hara seɗa aka baba'ni, ata yu ni abbər arni tsa hir ka mdə kəga thləma ɓzər ni mə ri?

⁶³ Antə tsa yuwa abbər ka mdə na alari sur rəbuta, tə tsa rəbuta abbər, “Thləmari Yahwana.” Antə shanga ɗa ku ndatədzi.

⁶⁴ Ata saka na ndaga mnya Zakariya ku kəlardzi. Su na ku mbwi kyanggyari ku mpəlidzi, təkəma tsa ku baɗitə labar ka damwa ata hu Hyel.

⁶⁵ Antə shanga ntəwulayeri na anda ku thlivəra, antə labar ata kəra suayeri ngəni ku titiləmtadzi bamama akwa shanga tsəɗiyir garayeri ar Yahudiya,

⁶⁶ Kəlara mdə na ku nggatə su ngəni ku dzama ata kər akwa ɗəffari, ka yuwa abbər, “Ɓzər ngəni ata sə ndzi məmə ri?” Kamnyar dunar Mthlaku aɗi adzə ni.

Zakariya Ku Hara Naɓikur Ka Hu Hyel

⁶⁷ Antə Zakariya na baba' Yahwana ku nghyantədzi ka Mambəl na Ɓɗakkarkara, tə tsa ku hara naɓikur ka pəla:

⁶⁸ “Ka mburu hu Mthlaku tsa na Hyelər Israila, kamnyar tsa ku sə dlar mjirni ka na ala ɗa msərmsərkur.

⁶⁹ Tsa ku hamta ala mburu Mdər mbantə na ola, akwa dur ar buɗar ni Dauda,

⁷⁰ Tsa ku hara alkawal atar naɓiyayeri arni na ɓɗakkarkara tsu waci abbər,

⁷¹ ka tsa mbantə mburu ta dawayeri ar mburu, ka tsuwa tsa ata mbantə mburu ta dunar shanga mji na ku nggəlar mburu.

⁷² Kamnyar ka tsa ncantə kətadzə natə tsa ku hara alkawalari aka kəkayeri ar mburu, ka tsuwa ka tsa ɗangtə alkawal arni na ɓɗakkarkara.

⁷³ Kahyel natə tsa ku hara aka Ibrahim na baba' mburu,

⁷⁴ ka tsa sə msərantə mburu, akwa tsiya dawayeri ar mburu abbər ka mburu sə hara kəthlər alari kula thlivəra,

⁷⁵ ka mburu ndzi Ɓɗakkarkara ka kəthlər ɓɗakkur akəmari akwa shanga virayeri ar mpika mburu.

⁷⁶ Antə gə na ɓzərna tsuwa, mda ata sə kəga nga abbər ga an naɓi ar Hyel na amta ta shang. Ga ata sə mwa akəma Mthlaku kamnyar ɗəmha alari laku.

⁷⁷ Tsuwa ga ata pəla aka mjirni abbər da ata sə wutə mbantədzi atar tifəmtar bikayeri arɗa.

⁷⁸ Kamnyar Hyelər mburu an mdər kətadzə mda ka mdər wul mda. Tsa ana hara ka parakər vəi na amtazi na ar mbantədzi ka tsa mbila ata kəra mburu.

⁷⁹ Ka tsa mbila tsuwa aka mji na andzəndzi akwa kuthlu ka shanggur ar mta, ka tsa pwar səla mburu akwa mwa akwa lakur msərmsərkur.”

⁸⁰ Antə Yahwana ku kəla, ka hara ɓəɓal akwa mambəla. Tsuwa tsa ku ndzi akwa mtaku, tar vir natə tsa ku sə wutədzi aka mjir Israila.