Hoseya 1 - KAKAƊU NA ƁƊAKKARKARA

¹ Hoseya an ɓzər Beyeri. Antə ngəni an labar natə MTHLAKU pəla aka Hoseya. Tsa gari alari akwa sakatə Uzziya, ka Yothlam, ka Ahaz, ka Hezekiya an kuthlyayeri ar Yahuda. Tsuwa sakanda Yerobowam na ɓzər Yehowash an kuthlir Israila.

Mwala' Hoseya Kəga Maɗangkyarərni

² Sakatə MTHLAKU gari ntangkəma aka mjir Israila, tsa pəla aka Hoseya, “Mwari ka gə kəl mwala na ana ləka, ka tsa yatsə ala gə maɗar na miɗar akwa karwakurərni ni. Kamnyar apani antə mjirna ku ləkwa karwakur, atar fwari ata kəri, I na MTHLAKU.”

³ Apani Hoseya mwari ka kəl mwala laga na ka thləmari Gomer, ngkwar Diblayim. Antə mwala ni ku kətə hur ka yaɓəla alari ɓzər sal.

⁴ Antə MTHLAKU pəla aka Hoseya, “Ka gə vəta alari thləm Yezireyel, kamnyar aɗi ata fəi wa I ata ɗi kutakəyir Yehu, kamnyar mamshir mji tə kəkarni Yehu ku pumta akwa Mular Yezireyel. Apani I ata hartə nyarmbwar kuthlikur ar Yehu.

⁵ Antə akwa saka na ndaga I ata kurəmta sojayeri ar Israila akwa Mular ar Yezireyel.”

⁶ Aɗi fəi wa təng Gomer jaktə kətə hur, antə akwa saka ngəni tsa ya ɓzərngkwa. Antə MTHLAKU pəla aka Hoseya ka tsa vəta alari thləm “Kətadza Aɗi wa”, kamnyar I aɗi ata jaktə kətadzə mjir Israila wa. Tsuwa jiri, I aɗi ata yafitə ɗa wa.

⁷ Amma I na MTHLAKU na Hyelər mjir Yahuda ata kətadzə mjir Yahuda, kəi mbantə ɗa. I aɗi ata msərantə ɗa atar mpa wa, wala ka katsakar, wala lali ka afa, wala atar taku ka mjir fəl taku wa.

⁸ Sakatə tsa ku kəli “Kula Kətadza” ata uwa, antə tsa jaktə kətə hur ka yaɓəla ɓzər sal damwa.

⁹ Antə MTHLAKU pəla aka Hoseya, ka tsa vəta alari thləm, “Aɗi Mjirna Wa”, kamnyar mjir Israila aɗi mjirna wa, antə I aɗi Hyelər ɗa wa.

Israila Ata jaktə Ndzi Mjir Hyel

¹⁰ Amma saka ata sə si tə mjir Israila ata hara hang apa wuyakər mnya manda, hang tə mda amzhi jikatari wa. Hyel ku pəla ala ɗa, “Giri aɗi mjirna wa”, amma vir nda tsa ata sə pəla ala ɗa, “Giri an maɗa' Hyel na ka mpika.”

¹¹ Mjir Yahuda ka mjir Israila ata sə tsaptədzi ata vəi duku, ka carɓəla mdə pal na ata ndzi olər ɗa. Da ata jaktə dlutsə tsəɗiyir ɗa, antə tsəɗi ni ata jaktə thlatə ka kəla ola! Antə vir ar Yezireyel ata ndzi vir na ola.