Baɗitari 8 - KAKAƊU NA ƁƊAKKARKARA

Yimər Avava Ku Baɗitə Shiwa

¹ Amma Hyel ku ɗangtə Nuhu ka shanga mwaɓiyayeri ar mtaku kəga na ar kəi na adzə ni akwa shar ni. Antə Hyel ku hara tə shambar fya ata kəra duniya, antə yimi ni ku kəmtadzi.

² Antə kur səɓəlar yimi na zurang ata di ka gulayeri ar yimi na amtazi ku hartədzi, tsuwa yimərhyel ku thləthlata.

³ Antə yimi ni ku ləkəma ka kəmtadzi ka hangkal ka ləghəi. Aghəla vir aru pal ka ntəfkumari antə yimi ni ku kəmtadzi.

⁴ Akwa vir na kumnya murfəkur ar thliya na murfəkur, antə shar ni thləthlata ata kəra garayeri ar Ararat.

⁵ Tsuwa yimi ni ku ləkəma ka kəmtadzi har ka mwanta akwa thliya na kumkur. Akwa vir na kumkantangkur ar thliya na kumkur antə mdə baɗitə wutə kəra garayeri.

⁶ Aghəla vir nfwarkumari antə Nuhu kəlar windauwur shar natə tsa namtə ni,

⁷ ka thlentə zəlaku. Antə zəlaku ni ku ləkəma akwa mwari ka ngka, har tə yimi ni ku shiwa ata di.

⁸ Antə tsa thlentə bukəl laga na adzə ni ka tsa ra wuli wala nuhum yimi ni ku jaktə kəmtadzi ata di,

⁹ amma bukəl ni aɗi wutə vəi tə ka tsa pwa ata wa, kamnyar tə ba kulini yimi tsu ata kəra duniya. Antə tsa ngka adzə ni akwa shar ni. Antə Nuhu haɓəla tsiyari, ka tamtə bukəl ni, ka jaktə vu ni akwa shar ni adzə ni.

¹⁰ Aghəla tə tsa jaktə ɗar səkari mnyar vir murfa, antə tsa jaktə thlentə bukəl na akwa shar ni.

¹¹ Antə bukəl ni ngka adzə Nuhu ka mnya tahaku, tsuwa tsa si ka thlali nfur zaitun na haɗa ɗəɗa akwa mnyari. Atar apani antə Nuhu nggaɓəla abbər yimi ku kəmtadzi ata kəra duniya.

¹² Aghəla tə tsa jaktə ɗar səkari mnyar vir murfa, antə tsa jaktə thlentə bukəl ni. Amma akwa saka ngəni tsa aɗi jaktə ngka kəra wa.

¹³ Akwa vir na ntangkəma ar thliya na ntangkəma, akwa məva na aru ngkwa ka pal aghəla yaɓəladzər Nuhu antə yimi ni ku shuwumtadzi ata di. Antə Nuhu famta kəra shar ni, ka wuta abbər kəra di akwa ula.

¹⁴ Akwa thliya na suɗkur ka virari sərkumari ka murfa antə di ulantədzi.

¹⁵ Antə Hyel pəla aka Nuhu,

¹⁶ “Ka gə səɓəla akwa shar ni, ga ka mwalankiri, ka maɗa' nga, ka mwankir maɗa' nga.

¹⁷ Ka gə fwaɓəla shanga su na ka mpika na adzə nga. Fwaɓəla shanga ɗikayeri, ka mwaɓiyayeri, ka shanga su na ana mwa ka yimər kuta ɗa ata di, kamnyar ka da yatədzi ka hara hang akwa duniya.”

¹⁸ Antə Nuhu ku səɓəla ata kəma duku kəga maɗa'ni, ka mwalankiɗa, ka mwankir maɗa'ni.

¹⁹ Antə shanga mwaɓiyayeri ar mtaku, ka shanga su na ana mwa ka yimər kuta ɗa, ka shanga ɗikayeri, ka shanga su na ana mwa ata di, ku səɓəla akwa shar ni ata ata, atar jiliyir ɗa.

Hyel Ku Hara Alkawal Aka Nuhu

²⁰ Antə Nuhu həntə bagaɗi ar hamta saɗaka aka MTHLAKU, ka fwaɓəla akwa nca shanga mwaɓiyayeri na kəcəkəcari, ka ɗikayeri na kəcəkəcari, ka hamta ɗa saɗaka mbamba kəgari ata bagaɗi ni.

²¹ Sakatə MTHLAKU ku nggatə msərakur shiwurari, antə tsa pəla akwa ɗəffari abbər, “I aɗi ata jaktə shuwumta di kamnyar su tə mdə hara kəra wa, wala tə dzam na akwa ɗəffa mda an ɗimi təng akwa ngkyarkurərni. Tsuwa I aɗi ata jaktə shamta su na ka mpika apatə I hara ni kəra wa.

²² “Har ka vədza aka kurər duniya, sakar thləka ka sakar thlari, sakar shambar ka sakar vəi ufu fakəu ka vəya, pci ka viri aɗi ata thlamtadzi wa.”