Baɗitari 7 - KAKAƊU NA ƁƊAKKARKARA

Yimər Avava Ku Hartə Duniya

¹ Antə MTHLAKU pəla aka Nuhu abbər, “Səkwa shar ni, ga ka shanga mjir kutakəyir nga, kamnyar I wuta abbər gə shinga an ka jirkur akwa zaman ngəni.

² Akwa nca shanga jili mwaɓiyayeri na kəcəkəcari, ka gə fatə mwaɓi repu repu vəyari murfa salari ka mwalari, ka da ndzi adzə nga. Tsuwa akwa nca shanga jili mwaɓiyayeri na adiya, ka gə kəɓəla mwaɓi pal pal, salari ka mwalari.

³ Tsuwa akwa nca shanga ɗikayeri, ka gə fatə ɗika repu repu vəyari murfa, salari ka mwalari, kamnyar ka hwulfər ɗa mbila ata kəra duniya shang.

⁴ Kamnyar aghəla vir murfa, I ata thlentə yimi akwa duniya, yimi na ata hara pci nfwarkumari ka viri nfwarkumari. Antə shanga su na ka mpika natə I ku namta, I ata shamta ɗa ata kəra duniya.”

⁵ Antə Nuhu ku hara shanga su kalkal apatə MTHLAKU ku tsawa alari

⁶ Nuhu ka məvari aru ngkwa sakatə yimər avava ni si ata kəra duniya ni.

⁷ Antə Nuhu ka maɗashilərni, ka mwalankiɗa kəga mwankir maɗa'ni ku ləkwa shar ni ata kəma duku kamnyar ka da msəra ta avava ni.

⁸ Antə akwa nca mwaɓiyayeri na kəcəkəcari, ka akwa nca mwaɓiyayeri na adiya, ka tsuwa akwa nca ɗikayeri, ka shanga mwaɓiyayeri na ana mwa ka yimər kuta ɗa ata di,

⁹ da suɗsuɗa, salari ka mwalari, an si ka ləkwa shar ni adzə Nuhu, tsu apatə Hyel ku tsawa aka Nuhu.

¹⁰ Aghəla vir murfa antə yimər avava ku baɗitə təra akwa duniya.

¹¹ Akwa vira thliya kumnya murfəkur ar thliya na suɗkur, akwa məva na aru ngkwakur ka yaɓəladzər Nuhu, vir nda antə shanga vəi səɓəlar yimayeri na zurang akwa kira di, ka gular yimayeri na amtazi ku mbugərəmtadzi.

¹² Antə yimi baɗitə təra ata di akwa duniya ar pci nfwarkumari ka viri nfwarkumari.

¹³ Tsuwa tsu vir nda antə Nuhu ka maɗashilərni, watau Shem, ka Ham, ka Yafeth, ka mwalankiɗa, ka mwankir maɗa'ni na makər ni, ku ləkwa shar ni.

¹⁴ Da ləkwa ata kəma duku ka shanga jili mwaɓiyayeri ar mtaku, ka shanga jili mwaɓiyayeri ar kəi na aɗi, ka shanga jili su na ana mwa ka yimər kuta ɗa ata di, ka shanga jili ɗikayeri na aɗi, kəlara jili su na ka ɓəɓəku.

¹⁵ Shanga ɗa ku ləkwa shar ni ata kəma duku ka Nuhu, kəlara su na ka mpika, suɗsuɗa.

¹⁶ Tsuwa shanga ɗa na ləkwa ni an salari ka mwalari ar shanga su na ka mpika, antə da ku ləkwa kalkal apatə Hyel ku tsawa aka Nuhu. Antə MTHLAKU ku hartə nyarmbwar shar ni.

¹⁷ Antə yimər avava ni ku ləkəma ka təra akwa duniya har vir nfwarkumari. Antə yimi ni ku jakjaka har ka haptə shar ni kazhar di, tə shar ni ku ləmta nal kazhar di.

¹⁸ Antə yimi ni ku muli ka jakjaka ka hara hang ata kəra duniya. Antə shar ni ku haptədzi amta ka ndzi ata kəra yimi ni akwa mwa.

¹⁹ Antə yimi ku mula ka duna ata kəra duniya, har tə shanga kəra garayeri na nal nal akwa duniya ku hartədzi.

²⁰ Yimi ni ku muli har ka hartə kəra garayeri, har tə kəra garayeri ni sha akwa yimi ni səyam ka dzartsi kumnya ntəfu.

²¹ Antə shanga su na ka mpika na ana mwa akwa duniya ku mtəgəmtadzi, kəga ɗika, kəga mwaɓi kəi, kəga mwaɓi mtaku, ka shanga su na ka mpika na ana mwa ata di, ka shanga mji.

²² Shanga su na ata di ul'ula, na ana mpika akwa kucirari ku mtəgəmtadzi.

²³ Apani antə tsa ku kurəmta shanga su na ka mpika akwa duniya, mda, ka mwaɓi, ka mwaɓi na ana mwa ka yimər kutari, ka ɗika na ata kutahyel, shanga ɗa mdə ku shamta ɗa kazhar kəra duniya. Tar Nuhu ka mji na adzə ni akwa shar ni an mbil ka mpika.

²⁴ Antə yimi ni ku mula ka hartə kəra duniya ni har mnyar vir aru pal ka ntəfkumari.