Baɗitari 5 - KAKAƊU NA ƁƊAKKARKARA

Mjir Nyarmbwar Adam Har Ka Ləghəi Aka Maɗashilər Nuhu

¹ Ngəni an kakaɗər thləma mjir nyarmbwar Adam. Sakatə Hyel alaktə mda, tsa namtə ni akwa dludzər Hyel.

² Tsa alaktə ɗa mdə sal ka mdə mwala, ka vədza ala ɗa barka. Sakatə tsa alaktə ɗa, antə tsa vəta ala ɗa thləm Mda.

³ Sakatə Adam ka məvari aru ka makkumari, antə tsa yaɓəla ɓzər sal na dludzər ni, tsu apa tsa, ka vəta alari thləm Seth.

⁴ Aghəla tə tsa yaɓəla Seth, antə Adam jaktə hara məva aru ncisu, tsuwa tsa ku jaktə wutə maɗankyar damwa shili ka mwanki.

⁵ Antə hangkur shanga məvar Adam an aru əmdla ka makkumari, antə tsa ku mti.

⁶ Sakatə Seth ka məvari aru ka ntəfu, antə tsa yaɓəla ɓzərni Enosh.

⁷ Antə Seth ku hara məva aru ncisu ka murfa aghəla tə tsa yaɓəla Enosh. Tsuwa tsa ku jaktə wutə maɗankyar damwa shili ka mwanki.

⁸ Antə hangkur shanga məvar Seth an aru əmdla ka kumnya suɗa, antə tsa ku mti.

⁹ Sakatə Enosh ka məvari əmdləkumari antə tsa yaɓəla ɓzərni Kenan.

¹⁰ Aghəla tə Enosh ku yaɓəla Kenan, antə tsa jaktə hara məva aru ncisu ka kumnya ntəfu, tsuwa tsa ku jaktə wutə maɗankyar damwa shili ka mwanki.

¹¹ Antə hangkur shanga məvar Enosh an aru əmdla ka ntəfu, antə tsa ku mti.

¹² Sakatə Kenan ka məvari murfəkumari, antə tsa yaɓəla ɓzərni Mahalalel.

¹³ Aghəla tə Kenan ku yaɓəla Mahalalel, antə tsa jaktə hara məva aru ncisu ka nfwarkumari, tsuwa tsa ku jaktə wutə maɗankyar damwa shili ka mwanki.

¹⁴ Antə hangkur shanga məvar Kenan an aru əmdla ka kuma, antə tsa ku mti.

¹⁵ Sakatə Mahalalel ka məvari ngkwakumari ka ntəfu, antə tsa yaɓəla ɓzərni Yared.

¹⁶ Aghəla tə Mahalalel ku yaɓəla Yared, antə tsa jaktə hara məva aru ncisu ka makkumari, tsuwa tsa ku jaktə wutə maɗankyar damwa shili ka mwanki.

¹⁷ Antə hangkur shanga məvar Mahalalel an aru ncisu ka əmdləkumari ka ntəfu, antə tsa ku mti.

¹⁸ Sakatə Yared ka məvari aru ka ngkwakumari ka suɗa, antə tsa yaɓəla ɓzərni Enok.

¹⁹ Aghəla tə Yared ku yaɓəla Enok, antə tsa jaktə hara məva aru ncisu, tsuwa tsa ku jaktə wutə maɗankyar damwa shili ka mwanki.

²⁰ Antə hangkur shanga məvar Yared an aru əmdla ka ngkwakumari ka suɗa, antə tsa ku mti.

²¹ Sakatə Enok ka məvari ngkwakumari ka ntəfu, antə tsa yaɓəla ɓzərni Methlusela.

²² Aghəla tə Enok ku yaɓəla Methlusela, antə tsa jaktə hara məva aru makər akwa mwa ka Hyel, tsuwa tsa ku jaktə wutə maɗankyar damwa shili ka mwanki.

²³ Antə hangkur shanga məvar Enok an aru makər ka ngkwakumari ka ntəfu.

²⁴ Enok ku mwa ka Hyel, antə mda aɗi wutə ni kəra wa, kamnyar Hyel ku kətə ni.

²⁵ Sakatə Methlusela ka məvari aru ka nciskumari ka murfa, antə tsa yaɓəla ɓzərni Lamek.

²⁶ Aghəla tə Methlusela ku yaɓəla Lamek, antə tsa jaktə hara məva aru murfa ka nciskumari ka suɗa, tsuwa tsa ku jaktə wutə maɗankyar damwa shili ka mwanki.

²⁷ Antə hangkur shanga məvar Methlusela an aru əmdla ka ngkwakumari ka əmdla, antə tsa ku mti.

²⁸ Sakatə Lamek ka məvari aru ka nciskumari ka suɗa, antə tsa yaɓəla ɓzərni,

²⁹ ka vətə thləmari Nuhu, kamnyar tsa pəla, “Ndzi ka ɓzər ngəni səntə ala mburu shambar akwa kəthlər ar mburu, ka akwa bwaniyir kəthlər tə mburu ana hara ka tsiya mburu ata di tə MTHLAKU ku shuwumta ni.”

³⁰ Aghəla tə Lamek ku yaɓəla Nuhu, antə tsa jaktə hara məva aru ntəfu ka əmdləkumari ka ntəfu, tsuwa tsa ku jaktə wutə maɗankyar damwa shili ka mwanki.

³¹ Antə hangkur shanga məvar Lamek an aru murfa ka murfəkumari ka murfa, antə tsa ku mti.

³² Aghəla tə Nuhu ku hara məva aru ntəfu, antə tsa yaɓəla Shem, ka Ham, ka Yafeth.