Baɗitari 48 - KAKAƊU NA ƁƊAKKARKARA

Yakub Ku Namtə Maɗa' Yusuf Apa Arni

¹ Aghəla suayeri ngəni, antə mdə laga si ka pəla aka Yusuf abbər, “Baba nga aɗi lapiya wa.” Antə Yusuf fatə maɗashilərni suɗa, watau Manasse ka Ifrayim, tə da mwari ra wuli ni.

² Sakatə mdə ku pəla aka Yakub abbər, “Ɓzər nga Yusuf si adzə nga”, antə Yakub ntsətədzi ka thlatə ka ndzəndzi ata dəkələrni.

³ Antə Yakub pəla aka Yusuf abbər, “Hyel na ka Duna ta Shang ku ncantə kərni ali ahar Luz na akwa tsəɗi Kanana ka vədza ali barka,

⁴ ka pəla ali, ‘I ata vu ka gə yatədzi, ka gə wutə maɗa' dlama dlama. I ata vu har ka mjir nyarmbwar nga sə ndzi durayeri zumzum kamnyar hangkurər ɗa akwa duniya, kəi hamta tsəɗi ngəni aka kəkayeri ar nga na aghəla ga, ka tsa ndzi arɗa har ba saka madi.’ ”

⁵ “Antə kulini maɗashilər nga na suɗa tə gə yaɓəla akwa tsəɗi Masar akəmata I asi adzə ngə ni, da ata ndzi arna. Ifrayim ka Manasse ata ndzi arna, tsu apa Ruben ka Simeyon.

⁶ Amma maɗa' tə ga ata sə yaɓəlari aghəla ɗa ata ndzi ar nga, antə mda ata sə kəga ɗa ka thləma maɗama' ɗa akwa bwar tsəɗi tə da ata fa kifari.

⁷ Kamnyar sakatə I thlata ahar Paddan ni akwa lakur si antə Rahila mta akwa tsəɗi Kanana, ka zhar ra akwa ɗəffə ɓzəɓza, təng akəmata yeru amzhətə Efrathla. Antə I harəmta ni anda ata lakur Efrathla, na an Bethlelehem.”

⁸ Sakatə Yakub wutə maɗashilər Yusuf, antə tsa yu ɗa abbər, “Kəga wa ngəni ri?”

⁹ Antə Yusuf pəla aka baba'ni, “Da an maɗankyar natə Hyel hamta ali azi ni.” Antə Yakub pəla, “Səntə ɗa ali usa, kəi vədza ala ɗa barka.”

¹⁰ Tsuwa akwa saka ngəni nca Yakub abaka sha kamnyar olkur, tə tsa aɗi ana mzhi wulɓəla su karara kəra wa. Apani antə Yusuf ku fatə maɗashilərni, ka səntə ɗa adzə ni. Antə Yusuf ku vədzə mnyari ala ɗa, ka fəfahə ɗa.

¹¹ Antə Yakub pəla aka Yusuf, “I aɗi mbərsa abbər I ata jaktə wutə kəma gə wa, amma nggədza kulini Hyel ku hir ali tə I ku wutə nga, har kəga maɗankyarər nga tsuwa.”

¹² Antə Yusuf famta ɗa kazhar humba Yakub ka zuzuri ka dləri kəmari ata di.

¹³ Antə Yusuf fatə ɗa japu, Ifrayim akwa tsi mazəmari təbwar matsəkara Yakub, ka Manasse akwa tsi matsəkarari təbwar mazəma Yakub, ka səntə ɗa kudzəhə ka Yakub.

¹⁴ Amma Yakub ndəraɓəla tsiyari ka kadləɓəla, ka vəngkər tsi mazəmari ata kəra Ifrayim wala tə tsa an ntsahari, ka tsi matsəkarari ata kəra Manasse, wala tə Manasse ni an yarakəma.

¹⁵ Antə tsa vədzə barka aka Yusuf ka pəla, “Ka Hyel natə kəkayeri ar nga natə Ibrahim ka Ishaku ana vəngkər səli alari, Hyel na pwar ra akwa shanga ndzəndziyirna har ka sənta aka vir na ashina,

¹⁶ ka mdərthlentərhyel na msərantə ra akwa shanga ɗimikur tə mdə ɗəmha ali, vədza barka aka maɗankyar ngəni. Ka mdə kəga ɗa ka thləmi, ka tsuwa thləma kəkayeri arna Ibrahim ka Ishaku. Ndzi ka da hara hang, ka hara dlama dlama akwa duniya.”

¹⁷ Sakatə Yusuf wutə baba'ni akwa vəngkər tsi mazəmari ata kəra Ifrayim, aɗi kəskərari wa. Antə tsa tamtə tsiya baba'ni, ka ndəkərəmta kazhar kəra Ifrayim, ka mwanta ata kəra Manasse.

¹⁸ Yusuf pəla aka baba'ni, “Baba, aɗi apani wa! Ai ngəni an yarakəma ni. Antə vəngkər tsi mazəma ga ata kərari.”

¹⁹ Amma baba'ni ku nggəlari, ka pəla, “I asəndə ɓzərna, I asənda. Tsa ma tsa ata ndzi dur, tsa ata ndzi dur na ola. Amma wala apani ɓzərma'ni na ntsahərni ata təramta ni ka olkur, tsuwa mjir nyarmbwarni ata sə ndzi durayeri na ol'ola.”

²⁰ Antə Yakub ku vədzə barka ala ɗa tsu vir nda akwa pəla, “Ka thləma giri antə mjir Israila ata vədzə barka abbər, ‘Ka Hyel hara ka gə ndzi tsu apa Ifrayim ka Manasse.’ ” Apani antə Yakub ku vəi Ifrayim kəmata Manasse.

²¹ Antə Yakub pəla aka Yusuf, “Nggədza kulini sakar mtərna abaka hara, amma Hyel ata ndzi ata vəi duku ka ga, tsuwa tsa ata jaktə ngka ka ga akwa tsəɗiyir kəkayeri ar nga.

²² Tsuwa I ata jakəngkər ala gə bwa laga pal ta ar maɗama' ngə ni. I ata na gə bwar Shekem natə I dlutsa akəla mjir Amor akwa mpa tə yeru hara ka katsakar kəga lali ni.”