Baɗitari 42 - KAKAƊU NA ƁƊAKKARKARA

Maɗama' Yusuf Ku Ra Masə Susəma Ahar Masar

¹ Sakatə Yakub ku nggata abbər mthli aɗi akwa Masar, antə tsa pəla aka maɗashilərni, “Kamnyar mi tə giri andzəndzi akwa wuldzi daci nə ri?

² I nggata abbər mthli aɗi ahar Masar. Ləghəi giri, ka giri ra mastsa ala mburu, ta shanga mburu asə mtə kamnyar mi.”

³ Antə maɗada' Yusuf na ol'ola kuma ni ku təra ka ləghəi ahar Masar kamnyar masa mthli ni.

⁴ Amma Yakub aɗi hir ka Benjamin na ɓzərma Yusuf ni nu ɗa wa, kamnyar thlivər abbər nuhum su laga asə wutə ni.

⁵ Antə maɗashilər Yakub ni ku mzhitə Masar, ata kəma duku kəga mji damwa, kamnyar masə mthli, kamnyar tə har mi ni ku mzhitə tsəɗi Kanana.

⁶ Tsuwa təng tə Yusuf an gwamna ata kəra shanga Masar, tsuwa tsa an ata kəra ɗəl mthli, to adzə ni antə maɗada'ni ni mwari. Antə da zuzuri akəmari ka kəma ɗa ata di.

⁷ Təkəma təng Yusuf nggaɓəla abbər da maɗada'ni, amma tsa namta apa tsa aɗi səndə ɗa wa, ka gari ala ɗa ka mpa, akwa pəla, “Giri thlata ama ri?” Anda da shinau alari abbər, “Yeru thlata akwa tsəɗi Kanana, kamnyar masə susəma.”

⁸ Wala tə Yusuf ku nggaɓəla abbər da maɗa'da'ni, arɗa da aɗi nggaɓəla ni wa.

⁹ Antə Yusuf ɗangtə suniyayeri arni tə tsa hara ata kəra ɗa akwa məvayeri na təramta. Antə tsa pəla ala ɗa, “Giri an mjir wul ashira tsəɗi, antə giri si kamnyar wul ashira tsəɗi ni.”

¹⁰ Amma da pəla, “Awa, mdərkəi wa. Yeru si kamnyar masə susəma.

¹¹ Shanga yeru maɗa' mdə duku, tsuwa yeru ka jirkur, yeru aɗi mjir wul ashira tsəɗi wa!”

¹² Amma Yusuf ndzangkir akwa pəla, “I, giri mjir wul ashira tsəɗi ja! Giri si kamnyar wulɓəla vəi kula dunawakur yeru.”

¹³ Antə da pəla, “Mdərkəi, yeru an mji kəga maɗada ɗa kumnya suɗa, tsuwa shanga yeru maɗa' mdə duku, na ka ndzi akwa tsəɗi Kanana. Ɓzərda' yeru na gajir yeru tsu avi ata kəma duku ka baba' yeru, tsuwa pal akwa nca yeru aɗi ka mpika kəra wa.”

¹⁴ Amma Yusuf ndzangkir akwa pəla ala ɗa abbər, “Tsu apatə I ku pəla diya, giri an mjir wul ashira tsəɗi!

¹⁵ Nggədza laku tə I ata ngkərtə jirkurər giri akwa. I ku kahyel ka dəkəl kuthlikur abbər giri aɗi ata ləɓəla akwa Masar wa, tar ma giri ku səntə gajir giri ni azi.

¹⁶ Thlentə giri mdə pal akwa nca giri, ka tsa ra səntə ɓzərma' giri ni. Mambila giri ata ndzi tsu azi akwa mbwar pərsəna. Apani antə mda ata nggaɓəla ndərər giri, wala giri ka jirkur, wala giri aɗi ka jirkur wa. Ma apani tsu wa, I kahyel ka dəkəl kuthlikur abbər jiri giri an mjir wul ashira tsəɗi.”

¹⁷ Antə tsa hartə shanga ɗa akwa bwar pərsəna har vir makər.

¹⁸ Akwa vir na makərkur, antə Yusuf pəla ala ɗa, “Nggədza giri su tə giri ata harari, ka giri ndzi tsu ka mpika, kamnyar I ana thlivər Hyel.

¹⁹ Ma giri an ka jirkur, ndzi ka pal akwa nca giri ndzəndzi azi akwa pərsəna ni, ka mambila giri mwantə mthli ni aka mjir giri na ka mi ni.

²⁰ Amma ka giri sənta ali ɓzərda' giri na gajir giri ni, antə I ata mbərsatə giri. Antə apani mda aɗi ata tsi giri wa.” Antə da ku hara apani.

²¹ Antə da pəla aka nvwa ɗa, “Jiri, mburu ku hara su na ɗimi aka ɓzərda' mburu, tə mburu ku wutə bwani tə tsa akwa, sakatə tsa akwa kiɗə kəra mburu abbər ka mburu dlar ni, amma mburu aɗi psi thləm alari wa ni. An su na hara tə bwani ngəni si ata kəra mburu ni.”

²² Antə Ruben pəla, “Ai, I ku pəla ala giri abbər giri aɗiya tsəkwar ɓzərni wa, amma giri aɗi hir nggatə ra wa. Nggədza kulini ja mburu akwa dlu watsəɓər tsi ni ni.”

²³ Tsuwa da aɗi sənda abbər Yusuf akwa nggatə su tə da akwa pəlari ni wa, kamnyar hwatu mda aɗi na akwa ngkərɓəla ndərayeri akwa daɓwa ɗa.

²⁴ Antə Yusuf ku shinamta kəmari kazhar ɗa ka ləɓəla ləkwa tuwa ka shimwi. Aghəla nda antə tsa ngka ka gari ala ɗa. Antə tsa kəɓəla Simeyon akwa nca ɗa, ka mbwi ni tsu ata nca ɗa.

Maɗama' Yusuf Ku Ngka Ahar Kanana

²⁵ Antə Yusuf tsawa abbər ka mdə nghyantə bufayeri arɗa ka mthli, ka mdə jaktə vu kwabar waskəi akwa bufərni, tsuwa ka mdə na ala ɗa susəma ta da ata sə səmari ata laku. Antə mdə ku hara ala ɗa tsu apa ni.

²⁶ Antə da putə bufər mthli ni ata kwarayeri arɗa ka təra.

²⁷ Sakatə pal akwa nca ɗa ku mpəli kələrni kamnyar na thladli aka kwararni akwa vəi fəliyir ɗa, təng tsa wutə kwabarni akwa mnya bufərni.

²⁸ Antə tsa pəla aka maɗa'ma'ni abbər, “Mdə ku jaktə pu ali kwabarna! Nggədza kwaba ni akwa mnya bufərna!” Antə hyala ɗa nthlə ɗa, tə da shinardzi akwa wul nvwa ɗa ka dza ɗa akwa kədza, ka pəla, “Ngəni man su tə Hyel akwa hara ala mburu nə ri?”

²⁹ Sakatə da ku si adzə baba' ɗa Yakub akwa tsəɗi Kanana, antə da jikata alari shanga su na wutə ɗa, abbər,

³⁰ “Mdə na mthlakər tsəɗi ni ku gari ala yeru ka mpa, ka namtə yeru apa yeru mjir wul ashira tsəɗiyir ɗa.

³¹ Amma yeru pəla alari, ‘Yeru an mji na ka jirkur, yeru aɗi mjir wul ashira tsəɗi wa.

³² Yeru an mji kəga maɗada, maɗashili kumnya suɗa akəla baba' yeru. Pal akwa nca yeru aɗi ka mpika kəra wa, tsuwa gajir yeru avi adzə baba' yeru akwa tsəɗi Kanana.’

³³ Antə mdə ngəni, watau gwamnar tsəɗi ni, pəla ala yeru, ‘To, nggədza laku tə I ata nggaɓəla jirkurər giri, zhar giri mdə pal akwa nca giri adzə ra azi, ka giri mwantə mthli ni aka mjir kutakəyir giri na ka mi avi ni, mwari giri.

³⁴ Ka giri sənta ali gajir giri ni, antə apani I ata sənda abbər giri aɗi mjir wul ashira tsəɗi wa, amma mji na ka jirkur. Antə I ata hamta ala giri ɓzərma' giri, antə giri ata ləkəma ka fəli akwa tsəɗi ni.’ ”

³⁵ Sakatə da akwa puɓəla mthli na akwa bufayeri arɗa, təng waskəi wutə thləvur kwabarni akwa bufərni. Sakatə da kəga baba ɗa wutə pirtayeri ni, təng da thlivəra.

³⁶ Antə baba' ɗa Yakub pəla ala ɗa, “Giri an akwa hara kəi ni ka maɗa'na ni. Yusuf aɗi kəra wa, tsuwa Simeyon aɗi wa, antə kulini giri akwa bara kətə Benjamin. Shanga su ngəni ata kəri diya!”

³⁷ Antə Ruben pəla aka baba'ni, “Ma I aɗi ngka ka Benjamin wa, nggədza maɗashilərna suɗə ni kara tsi ɗa. Ar ngə zhar ni akwa tsi, I ata ngka ka tsa ala ga.”

³⁸ Amma Yakub ku pəla, “Ɓzərna aɗi ata nu giri wa, kamnyar ɓzərma'ni aɗi kəra wa, təng tsa shini an mbila. Ma su laga ku wutə ni ata laku akwa lənggur giri ni, to, giri ata hara ka shishi mwapu arna ngəni ni ləkwa kula ka ɗəffə ɓzəɓza.”