Baɗitari 35 - KAKAƊU NA ƁƊAKKARKARA

Hyel Ku Vədzə Barka Aka Yakub Ahar Bethlel

¹ Antə Hyel pəla aka Yakub abbər, “Thlatə kara ndləɓəla ahar Bethlel, ka gə ndzəndzi anda. Ka gə həntə bagaɗi aka Hyel na ncantə kərni ala gə sakatə ga akwa hwi ta ɓzərma' nga Isuwa ni.”

² Antə Yakub pəla aka mjir kutakəyirni ka aka shanga mji na adzə ni abbər, “Ka waskəi ra pumta haptayeri na akəlari na aɗi ar tsəɗi ngəni wa ni! Ka giri kəcimta kər giri, ka giri pali ləptər giri.

³ Aghəla nda, ka giri si ka mburu təra ləmta ahar Bethlel, akwa vəi tə I ata həntə bagaɗi aka Hyel na dlar ra sakatə I akwa bwani, Hyel na ndzi ata vəi duku ka iya akwa shanga vəi tə I mwari ata.”

⁴ Antə da ku səntə shanga haptayeri ar tsəɗi damwa na akəla ɗa, kəga surthləm na akwa thləma ɗa, ka hamta aka Yakub. Antə Yakub harəmta ɗa akira nfur ok na kudzəhə ka Shekem.

⁵ Sakatə Yakub ka maɗa'ni akwa ləkəma ka lənggur ɗa, antə Hyel hara tə thlivər laga ku si ata kəra kauyayeri na kalaktə ɗa, tə wala mdə duku aɗi na mzhi nu ghəla maɗa' Yakub ni ka mpa wa.

⁶ Antə Yakub ka shanga mjirni ku mzhitə Luz, natə tsa an Bethlel ni, na akwa tsəɗi Kanana.

⁷ Antə tsa həntə bagaɗi anda, ka kəga thləma vəi nda El Bethlel, kamnyar anda antə Hyel ncantə kərni alari sakatə tsa akwa hwi ta ɓzərma'ni.

⁸ Azi antə Debora na mwala kəl ɓzər ar Rubeka ku mti, antə mdə harəmta ni akira nfur ok aghəighəya Bethlel. Kamnyar ngəni antə mdə ku kəga thləma nfu ni “Nfur ok ar Tuwa.”

⁹ Aghəla tə Yakub ku ngka ahar Paddan Aram, antə Hyel jaktə ncantə kərni alari, ka vədza alari barka.

¹⁰ Antə Hyel pəla alari, “Thləma ga an Yakub, amma baɗita ashina mda aɗi ata jaktə kəga thləma ga Yakub wa, thləma ga ata ndzi Israila.” Antə mdə ku ləkəma ka kəga thləmari Israila.

¹¹ Antə Hyel pəla alari, “I an Hyel na ka Duna ta Shang. Ka gə ya, ka giri yatədzi hang. Ga ata ndzi tsəɗi na ola, har ka giri ndzi tsəɗiyayeri hang, tsuwa kuthlyayeri ata sə səɓəla akwa nyarmbwar nga.

¹² Tsəɗi natə I hamta aka Ibrahim ka Ishaku ni, I ata hamtari ala ga, kəga kəkayeri ar nga na aghəla ga.”

¹³ Antə Hyel ku təra ləmtazi kazhar ni tsu akwa vəi tə tsa hara gari alari ni.

¹⁴ Antə Yakub ku nci shanggam akwa vəi tə Hyel gari ka tsa ata ni, ka ɗangkər saɗakar sur sa, ka ɗangkər mal zaitun.

¹⁵ Antə Yakub vətə thləm aka vəi tə Hyel gari alari ata ni Bethlel.

Rahila Ku Təri Ata Kulahu Akwa Sakar Yar Benjamin

¹⁶ Sakatə Yakub ka mjir kutakəyirni ku zhar Bethlel, antə da ləkəma ka lənggur ɗa təbwar Efrathla. Sakatə da tsu ciju ta Efrathla, antə kutərya ku ngkəi Rahila, tsuwa tsa ku ɗar bwani akwa ya ni.

¹⁷ Sakatə tsa akwa ɗar bwani akwa kutərya ni, antə mwala kathla ni pəla alari abbər, “Ga aɗiya thlivər wa, kamnyar ga ku jaktə wutə ɓzər sal.”

¹⁸ Amma sakatə mpikari akwa ləɓəla, antə tsa vətə thləm aka ɓzərni ni abbər Benoni. Amma baba' ɓzər ni vəta alari Benjamin.

¹⁹ Sakatə Rahila ku mti antə mdə harəmta ni adzə mnya laku na ata mwari ahar Efrathla, watau Bethlelehem.

²⁰ Antə Yakub ku nci shanggam ata kəra kulərni. Ngəni an shanggam ar ɗangtə vəi kulər Rahila, na anda har ba ashina.

²¹ Antə Israila ku ləkəma ka lənggurni, ka sə nci tentərni abwanda hən na nal ar Eder.

²² Akwa sakatə Israila ndzi akwa tsəɗi nda, antə Ruben ləmbwa adzə Bilha ka tsa. Bilha an pal akwa nca mwanki tə baba'ni si kəgari ni. Tsuwa Israila ku nggata ata kər. Maɗashilər Yakub an kumnya suɗa.

Maɗashilər Yakub

²³ Maɗashilər Leya an Ruben na yarakəmar Yakub, ka Simeyon, ka Lawi, ka Yahuda, ka Issakar ka Zebulun.

²⁴ Maɗashilər Rahila tsuwa an Yusuf ka Benjamin.

²⁵ Maɗashilər Bilha na ngkwarmbwar Rahila an, Dan ka Naftali.

²⁶ Maɗashilər Zilpa na ngkwarmbwar Leya an, Gad ka Asher. Nayeri ni an maɗashilər Yakub tə mdə yaɓəla alari ahar Paddan Aram.

Mtər Ishaku

²⁷ Antə Yakub ku mwari adzə baba'ni Ishaku ahar Mamre, kudzəhə ka Kiriyath Arba, watau Hebron, vəi tə Ibrahim ka Ishaku ku ɗar ndzi akwa waci.

²⁸ Hangkur məva Ishaku aru pal ka nciskumari.

²⁹ Antə Ishaku ku mti ka mwari adzə mjirni na mtə kəmata tsa. Tsa mtə akwa sakatə tsa ku hara məva hang hala na kalkalari. Antə maɗashilərni Isuwa ka Yakub ku harəmta ni.