Baɗitari 33 - KAKAƊU NA ƁƊAKKARKARA

Yakub Ku Kəɓa Ka Isuwa

¹ Sakatə Yakub haptə ncari, antə tsa wutə Isuwa akwa si ka mjirni aru nfwar. Antə tsa hamta maɗankyar ni waskəi aka mama'ni, natə da an Leya, ka Rahila, ka mwanki mafa na suɗə ni.

² Tsa pwi mwanki mafa ni ka maɗa' ɗa akəma, kambəla Leya ka maɗa'ni, kambəla Rahila, ka Yusuf na ɓzərni aghəl ta shang.

³ Antə arni, tsa təra kəmata da, akwa mwa ka zuzuri ka dləri kəmari ata di ka murfa sakatə tsa hara kudzəhə ka ɓzərma'ni.

⁴ Antə Isuwa tsəkwar hwi ka mwari adzə Yakub, ka fəfahə ni, ka bartə wulyari, ka vədzə mnyari alari, antə japwa ɗa ləkwa tuwa ka shimwi.

⁵ Sakatə Isuwa haptə ncari ka wutə mwanki kəga maɗankyar ni, antə tsa pəla, “Ngəni kəga wa an adzə ngə nə ri?” Antə Yakub pəla, “Da an maɗankyar natə Hyel akwa kuta hirkurərni hamta ali, ka barkar nga.”

⁶ Antə mwanki mafa ni shahədzi kəga maɗa' ɗa, ka zuzuri ka kəma ɗa ata di akəma Isuwa.

⁷ Antə Leya ka maɗa'ni tsuwa ku shahədzi ka zuzuri ka kəma ɗa ata di akəmari. Akwa tsikərari antə Yusuf ka Rahila ku si ka zuzuri ka kəma ɗa ata di tsuwa.

⁸ Aghəla nda antə Isuwa pəla, “Mji na hang tə yeru kəɓa ka da ata laku ni tsuwa, man akwa ɗəffa ɗa ri?” Antə Yakub pəla alari, “Kamnyar I akwa bara kəi wutə mdəkur ata nca ga, mdərkəi.”

⁹ Antə Isuwa pəla, “Awa, I ka su hang, ɓzərma'na! Kəsi sur nga.”

¹⁰ Amma Yakub pəla alari, “Awa! I akwa kiɗa abbər ma I an wutə mdəkur ata nca ga, ka gə dlu cautərna ni akwa tsi. Kamnyar jiri, wutər kəma ga ni ndzi ali apa wutər kəma Hyel, təng tə ga ku dlu ra ka kucali ni.

¹¹ Antə usa, dlu cauta natə I sənta ala gə ni, kamnyar Hyel ku vədza ali barka, ka na ali shanga su tə I akwa turari.” Yakub ku ntsəngkər alari abbər ka tsa dluwa, antə Isuwa ku dluwa.

¹² Antə Isuwa pəla, “To, kulini mwa psi laku ka mwa təra, arna I ata pwa akəma, ka giri nu ra.”

¹³ Amma Yakub pəla, “Mdərkəi, ai ga asənda abbər maɗankyar ni kula duna. Tsuwa I ka ciɓayeri ar təma kəga kwi, kəga thla na ka maɗa' akwa sa uwa. Ma mdə ndzangkir aka kədlə ɗa abbər ka da mzhita akwa kuta pci pal, shanga mwaɓiyayeri ni ata kurəmtadzi.

¹⁴ Mdərkəi, ga ata mzhi təramta, kəi nu ghəla ga ka hangkal, kalkal apatə mwaɓiyayeri na akəmi ni, ka maɗankyar ni ata mzhi mwa, har kəi ra wutə nga mdərkəi, akwa ahar Seyir.”

¹⁵ Antə Isuwa pəla, “To, ndzi kəi zhar bwadukwa mjirna ni adzə nga.” Antə Yakub shinau ka pəla, “Ga aɗiya damitədzi abbər tar ka gə hara su apani wa. Təng tə I ku wutə mdəkur ata nca gə ni, ai shanga su kurkurari.”

¹⁶ Tsu vir nda antə Isuwa ləkwa lakur ngka avi ahar Seyir.

¹⁷ Amma ar Yakub tsa təra mwari ahar Sukkoth, ka latə kəyirni, ka namtə səvayeri aka thlarni. Apani antə mdə ku vətə thləm aka vəi nda Sukkoth.

¹⁸ Antə Yakub ku mzhitə bərni Shekem na akwa tsəɗi Kanana ni akwa lapiyakur, aghəla thlatərni ahar Paddan Aram. Antə tsa nci tentərni akwa bərni ni.

¹⁹ Antə tsa mastə vəi laga akəla maɗa' Hamor, na baba' Shekem, ata kəra liyar adzərfa aru pal, ka nci tentərni ata vəi ni.

²⁰ Antə tsa ku həntə bagaɗi anda, ka kəga thləma vəi ni El Elohe Israila, watau Hyel an Hyelər mjir Israila.