Baɗitari 15 - KAKAƊU NA ƁƊAKKARKARA

Alkawal Tə Hyel Hara Aka Ibram

¹ Aghəla nda antə MTHLAKU ku gari aka Ibram akwa wulsu abbər, “Ibram ga aɗiya thlivər wa, I an partauwur nga, watsəɓər nga ata ndzi hang ka duna.”

² Amma Ibram pəla, “MTHLAKU na ka Duna ta Shang, man su tə ga ata na ali ri? Kamnyar ba kulini I aɗi ka ɓzər wa, tsuwa mdər fa kifər kutakəyirna an Eliyezer na mdər Damaska!”

³ Tsuwa Ibram pəla, “Nggədza ga aɗi na ali nəɓwa wa, antə mafa tə mdə yaɓəla akwa kəyirna an ata sə fa kifərna.”

⁴ Antə MTHLAKU ku gari alari ka pəla, “Aɗi mdə ngəni an ata fa kifər ngə wa, amma ɓzər kuta ga an ata fa kifər nga.”

⁵ Antə MTHLAKU ləɓəla ka tsa ka pəla alari, “Haptə nca ga amtazi, kara jikatə sasəlkayeri ni, ma har ga ata mzhi jikatə ɗa. Apani antə hangkur kəkayeri ar nga ata sə ndzi.”

⁶ Ibram ku hamta jiri aka MTHLAKU, antə MTHLAKU wuta abbər hamta jirərni ni ku namtə ni kalkal akəma Hyel.

⁷ Antə tsa pəla alari, “I an MTHLAKU na kəɓəla nga akwa Ur ar mjir Kaldiya, kamnyar kəi na ala gə tsəɗi ngəni ka gə ndzi mthlakari.”

⁸ Amma Ibram pəla, “MTHLAKU na ka Duna ta Shang, apa madi tə I ata sənda abbər I ata ndzi mthlakari ri?”

⁹ Antə Hyel pəla alari, “Səntə ali mbəkəl thla pal na ka məvari makər, ka malgum na ka məvari pal, ka gam pal na ka məvari makər. Tsuwa ka gə səntə bukəl pal, ka ɓzər katapar pal.”

¹⁰ Antə tsa səntə alari shanga su nayeri ni, ka thləthlau kəlara pal ata reta, ka vəi kəlara bwa pal akwa wuldzi ka nvwani, amma tsa aɗi thləthlau ɗikayeri ni ata reta wa.

¹¹ Tsuwa sakatə ɗikayeri na ana səm kum ku səghəi ata kəra mshiyir suayeri ni, Ibram ku kədləmta ɗa.

¹² Sakatə pci abaka təri, antə henər mta ku fatə Ibram, antə kuthlu laga na pələku na ata thlivərantə mda ku si ata kərari.

¹³ Antə MTHLAKU pəla aka Ibram, “Kara sənda abbər jiri, kəkayeri ar nga ata sə ra ndzi mətəpi akwa tsəɗi na aɗi arɗa wa. Antə da ata ndzi mafa anda, ka mdə hara ala ɗa bwani har məva aru nfwar.

¹⁴ Amma I ata hara shariya aka mji na pu ɗa akwa mafakur ni. Tsuwa ma sakatə da ata zhar tsəɗi nda, da ata səɓəla ka gəna hang.

¹⁵ Ar nga, ga ata mwari adzə kəkayeri ar nga akwa msərakur, ga ata sə mta akwa sakatə ga ku hali swaiswai, ka mdə harəmta nga.

¹⁶ Akwa zaman na nfwarkur ar kəkayeri ar nga, antə da ata ngka azi, kamnyar bikər mjir Amor aɗi kuri nghyaɓəladzi katagu wa.”

¹⁷ Sakatə pci ku təri, tə vəi ku hara kuthlu, antə Ibram wutə hahəi laga nghyinghyari ka u'ur vina, ka zafu laga akwa təramta akwa daɓwa mwaɓiyayeri tə mdə thləthlamta ni.

¹⁸ Tsu vir nda antə MTHLAKU hara alkawal aka Ibram ka pəla, “Aka kəkayeri ar nga antə I akwa hamta tsəɗi ngəni, baɗitə ka Thlyaghar Masar har ka vədza ka thlyagha na ola ar Yufiretis.”

¹⁹ “Watau tsəɗiyir mjir Keni, ka mjir Kenizzi, ka mjir Kadmoni,

²⁰ ka mjir Hitti, ka mjir Perizzi, ka mjir Refa,

²¹ ka mjir Amor, ka mjir Kanana, ka mjir Girgashi, ka mjir Yebusi.”