Baɗitari 13 - KAKAƊU NA ƁƊAKKARKARA

Ibram Ku Ndəkəmtadzi Ka Lot

¹ Antə Ibram ku zhar tsəɗi Masar ka mwari ahar Negev, tsa, ka mwalarni, ka Lot, ka shanga su tə tsa kəgari.

² Akwa saka ndaga Ibram ka gəna swaiswai. Tsa ka mwaɓiyayeri ar kəi, ka adzərfa, ka dinar.

³ Thlatərni ahar Negev ni antə tsa ləkəma ka lənggu ni har ka mwari ahar Bethlel, akwa vəi tə tsa baɗitə nci tentərni ata, akwa daɓwa Bethlel ka Ai,

⁴ akwa vəi tə tsa baɗitə həntə bagaɗi ata. Anda antə Ibram ku kəga thləma MTHLAKU akwa vəngkər səli.

⁵ Antə Lot na təra ata kəma duku ka Ibram ni, tsa ma tsa ka bəri təma, ka kwi, ka thla, kəga mjir kutakəyirni ka mafayeri arni.

⁶ Apani bəbalayeri ar ɓəla na aɗi ni amzhi ɗa japu wa, kamnyar mwaɓiyayeri arɗa an hang ka duna, tə da amzhi ndzi japu ata kəma duku wa.

⁷ Apani antə beɗi ku wutədzi akwa daɓwa mjir ɓəla mwaɓiyir Ibram ka mjir ɓəla mwaɓiyir Lot. Tsuwa akwa saka na ndaga mjir Kanana ka mjir Ferizzi tsu anda akwa tsəɗi ni.

⁸ Antə Ibram pəla aka Lot, “Aɗi kalkal ka beɗi wutədzi akwa daɓwa mwa wa, wala akwa daɓwa mjir ɓəlar nga ka mjir ɓəlar na wa, kamnyar mwa mji ka ɓzərma'ni.

⁹ Ai nggədza tsəɗi ni shang akəma ga! Mwa ndəkəi vəi ni, ka gə kətə bwar nga ka gə zhar ali bwarna. Ma ga ata kətə bwa matsəkar, I ata kətə bwa mazəm, tsuwa ma ga ata kətə bwa mazəm, I ata kətə bwa matsəkar.”

¹⁰ Antə Lot haptə ncari, ka wuta abbər shanga bəbal kuta Mular Jodan har ka mwanta abwar Zowar ni ka yimi hang, apa Gadinar Eden tə MTHLAKU hara ni, tsu apa tsəɗi Masar kasha. Su ngəni hara ni akəmata MTHLAKU ashamta bərni Sodom ka Gomora.

¹¹ Antə Lot carɓəla shanga bəbalər Mular Jodan ni aka kərari. Antə Lot ləkwa laku akwa mwari təbwar raghəi. Apani antə da ku ndəkəmtadzi.

¹² Apani Ibram ku ndzəndzi akwa tsəɗi Kanana, antə Lot ku ra ndzəndzi akwa nca bərniyayeri na akwa kuta bəbal na akwa mular ni, ka nci tentərni kudzəhə ka Sodom.

¹³ Tsuwa akwa saka ndaga mjir Sodom ni kəmanggar, da ana hara biku swaiswai aka MTHLAKU.

¹⁴ Aghəla tə Ibram ku ndəkəmtadzi ka Lot, antə MTHLAKU pəla aka Ibram abbər, “Akwa vəi tə ga ata ni, haptə nca ga kara wul təbwar yala ka təbwar anəm, ka təbwar raghəi ka təbwar ramta.

¹⁵ Kamnyar shanga tsəɗi tə gə wutə ni, I ata na ala ga, ka tsa ndzi ar nga kəga kəkayeri ar nga har ba saka madi.

¹⁶ I ata namtə kəkayeri ar nga ka da ndzi hang apa bərbər ata di, antə har ma mda aɗi na ata mzhi jikatə bərbər, to tsa ata mzhi jikatə kəkayeri ar nga.

¹⁷ Thlata, kara dlarhə saɓəlkur ka baukur ar tsəɗi ni, kamnyar I ata hamta ni ala ga.”

¹⁸ Antə apani Ibram ku thlatə ka ɗuwa, kara ndzəndzi adzə kuɓər nfur ok ar Mamre akwa Hebron. Antə tsa ku həntə bagaɗi anda aka MTHLAKU.