Ayuba 4 - KAKAƊU NA ƁƊAKKARKARA

Amsa Na Ntangkəma Ar Elifaz Aka Ayuba

¹ Antə Elifaz na mdər Teman pəla abbər,

² “Ayuba, ma mdə pəla mda ata gari ɗəffa ga ata ɓza, amma usa, tar gə mbwi ɗəffa ga, kəi gari raka.

³ Jiri ga ku thlipa aka mji hang, ka dunautə mji na mtathlaku.

⁴ Sauri tə gə hamta ku dunautə mji na akwa ndla, ka dunautə mji na lələɓu tə da ku ndzi ɓəɓal.

⁵ Amma kulini tə bwani ku si ata kəra ga, ga amzhi mbwi ɗəffa gə wa, ma su ku tsəkwar nga, təkəma dza ga ata mta.

⁶ Thlivər Hyel tə gə kəgari ni an su tə ga ana mbərsa kəgari, jirkur tə gə kəgari ni an su tə ga ana vəkər kari.

⁷ Kulini dzam bu wala ga! Ga ata mzhi ɗangtə mdə na kula biku na mtə ya, wala mdə na pwa na ləkwa asar?

⁸ Su tə I sənda an abbər mji na ana nthlə fakər ɗimikur, ka ɓucə hwulfər ɗimikur ana nthləi ɗimikur.

⁹ Hyel ana shamta ɗa ka shambar mnyari ka mbamta ɗa ka ɗəffə bwarbwarkurərni.

¹⁰ Mji na ɗimi ana haptə kuraka ɗa apa tsəngi, amma Hyel ana hartə mnya ɗa ka ɓəgələmta thlira ɗa.

¹¹ Tsu apatə tsəngiyayeri na ka duna ana mtə kamnyar tur su tə ka da səma, antə da ata mtə ka mi, ka maɗa' ɗa titiləmtadzi.

¹² “Vir laga mdə laga si ka nggwar həlwa ali ndər, ka bwani antə I nggaɓəla su tə tsa akwa cicuhwari ni.

¹³ Labar ni si ali apa wulsu aviri, sakatə mji akwa henər mta.

¹⁴ Thlivər ku ngkəi ra, antə I ku yakata, tə shanga dzi ku ləkwa kədza kamnyar thlivəra.

¹⁵ Təng shambar laga si ka təramta ata kəri, antə shishir dzi thlatə dukduku.

¹⁶ Təng I wutə shanggura su laga athləthlatə tauwa, antə I wul ka wula amma I aɗi nggaɓəla suari wa. Təng səri, aghəla nda antə I nggatə kuraku laga akwa pəla,

¹⁷ ‘Mdə ndzang aɗi na ata mzhi ndzi kəcəkəcari akəma Hyel ya? Mda aɗi na ata mzhi ndzi kula biku akəma Mdə na həntə ni ya?

¹⁸ Ma Hyel aɗi ana mbərsa wala ka mjirthlentərni wa, tə tsa ana wutə vəi sha arɗa,

¹⁹ to apa madi antə tsa ata mzhi mbərsa ka mji natə tsa nam ɗa ka həi ri su na hwatu da thlata akwa bərbər, natə mda ata mzhi dlidlirəmtari apa pərpər?

²⁰ Mdə tə mda ata mzhi ya ni ata balti, ka tsa mtə kula səndərni akwabə pci atəri, ka sha ba saka madi ka mji fwari ata kərari.

²¹ Ma sakatə mdə ku ntsuɓəla səwur mpikə ni kazhar ni, tsa ata mta, ka zhar duniya ni kula ɗəɗukur.’ ”