Ayuba 3 - KAKAƊU NA ƁƊAKKARKARA

Gari Na Ntangkəma Ar Ayuba

¹ Aghəla tə pazhayeri ar Ayuba ku ndzəndzi kula gari mnyar sati pal, antə Ayuba kəlar mnyar ka shuwumta vir tə mdə yaɓəla ni!

Ayuba

² Antə Ayuba pəla abbər,

³ “Ai Hyel, kuji ga aɗi hara vir ngənda wa! Itəm aka sakatə mdə kəl hurərna! Vir tə mdə pəla abbər, ‘Mdə ku kətə hurər ɓzər sal’ ni.

⁴ Fwari ata kəra vir ndaga ka gə hartə ni ka kuthlu, ta tsa ajaktə wutə parakəu.

⁵ Zhar ka kuthlu na pələku hartə ni, zhar ka dlamba hartə ni, ka ngkatə ta pci ahaɓəla kərari vir nda.

⁶ Kəɓəla vir nda swakti kazhar kuta məva, mda aɗiya jaktə vu ni akwa jika wa, wala jikau thliya nda akwa məva wa.

⁷ Jiri, kuji mda aɗi ya mdə vir nda wa, kuji mda aɗi hara kucali vir nda wa.

⁸ Ka mji na masəkur shuwumta su, shuwumta vir nda, mji na masəkur ɗiɓəla Leviyathlan akwa manda.

⁹ Kuji pci aɗiya səɓəla vir nda wa, ka vir nda mwaɓə ka pci səɓəla, amma pci aɗi ata səɓəla wa,

¹⁰ kamnyar vir nda aɗi mzhi ngkatə ta mda ya ra wa, kamnyar tsa an hara tə I akwa ɗar bwani ngəni.

¹¹ “Kuji ma I an mta akwa kuta mama'na, wala ma I an mta təkəma tə I səɓəla akwa kuta.

¹² Kamnyar mə tə mama'na vu ra akwa humbari ri? Kamnyar mə tə tsa hamnya ali uwa ri?

¹³ Kamnyar ma I an mtə sakanda, sakani hangkali pwipwiyari, sakani kulini I akwa heni, sakani I akwa ghərəmtaghəra,

¹⁴ ata kəma duku kəga kuthlyayeri ka kwakunayeri, mji na həntə kəi kuthlikurayeri waci ni.

¹⁵ Sakani I ata vəi duku ka kwakunayeri na ndzi ka gəna waci ni, na nghyantə kəyayeri arɗa ka dinar kəga adzərfa ni.

¹⁶ Ma apani wa sakani I tsu akwa heni, apa ɓzər na səghəi mshi kula wutə parakəu.

¹⁷ Ai kəmanggar aɗi ana hara ɗimikur ba akwa kul wa, anda antə mji na ku ghəri akwa kəthlər ana ghərəmtaghəra.

¹⁸ Wala pərsənayeri ana nggatə msərakur, da aɗi ana nggatə kuraka helmar ɗa kəra wa.

¹⁹ Shanga mji anda, mjir gəna ka mjir tursu, wala mafa msərmsərari akəla mthlakərni.

²⁰ “Kamnyar mə tə Hyel ana zhar mdə ka mpikə ri akwa sa bwani? Kamnyar mə tə tsa ana zhar mdə ka mpika wala ma su mwavər alari nə ri?

²¹ Mji na ana bara mta, amma mta aɗi ata si wa, na ana pakə mta təramta laku tə da ana pakə gəna.

²² Su aɗi na ata namtə ɗəffa ɗa ka da kucali, apa ma da wutə kərɗa akwa kul wa.

²³ Kamnyar mə tə mji ata ndzi ka mpikə ri, ma Hyel ku thlamta abbər da ata ndzi akwa bwani, har tə da səndə su na akəmari wa ni?

²⁴ Kamnyar parang I akwa nggyinggya apa tsan susəmər na, parang I akwa tuwa ka shimwi apa tsan yimər sa arna.

²⁵ Kamnyar suayeri tə I ana thlivərari andər wutə ra, suayeri tə I akwa hwiyari an akwa si ata kəri.

²⁶ I aɗi ka msərakur wa, hangkali aɗi pəpəi wa, I awutə vəi sarar mpika akəla bwani wa.”