Amos 8 - KAKAƊU NA ƁƊAKKARKARA

Amos Ku Wutə Thlambəl Ar Yar Nfwa

¹ Antə MTHLAKU na olta shang ku jaktə ncanta ali su akwa wulsu. Akwa wulsu ni I wutə thlambəl laga na ka yar nfwa ng'hənghari akwa.

² Antə MTHLAKU pəla, “Amos man tə gə wutə nə ri?” Antə I pəla, “Thlambəl ka yar nfwa na ng'hənghari.” Antə MTHLAKU pəla ali, “Apatə yar nfu ni ku mzhi ka mdə səma, antə mjir Israila ku mzhi ka mdə ɗi ɗa, I aɗi ata jaktə shari ɗi ɗa kəra wa.

³ Vir nda hayeri na akwa mbwar vəngkər səli, ata sə shin ka jikatuwa, Mshiyir mji ata sə ndzi hang leɓleɓu akwa kəlara bwa, mda aɗi ata nggatə tsəkuya su kəra wa. I na MTHLAKU na olta shang an pəla.”

Biku Tə Mjir Gəna Ana Hara

⁴ Psi gir thləma giri aka ndər ngəni, giri na ana ntsəntsarəmta mjir tursu, ka kurəmta mjir bwani na akwa tsəɗi ni.

⁵ Giri ana pəla aka nvwa giri, “Nawa antə Kucalər Thliya Bilən ata kura, ka mburu wutə lakur ɗəl mthlir mburu ri? Nawa antə Vir Ghərəmtaghəra ata təramta, ka mburu wutə lakur ɗələmta alkamar mburu ri? Ka mburu fəi mjir masər mburu ka ɗəɗukur, atar namta aunar nggala na ola ka tsa ndzi raka, ka ɓathləɓəla auna na raka ka tsa ndzi ola.

⁶ Mburu ata mzhi ɗələmta alkama na aɗi ɓɗaku wa. Antə mburu ata wutə mdər bwani na amzhi ntəmta təmbələrni wa, wala mdər tursu na amzhi mastə ɓaɓi mwar səl pal wa, ka mburu mastə ni apa mafa.”

⁷ MTHLAKU natə Israila ana nar səli ku kahyel abbər, “Jiri, ba saka madi I aɗi ata fwari ɗimikur giri wa.

⁸ Duniya ata kənggərantədzi kamnyar bikər giri antə shanga mji na akwa tsəɗi ni ata ndzi ka ɗəffə ɓzəɓza. Ɗəffa shanga mji na akwa tsəɗi ni ata thlata, ka mbwa, ka jaktə pwi apa Thlyagha Nayil.

⁹ Vir nda I ata vu ka pci təri ka kərathlər pci antə tsu təpci ni duniya ata hartədzi ka kuthlu. I na MTHLAKU na olta shang an pəla.

¹⁰ I ata shinantə vir kucalayeri ar giri ka da ndzi vir tuwa, kəi shinantə shanga hayeri ar giri ka da ndzi jikatuwar mshi. I ata hara ka kari har giri ndzi dasa, kəi hara ka tsuhurpathla ngkəi kəlara mda. Giri ata sə tuwa apa mdər tuwa ɓzər duku, tsikəra vir ndaga ata ndzi ɗəɗahəu.

¹¹ I na MTHLAKU na olta shang akwa pəla, saka ata sə si tə I ata vu ka məi təri akwa tsəɗiyir giri, aɗi məyir susəm wa, wala thləliyir yimi wa, amma məyir wutə labar ar MTHLAKU.

¹² Da ata sə tətali mwari ka ngka, akwa daɓwa manda ngəni ka ndaga, baɗita akwa raghəi ka mwanta akwa ramta. Da ata sə hwi mwari ka jaktə ngka, akwa bara labar ar MTHLAKU, amma da aɗi ata wutari wa.

¹³ Vir nda maɗangkwi kəga maɗadakwi na dakwi dakwi ata sə thləvamtadzi kamnyar thləli.

¹⁴ Da na ana kahyel ka haptər Samariya, ka pəla, ‘I ku kahyel ka haptər Dan’, wala, I ku kahyel ka haptər Beyersheba, Jili mji apani ata ndla kula jaktə thlata.”