Amos 7 - KAKAƊU NA ƁƊAKKARKARA

Amos Ku Wutə Ntsəkwa Akwa Suni

¹ Nggədza su tə MTHLAKU na olta shang ncanta ali akwa wulsu. I wutə ni akwa nam ntsəkwa dlama dlama, aghəla tə mdə ku thli mthlir kuthli, kalkal ka sakatə kusar akwa jaktə thləla.

² Akwa wulsu ni, I wutə ntsəkwayeri ɓɗəmnya shanga kusar mirakəu na akwa tsəɗi ni, antə I pəla, “MTHLAKU na olta shang, I akwa kiɗə nga, ka gə tifəmta aka mjir nga! Apa madi tə da ata mzhi mbil ka mpikə ri? Ai da ku hara raka kamta!”

³ Antə MTHLAKU ku shari su tə tsa ɗəmhə ni, ka pəla, “Su tə gə wutə ni aɗi ata hara wa.”

⁴ Antə MTHLAKU na olta shang jaktə ncanta ali su. Antə I wutə MTHLAKU na olta shang akwa kəga u'u ka tsa an hara shariya aka mjirni. Antə u'u ni ku mbamta shanga su na aghəi akwa kira manda ka ləkwa mbamta su na ata di.

⁵ Antə I pəla, “Aiyi, MTHLAKU na olta shang, zhar bu, usa! Apa madi tə mjir nga ata mzhi mbil ka mpikə ri? Ai da ku hara raka kamta!”

⁶ Antə MTHLAKU ku shari su tə tsa ɗəmhə ni, ka pəla, “Su ngəni tə gə wutə ni ma aɗi ata hara wa. I na MTHLAKU na olta shang an pəla.”

Amos Ku wutə Səwur Hən Mbwa

⁷ Nggədza su tə I jaktə wuta akwa wulsu ni. I ku wutə MTHLAKU athləthlata adzə banggwa tə mdə hən ka səwur ngkər dwaɗukur, ka səwur ngkər dwaɗukur su ni akwa tsiyari.

⁸ Antə MTHLAKU pəla ali, “Amos, man su tə gə wutə ri?” Antə I pəla, “Səwur ngkər dwaɗukur.” Antə MTHLAKU pəla, “Wul ja, ka səwur ngkər dwaɗukur ngəni antə I ata ncantə laku tə mjir Israila ndzi apa banggwa na aɗi thlentədzi dwaɗu wa, I aɗi ata jaktə zhar ɗa kəra wa.

⁹ I ata huzamta vəi vəngkər səliyir kəkayeri ar Ishaku, antə vəyayeri ar vəngkər səli na akwa Israila ata ndzi kula mda, I ata vu ka mji dlər tsəɗiyir Kuthli Yerobowam.”

Amos Ka Amaziya

¹⁰ Antə Amaziya na pristər Bethlel ku thlenta aka Yerobowam, kuthlir Israila abbər, “Amos akwa ɗəmhə ɗimikur ata kəra ga azi akwa nca mjir nga. Mda aɗi akwa tsəɗi ni na ata dlu alari ndər ngəni wa.

¹¹ Kamnyar Amos akwa pəla, “Yerobowam ata mta akwa mpa, mda ata famta mjir Israila kazhar tsəɗiyir ɗa, ka mwantə ɗa apa mafa akwa tsəɗi damwa.”

¹² Antə Amaziya pəla aka Amos, “Hwi ali azi, mdər wulsu ragai! Ngka akwa tsəɗi Yahuda, kara pakə susəmər nga anda, ka gə ləkəma ka ngkər labarər nga anda.

¹³ Ga aɗiya jaktə hara naɓikur ngəni azi akwa Bethlel wa, kamnyar ngəni an vəi vəngkər səliyir kuthli, tsuwa tsa an vəi vəngkər səli na olta shang akwa tsəɗi ni.”

¹⁴ Antə Amos shinau aka Amaziya abbər, “I aɗi naɓi wa, wala ɓzər naɓi tsu wa. Amma I mdər ɓəla, ka mdər wul nfur kwataɓəla.

¹⁵ Antə MTHLAKU kəgaɓəla ra akwa ɓəla ni, ka pəla ali, ‘Mwari, ka ra ngkər ndər ngəni aka mjirna Israila.’

¹⁶ “Antə kulini ngga su tə MTHLAKU akwa pəlari, gə na akwa pəla ali abbər, ‘Ga aɗiya hara naɓikur ata kəra Israila wa ni, tsuwa ga aɗiya mnya aka kəkayeri ar Ishaku wa.’ ”

¹⁷ “Kamnyar ngəni, MTHLAKU akwa pəla, ‘Mwalangkiri ata ndzi karwa ar kutadi, tsuwa mda ata kurəmta maɗa' nga shili ka mwanki akwa mpa. Mji ata ndəkəmnya tsəɗiyir nga, antə ar nga ga ata sə mta akwa tsəɗi na adiya. Jiri mda ata fatə mjir Israila akwa tsəɗiyir ɗa, ka mwantə ɗa akwa tsəɗi damwa apa mafa.’ ”