Amos 4 - KAKAƊU NA ƁƊAKKARKARA

Israila Aɗi Mzhi Thliptə Su Wa

¹ Ngga gir ndər ngəni, giri na mwanki na ka ndzi akwa garər Samariya, giri na ku ndlə ka təksa apa thlar Bashan, giri na ana ntsarəmta mjir bwani, ka dlidlirəmta mjir tursu. Giri andər pəla aka shilər giri, “Səntə ala yeru su tə ka yeru sa!”

² I na MTHLAKU na olta shang ku kahyel ka kəri abbər, Jiri, saka ata sə si, tə mda ata sə fatə giri ata anggilku, mda ata sə ndəkər waskəi ka anggilku.

³ Giri ata ləɓəla ata vəi tə katangga nta ata, Waskəi ata ləɓəla akwa gula na akəmari, Mda ata pumta giri akwa Gar Hermon. I na MTHLAKU an pəla.

⁴ Sər giri akwa Bethlel, ka giri hara biku, mwar giri ahar Gilgal, ka giri ləkəma ka biku. Aghəla nda ka giri səntə saɗakar giri səɓəla ɗəpari, ka zaka kəlara vir na makərkur.

⁵ Hamta gir saɗakar gwaɗita ka buradi na ka yist, ka giri psəmnya sur hamtar giri na ar hirər ɗəffu, ka giri titil labarari! Kamnyar an su tə ɗəffa giri hira, giri na mjir Israila! I na MTHLAKU na olta shang an pəla.

⁶ I ku səntə mi akwa shanga bərniyayeri ar giri, ka tur susəma akwa shanga diyayeri, amma wala apani giri aɗi ngka adzə ra wa. I na MTHLAKU an pəla

⁷ Tsuwa I ku ngkatə yimərhyel ala giri, sakatə mbil thliya makər kambəla mdə thli sur faku. I ana thlentə yimərhyel akwa di laga ka ngkata aka di laga. Yimi ata təra akwa fakə laga, antə fakəu na aɗi wutə yimi ni wa ata ula.

⁸ Mji ana kadla akwa nu di di kamnyar bara yimər sa amma da aɗi wutə yimi na ata mzhi ɗa wa, wala apani giri aɗi ngka adzə ra wa. I na MTHLAKU an pəla.

⁹ I ku ɗi giri ka dəmən ka shilkər sur faku tə gadinayeri kəga fakər anapər giri ku ndzi shizha, tə ntsəkwa ku ɓɗəmnya kamnda ka nfur zaitun ar giri, amma wala apani giri aɗi ngka adzə ra wa. I na MTHLAKU an pəla.

¹⁰ I ku vu tə shilku na ɗimi si ata kəra giri, apatə I hara akwa Masar. I ku tsəgəi maɗadakwiyir giri akwa mpa, ka fatə takwayeri ar giri ka təra ka da. I ku nghyantə kucira giri ka shiwur mshiyayeri, wala apani giri aɗi ngka adzə ra wa. I na MTHLAKU an pəla.

¹¹ I ku shamta bwadukwa bərniyayeri ar nga, apatə I kurəmta Sodom ka Gomora. Giri ku ndzi apa udzəm tə mdə ndəkərɓəla akwa u'u, wala apani giri aɗi ngka adzə ra wa. I na MTHLAKU an pəla.

¹² Kulini nggədza laku tə I ata hara ka ga, Israila! Antə tə ku ndzi an su tə I ata hara ala gə ni, ɗəmhədzi kamnyar kəɓa ka Hyelər nga, Israila.

¹³ Kamnyar tsa an namtə garayeri ka namtə shambar. Tsa ana pəla aka mdə su na akwa ɗəffari, tsa ana namtə pcir balti ka tsa shin ka kuthlu, ka namtə garayeri ka da ndzi vəi vəi səlari. Thləmari an MTHLAKU, Hyel na ka Duna ta Shang!