Amos 3 - KAKAƊU NA ƁƊAKKARKARA

¹ Mjir Israila, təng kutakəyir giri antə MTHLAKU fwaɓəla akwa Masar. Antə kulini psi gir thləma giri aka su tə tsa pəla ata kəra giri.

² “Ɗangtə gir diya abbər, akwa shanga kutakəi na akwa duniya, giri shigiri antə I sənda. Antə I ata ɗi giri kamnyar shanga bikayeri tə giri hara.

³ Mji suɗa ata mzhi mwa ata kəma duku kula da kəɓa ka ɗəmhə mwar ɗa ya?

⁴ Tsəngi ana nggyinggya akwa kuɓər nfwa kula tsa wutə kum mtakəu ya? Ɓzər tsəngi ana tuwa akwa kurni kula tsa ngkəi su ya?

⁵ Ɗika ana ngkəidzi akwa shiwa ata di, kula su aɗi na ndəkərtə hangkalari ata ya? Dərku ana tsamta kərni ata di kula tsa ngkəi su laga ya?

⁶ Mda ana mbur təmbəl akwa kuta di kula mjir di ni thlivər ya? Asar ana təri ata kəra di kula tsiya MTHLAKU akwa ya?

⁷ Jiri, MTHLAKU na olta shang aɗi ana hara su kula tsa ncanta ashira su ni aka naɓiyayeri arni wa.

⁸ Ma tsəngi ku nggyinggya, wan kula ata thlivər ri? Ma MTHLAKU na olta shang ku pəla su, wan ata nggitə zhar psəmnya suari ri?”

Hyel Ata Hara Shariya Ata Kəra Samariya

⁹ Antə MTHLAKU pəla aka naɓi Amos, “Psəmnya akwa vəyayeri ar ɗuwardzi na akwa Ashdod, ka akwa vəyayeri ar ɗuwardzi na akwa Masar abbər, ‘Tsaptə girdzi ata kəra garayeri ar Samariya, ka giri wutə haptər hangkal na akwa tsa ka laku tə mji akwa hara bwani aka nvwa ɗa akwa.’

¹⁰ Da asəndə lakur hara su na kalkal wa, da ana tsaptə kari tə da həlta ka dlutsa akəla mji, akwa vəyayeri tə da ana ɗuwardzi akwa.”

¹¹ MTHLAKU na olta shang akwa pəla, “Dawayeri ata si ka kalaktə tsəɗi ni, da ata ndlagamta katanggayeri arɗa na ka duna, ka famnya suayeri na akwa kəyayeri na ka duna ni.”

¹² Ngəni an su tə MTHLAKU pəla, “Apatə mdər ɓəla ana dlutsə nggilang suɗa wala bwadukwa thləm akwa mnya tsəngi, antə mjir Israila na ka ndzi akwa Samariya, ata sə msər ka səla kujara pal ka kuɓashir vətə kər daci.”

¹³ Ngga giri, ka giri tsaktə nyarmbwar Yakub, I na MTHLAKU na olta shang, Hyel na ka Duna ta Shang an pəla.

¹⁴ Ma vir tə I ata ɗi mjir Israila kamnyar bikayeri tə da hara I ata huzamta bagaɗiyir hamta saɗaka ar Bethlel, mda ata ɓələmta təmbəla bagaɗiyir hamta saɗaka, ka tsa təri ata di.

¹⁵ I ata huzamta mbwar kusar ata kəma duku kəga mbwar kwanu. Mbwayeri tə da dəɓatə ka thlira ciwar ata sə ndlagamtadzi, tsuwa shanga mbwayeri na ol'ola ata sə hila. I na MTHLAKU an pəla.