Amos 2 - KAKAƊU NA ƁƊAKKARKARA

Hyel Ata Hara Shariya Ata Kəra Mowab

¹ Ngəni an su tə MTHLAKU pəla, “Mjir Mowab ku hara biku, ka jaktə hara biku ata kəra biku. I aɗi ata shari ɗya tə I ɗəmhə kamnyar ɗa ni wa, kamnyar da ku mbamta ɗethlər kuthlir Edom, har tə tsa ndzi pənju.

² Antə I ata thlentə u'u ata kəra Mowab, antə tsa ata mbamta vəi ɗuwardzi na ahar Keriyoth. Antə mjir Mowab ata mta akwa kərathlər ləlu, akwa kərathlər kurakər təmbələr dləra.

³ I ata tsi kuthlir Mowab, kəi kurəmta mji ol'ola na akirari.” I na MTHLAKU an pəla.

Hyel Ata Hara Shariya Ata Kəra Yahuda

⁴ Ngəni an su tə MTHLAKU pəla, “Mjir Yahuda ku hara biku, ka jaktə hara biku ata kəra biku. I aɗi ata shari ɗya tə I ɗəmhə kamnyar ɗa ni wa, kamnyar da ku nggəlar tsawur MTHLAKU, da aɗi ɓəlatə su tə tsa thlamta ka mdə hara ni wa. Haptayeri arɗa na ana thlandər ku shamta ɗa, apatə da ku pwaktəmta kəkayeri arɗa.

⁵ Apani I ata thlentə u'u ata kəra Yahuda, antə tsa ata mbamta vəi ɗuwardzi na akwa Urushalima.”

Hyel Ata Hara Shariya Ata Kəra Israila

⁶ Ngəni an su tə MTHLAKU pəla, “Mjir Israila ku hara biku, ka jaktə hara biku ata kəra biku. I aɗi ata shari ɗya tə I ɗəmhə kamnyar ɗa ni wa, kamnyar da ku ɗələmta mdə na ka jirkur kamnyar təmbələr adzərfa duku, ka mdər tursu, kamnyar təmbələr ɓaɓi mwar səl pal daci.

⁷ Da na ana ntsarəmta kəra mjir bwani apa da akwa ntsar bərbər ata di, ka psəmta jirkur ar mjir tura. Ɓzər ka baba'ni ata pi ka ɓzərngkwa duku, apani da ku ɓzamtə thləmi na ɓɗakkarkara.

⁸ Da ana pi adzə kəlara bagaɗiyir hamta saɗaka, ata ləptayeri tə mdə vəi kamnyar dlu təpa. Akwa mbwarna da ana sa yimər anap natə da masa ka kwabar mji tə mdə thlangkər ala su tə ka da nta.

⁹ Amma diya kamnyar ɗa antə I kurəmta mjir Amor, na saɓəl saɓəl apa nfur seda, tsuwa da ka duna apa nfur ok. I ku thlarəmta yar ni na amta, ka laɓəla nggilangari na akira di.

¹⁰ Tsuwa I ku fwaɓəla giri akwa tsəɗi Masar, ka pwar giri akwa mtakəu məva nfwarkumari, ka hamta ala giri tsəɗiyir mjir Amor.

¹¹ Antə I haptə maɗa' giri laga ka da ndzi naɓiyayeri, ka maɗadakwi laga ka da ndzi mjir Naziyir natə mdə ku hamta aka Hyel. Nənga su aɗi apani jiri wa ri, Mjir Israila?” I na MTHLAKU an pəla.

¹² Amma giri ku pu mji natə mdə hamta ɗa akwa sa yimər anap, ka tsawa aka naɓiyayeri abbər da aɗiya hara naɓikur wa.

¹³ “Antə kulini, I ata nggyar giri, apatə kəla ana nggyar kwara.

¹⁴ Mdə na ɓəɓatu aɗi ata hwi ka msər wa, mdə na ka duna ata sə ndzi kula duna tsuwa katsala aɗi ata mzhi mbantə mpikari wa.

¹⁵ Mdər lali aɗi ata mzhi thləthlatə wa, soja na ka səlari ɓəɓatu aɗi na ata msər wa, tsuwa mdər fəl taku aɗi ata mzhi mbantə mpikari wa.

¹⁶ Wala katsala na ka ɗəffər salkur ata sə pumta sur mparni ka hwi vir nda. I na MTHLAKU an pəla.”