Afisa 6 - KAKAƊU NA ƁƊAKKARKARA

Ndzəndziyir Maɗankyar Kəga Mjir yar ɗa

¹ Giri na maɗankyar, ka giri kələngkər aka mji na ya giri apa aka Mthlaku, kamnyar ngəni an su tə kalkal ka mdə hara.

² “Ka gə nar olkur aka baba' nga ka mama' nga.” Ngəni an tsawu na ntangkəma na ka alkawal akwa.

³ “Kamnyar ka shanga su ndzi lapiya ala ga, tsuwa ka far ngə fəi akwa duniya.”

⁴ Giri na mjir ya, giri aɗiya ɓzamtə ɗəffa maɗa' giri wa, amma ka giri kəlantə ɗa ka ɗiɓəla ɗa ka surthlipə na abwar Mthlaku.

Mafayeri Ka Mji Na Mthlakər Ɗa

⁵ Giri na mafayeri, ka giri kələngkər aka mji na mthlakər giri akwa duniya. Ka giri na ɗa səli, tsuwa ka giri kələngkər ala ɗa ka ɗəffu duku akwa shanga su, apa giri akwa harari aka Kristi.

⁶ Giri aɗiya hara kəthlər kamnyar thlivər nca, apa mji na ana hara kəthlər kamnyar namtə ɗəffa mdə nə wa. Təng tə ar giri, giri mafar Kristi ni, ka giri hara su kalkal apatə Hyel ata barari ka ɗəffa giri duku.

⁷ Ka giri hara kəthlər aka mji na mthlakər giri ka kucali, apa giri akwa harari aka Mthlaku, aɗi aka mji wa.

⁸ Kamnyar giri ku sənda abbər kəlara su na ɓɗaku tə mdə ku hara, tsu jili su ndaga antə tsa ata jaktə dluwari akəla Mthlaku, wala tsa an mafa wala an ɓzər kuta.

⁹ Giri na mthlakər mji tsuwa, ka giri hara aka mafayeri ar giri tsu apani. Ka giri zhar thlivərantə ɗa ni. Ka giri sənda abbər japwa giri kəga da ni, Mthlakər giri shang an duku akwar amtazi, tsuwa tsa aɗi ana nca zumzumkur aka mdə wa.

Shanga Kari Mpa Na Ar Hyel

¹⁰ Akwa tsikəra gari ni I akwa pəla, ka giri dunautə kər giri akwa Mthlaku, ka tsuwa akwa dunar kuthlikurərni.

¹¹ Ka giri hatə shanga kari mpa na ar Hyel, kamnyar ka giri mzhi thləthlatə gyang, ka nggyari shanga ɗimikur tə Shatan akwa ɗəmhari ata kəra giri.

¹² Kamnyar mburu aɗi akwa mpa na ar mdə ka nvwa nə wa. Mburu akwa mpa ni ka kuthlyayeri kəga kuthlikurayeri na akwa duniya tə shanga mji amzhi wutari ka nca wa. Mburu akwa mpa ka mji tə kuthlikur ar zaman ngəni na ka kuthlu akwa tsiya ɗa ni, ka tsuwa shanga mambəlayeri na ɗimi ɗimi akwa vəyayeri na amtazi.

¹³ Apani ka giri fatə shanga kariyir mpa na ar Hyel kamnyar ka giri mzhi nggyari dawar giri akwa vir mpa na ɗimi ni. Har ma sakatə giri ku kuri shanga su, ka giri mzhi ndzi tsu athləthlatə gyang.

¹⁴ Antə apani ka giri thləthlatə gyang! Ka giri mbwi kusara giri ka jirkur, ka jirkur ar Hyel an ndzi ləptər mpa ar giri.

¹⁵ Ka giri hatə ɓaɓi tə mdə ɗəmhə ni kamnyar ngkər labar na msəra ar səntə lapiyakur.

¹⁶ Bamnda suayeri ngəni, ka hamta jiri an ndzi partauwur giri, tə giri ata mzhi kətari ka tsəgəi shanga afər u'u tə Shatan ata shi giri kəgari.

¹⁷ Ka giri hangkər dzakwar liya natə tsa an mbantədzi, ka kətə katsakar ar Mambəl, na an ndərər Hyel ni.

¹⁸ Ka giri hara adduwa tədəku atar Mambəl akwa shanga su tə giri ata harari, ka kiɗə Hyel ata kəra su tə giri akwa barari. Tsuwa ka giri hara adduwa tədəku, kula tsamta, kamnyar shanga mjir Hyel.

¹⁹ Wala I ma, ka giri hara ali adduwa, kamnyar kəi wutə dunar gari kula thlivəra kəi psəmnya ashir ar labar na msəra ni aka mji.

²⁰ Kamnyar ngəni an kəthlər na səntə ra, tə I ndzi wakilari, wala tə kulini I akwa pərsəna kamnyari ni! Ka giri hara ali adduwa, kamnyar kəi mzhi ngkər labar na msəra ni kula thlivəra, apatə kalkal kəi hara.

Thlawardzi Na Akwa Tsikəra Wasika Ni

²¹ Tikikus, na ɓzərma' mburu tə mburu hirhira, na akwa kəthlər ka jirkur aka Mthlaku ni, ata ngkərɓəla ala giri shanga su, kamnyar wala giri ma ka giri səndə lapiyakurərna ka su tə I akwa.

²² Ngəni an su na hara tə I ata thlentə ni ala giri ni, ka tsa ngkərɓəla ala giri laku tə yeru akwa, ka tsuwa ka tsa dunautə giri.

²³ Kulini maɗaməma, ka Hyel na Tədda, ka Mthlaku Yesu Kristi, na ala giri msərakur, ka hirkur, ka hamta jiri.

²⁴ Ka Hyel hara ɓɗakkur aka shanga mji na hir Mthlakər mburu Yesu Kristi, ka hirkur na ba saka madi.