Afisa 5 - KAKAƊU NA ƁƊAKKARKARA

Ndzi Akwa Parakəu

¹ Antə təng tə giri ku ndzi maɗankyar tə Hyel hirhir ni, ka giri kətə halər Hyel akwa shanga ndzəndziyir giri.

² Ka giri hirdzi, tsu apatə Kristi ku hir mburu ka hamta kərni kamnyar mburu, sur hamta na ata shiwur msəra, ka saɗaka na msəra aka Hyel.

³ Mda aɗiya bara ka mdə nggata abbər giri akwa hara karwakur wala kəlara jili adiyakur, wala nggukə sur mdə wa təng tə kulini giri ku ndzi maɗa' Hyel ni. Wala kamnyari ma aɗi kalkal ka giri kamnya su apani akwa nca giri wa, kamnyar aɗi kəɓa ka halər mjir Hyel wa.

⁴ Tsuwa mnyar adiyakur, wala na cakucaku, wala mnya na ruruwa, aɗi kalkal wa. Ata vəya ndaga, ka giri ndzi mjir gwaɗita aka Hyel.

⁵ Ka giri səndə ngəni abbər mdə na ana ləka, wala mdə na adiya, wala mdər mbulamkur, natə surhararni ka mdər nu haptu shang duku ni, aɗi ata ləkwa kuthlikur na ar Kristi ka ar Hyel wala raka wa.

⁶ Giri aɗiya hir ka mdə pwaktə giri ka ndərayeri na gapangapani wa, kamnyar atar suayeri apani antə ɗəffa Hyel ana ɓzə ata kəra mji na ana nggəlar kələngkər alari.

⁷ Antə giri aɗiya paktə kər kəga da wa.

⁸ Kamnyar hwatu giri akwa kuthlu, amma kulini giri ku wutə parakəu atar Mthlaku. Antə ka giri hara su apa mjir parakəu,

⁹ kamnyar parakəu na akwa giri an ata hara ka shanga sur giri ndzi ɓɗaku, ka kalkal, ka jirkur.

¹⁰ Antə ka giri wuta abbər giri ku thliptə hara su na ata kəskəra Mthlaku.

¹¹ Giri aɗiya hara suayeri na ar kuthlu na kula ampani wa, kuji ma ka giri puɓəla ashira ɗa ata bəbal.

¹² Kamnyar ata ndzi sur səli wala ka mdə kamnya suayeri tə da ana hara akwa ɗuwari ni.

¹³ Kamnyar kəlara sakatə mdə ku səntə shanga su akwa parakəu, mda ata mzhi nggaɓəla jirkur ar shanga su ata bəbal.

¹⁴ An su na hara mdə pəla, “Thlata, gə na akwa heni ni! Thlata akwa mtəmta! Antə Kristi ata hamta ala gə parakəu.”

¹⁵ Apani ka giri vədzə hangkala giri aka laku tə giri ana hara su akwa. Giri aɗiya ndzi apa mji na caku wa, amma ka giri ndzi ɗəɗu.

¹⁶ Ka giri kəthlər ka kəlara sakatə giri kəgari kamnyar hara ɓɗakkur aka mji, akwa virayeri ngəni tə mji akwa ndzi ɗimi ni.

¹⁷ Apani giri aɗiya ndzi caku wa, amma ka giri nggaɓəla su tə Mthlaku akwa bara ka giri hara.

¹⁸ Tsuwa giri aɗiya wika ka yimər anap wa, kamnyar su ngəni ata hilantə giri. Amma ka giri zhar ka Mambəl na Ɓɗakkarkara an pwar giri akwa shanga su.

¹⁹ Ma sakatə giri ku tsaptədzi, ka giri hara hayeri na akwa Zabura, ka hayeri damwa na ar hu Hyel, ka shanga hayeri na abwar mambəla. Ka giri hara ha na ka kuraku msəra aka Mthlaku ka ɗəffa giri shang.

²⁰ Tsuwa akwa shanga su ka giri dingngga usar Hyel na Tədda, akwa thləma Mthlakər mburu Yesu Kristi.

Ndzəndziyir Sal Ka Mwala Kəi

²¹ Ka giri tərghəi kəra giri aka nvwa giri kamnyar nar səli aka Kristi.

²² Giri na mwanki, ka giri kələngkər aka shilər giri, tsu apa aka Mthlaku.

²³ Kamnyar sal an kəra mwala, tsu apatə Kristi an kəra ikələziya. Tsuwa tsa ka kərari an mdər mbantə ikələziya, na dzari ni.

²⁴ Antə apatə ikələziya ku hamta kərni aka Kristi, apani tsuwa ka mwanki hamta kərɗa aka shilər ɗa akwa shanga su.

²⁵ Giri na mji shili, ka giri hir mwankir giri, tsu apatə Kristi ku hir ikələziya ka hamta kərni alari.

²⁶ Tsa namtə ikələziya ni ɓɗakkarkara atar dunar ndərərni, ka kəcimta ni ka yimi na ar baptizma, tə tsa ndzi kəcəkəcari ndəlang.

²⁷ Tsa hara apani kamnyar ka tsa sə hamta ikələziya ni aka kərari ka daraja laga ola, kula diɗi, kula kulci, wala kəlara jili manjivar na aɗi.

²⁸ Apani tsuwa, tar ka mji shili hir mwankir ɗa tsu apatə da ana hir dza ɗa sur ɗa. Kamnyar kəlara mdə na ana hir mwalankiɗa, tsa hir kərari.

²⁹ Kamnyar mda aɗi na ana nggəlar dzari wa, tar ma ka tsa wulwul ni, ka ɓəlatə ni ɓɗak laga, apatə Kristi ana hara aka ikələziya.

³⁰ Tsuwa mburu an bwayeri ar dzari ni.

³¹ Apatə kakaɗər Hyel ku pəla, “Antə mdə sal ata zhar baba'ni ka mama'ni ka da paktədzi ka mwalankiɗa, antə da suɗə ni ata ndzi su duku.”

³² Ngəni an ashir na ola, amma I akwa kəthlər ka ashir ngəni kamnyar ngkərɓəla laku tə Kristi ka ikələziya duku akwa.

³³ Amma wala apani, ka waskəi akwa nca giri hir mwalankiɗa tsu apatə tsa ana hir kərari, tsuwa ka mwala ni nar səli aka salngkiɗa.