Afisa 4 - KAKAƊU NA ƁƊAKKARKARA

Ndzi Ar Dukkur

¹ Antə I na akwa ndzi akwa pərsəna kamnyar kəthlər na ar Mthlaku ni, akwa kiɗə giri abbər ka giri namtə ndzəndziyir giri ka tsa kəɓa ka darajar kəga tə Hyel hara ala giri ni.

² Ka giri ndzi ka tərghəi kər, ka kanaɗikur, ka mbwiɗəffu, waskəi akwa mbwi ɗəffari aka nvwani, kamnyar ncanta abbər gə hir ni.

³ Ka giri vu duna giri ka wuta abbər giri ku kəsi dukkur tə Mambəl na giri ni, atar bara ndzəndzi lapiyakur na kəsəhə giri ata kəma duku ni.

⁴ Kamnyar shanga mburu an dza duku, tsuwa Mambəl na Ɓɗakkarkara an duku, tsu apatə mdə na giri sur vəkər duku akwa sakatə Hyel carɓəla giri ni.

⁵ Mthlaku duku an aɗi, ka hamta jiri duku, ka baptizma duku,

⁶ ka Hyel duku na Təddar shanga mji. Tsa an ata kəra shanga mji, akwa kəthlər ka shanga mji, ka akwa shanga mji tsuwa.

⁷ Amma Kristi ku hamta aka kəlara mda akwa nca mburu cautə laga ola, olkur kəlara cautə ni akwa ncantə laku tə Kristi ana hamta su ka tsiyari bwang.

⁸ An su na hara tə kakaɗər Hyel pəla, “Saka tə tsa ləmtazi ni, tsa fatə dlamar mafayeri ka ləmta kəgari, ka hamta cautayeri aka mjirni.”

⁹ Antə man karapur “tsa ləmtazi” nə ri? Karapwari an abbər ntangkəma tsa ləghəi akwa kira duniya.

¹⁰ Tsu tsa na ku ləghəi ni, an ləmta akwa vəi na amta ta shanga vəyayeri na amtazi, kamnyar ka tsa nghyantə shanga suayeri, duniya ka vəi na amtazi.

¹¹ Tsuwa cautayeri tə tsa hamta aka ikələziya ni an abbər ka mji laga ndzi aposəlayeri, ka mji laga ndzi naɓiyayeri, ka mji laga ndzi mjir ngkər ndərər Hyel, ka mji laga ndzi pastowayeri ka maləmayeri tsuwa.

¹² Tsa hara ngəni kamnyar ka tsa ɗəmhə mjirni kamnyar kəthlər ar kəlantə ikələziya na an dza Kristi ni.

¹³ Atar apani antə shanga mburu ata ndzi duku ata kəra hamta jirər mburu, ka atar səndər mburu ata kəra Ɓzər Hyel. Antə mburu ata kəla ka ndzi apa mji ol'ola akwa hamta jirər mburu, har ka mburu ndzi apa Kristi.

¹⁴ Apani mburu aɗi ata jaktə ndzi apa maɗankyar ka mji takjali ka hangkala mburu ni kəra wa, ka shambar ar kəlara surthlipa akwa kəl mburu ka kadlə ka hangkala mburu nə wa. Tsuwa mji na ɗəɗu akwa pwaktə mda ka dlərpəkur, aɗi ata mzhi ndəkərtə hangkala mburu atar kwasherikurər ɗa wa.

¹⁵ Ata vəya ndaga, ka mburu pəla jirkur akwa hirkur, ka mburu kəla akwa shanga sur mburu, har ka mburu ndzi ka halər Kristi, na ndzi apa tsa an kəra dza mdə ni.

¹⁶ Kamnyar tsa an ka kuthlikur ata kəra shanga bwayeri ar dza mdə ni. Da ku pakhədzi ka kəsəhədzi ka pərɗa ata kəma duku ka nvwa ɗa. Tsuwa təng tə kəlara bwa na akwa dza ni akwa hara kəthlərərni kalkal, shanga dza ni akwa kəla ata kəma duku ka ndzi ka duna kamnyar hirkur na akwa daɓwa bwayeri ni.

Halər Mdə Na Bilən Akwa Kristi

¹⁷ I akwa jaktə pəla ala giri, ka kiɗə giri akwa thləma Mthlaku abbər giri aɗiya jaktə ndzi apa mji na aɗi səndə Hyel wa ni wa, kamnyar da aɗi ka dzam na ka ampani wa.

¹⁸ Da aɗi ana mzhi nggaɓəla su wa. Da ku ndəkəmtadzi ka mpikə tə Hyel ana hamta ni, kamnyar bəlkəkurər ɗa, na thlata akəla kər ɓəɓalkur tə da kəgari ni.

¹⁹ Tsuwa da mji na kula səli. Da ana mwaɓər hara ɗimikur, antə da hir hara kəlara jili adiyakur na aɗi.

²⁰ Amma ngəni aɗi an jili su tə giri thlipta akəla Kristi wa!

²¹ Ma abbər giri an nggata ata kəra Yesu, tə mda an ku thlipa ala giri jirkur na akwa Yesu.

²² Antə pumta giri surharar giri na ɗimi ɗimi tə giri tsəli ka harari waci nda, halayeri ar hilhilkur atar nggukayeri na akwa pwaktə giri ni.

²³ Ata vəya ndaga, hamta giri kər giri aka Mambəla, ka tsa namtə dzamər giri ka surharar giri ka da ndzi bilən.

²⁴ Ka giri kətə hal na bilən natə Hyel namtə mdə kəgari akwa dludzərni ni, ka giri ndzi ka jirkur ka hara su na ata kəskəra Hyel.

²⁵ Antə ka giri zhar thlandər ni! Ka waskəi pəla jirkur aka ntəwulərni, kamnyar shanga mburu an bwayeri ar dza duku.

²⁶ Ma ɗəffa giri ku ɓzi, giri aɗiya zhari ka ɗəffa giri ni vu giri akwa hara biku wa. Giri aɗiya hir ka pci təri ala giri ka ɗəffa giri tsu bwarbwar wa.

²⁷ Giri aɗiya psi laku aka Shatan wa.

²⁸ Ma ga ana həla, ka gə zhar həl ni. Ka gə ndzi ka jirkur, kara hara kəthlər na ɓɗaku ka tsiya ga, har ka gə mzhi wutə su tə ga ata dlar mji na akwa tura kəgari.

²⁹ Ga aɗiya hir ka gari ar adiyakur səɓəla akwa mnya gə wa. Ka shanga su tə ga ata pəlari ndzi su na ɓɗaku na ata dlar mda, kəlara gari ka tsa kəɓa ka sakarni. Apani antə gariyir giri ata ndzi ka ampani aka mji.

³⁰ Tsuwa giri aɗiya hara sur ɓzamtə ɗəffa Mambələr Hyel na Ɓɗakkarkar nə wa, kamnyar tsa an seɗar Hyel ata kəra giri kamnyar ncanta abbər giri an ar Hyel, kamnyar ncaɓəla ala giri abbər vir laga giri ata sə mbantədzi.

³¹ Ka giri zhar shanga mwavərkur, ka ɗəffə bwarbwarkur, ka ɗəffə ɓzəɓza, ka kurakər haptə hangkal, ka mnya ɗimi, ka nggənggəldzi, ka shanga kəmanggarkur.

³² Ata vəya ndaga, ka giri ndzi ka hangkal aka nvwa giri, ka giri kətadzə mda, giri akwa yafitə nvwa giri, tsu apatə Hyel ku yafitə giri akwa Kristi.