Afisa 3 - KAKAƊU NA ƁƊAKKARKARA

Bulus Ku Hara Kəthlər Akwa Nca Dur Gapani

¹ Kamnyar ngəni, I na Bulus, akwa ndzi akwa pərsəna kamnyar Kristi Yesu, kamnyar dlar giri na dur gapani.

² I mbərsa giri ku nggatə ata kəra ɓɗakkur tə Hyel hara ali, atar carɓəla ra kəi ndzi mdə na ata dlar giri ni.

³ Hyel ka kərari an ncaɓəla ali ashir ngəni, apatə I ku rəbutə su ata kər raka ni.

⁴ Ma sakatə giri ku karatə su tə I rəbutə ni, giri ata nggaɓəla dzamərna ata kəra ashir na ar Kristi ni.

⁵ Akwa zamanayeri na təramta Hyel aɗi ncaɓəla su ngəni aka mda, apatə tsa ncaɓəla aka aposəlayeri na ɓɗakkarkara kəga naɓiyayeri arni na kulini nə wa. Tsuwa tsa ncaɓəla ashir ngəni atar Mambələrni.

⁶ Tsuwa ashir ni an abbər, atar labar na msəra ni, antə mjir Yahudi ka mji na aɗi mjir Yahudi wa, ku paktədzi ka ndzi mji duku, na ata fa kifər ɓɗakkur tə tsa hara alkawalari atar Kristi Yesu ni.

⁷ Antə I ndzi mdər ngkər labar na msəra ni atar ɓɗakkur tə Hyel hara ali ka atar dunarni, antə I akwa hara kəthlər ni ka dunarni.

⁸ Wala tə I an raka ta shang akwa nca mjir Hyel ni, Hyel ku hara ali ɓɗakkur ka ni laku ar ngkər labar na msəra ni aka mjir dur gapani, kəi ngkər ala ɗa hangkur barka tə mda amzhi ngkərɓəlari wa akwa Kristi.

⁹ Kəi ngkərɓəla aka waskəi ashir na ata ndatə mda tə Hyel na alaktə shanga su, ku ɗəmha ka ɗuwamta təng akwa baɗitari ni.

¹⁰ Su na akwa ɗəffari ni an, ka mdə kəthlər ka mjir ikələziya kamnyar ngkərɓəla ɗəɗukurər Hyel ata kəra suayeri zumzum hang aka kuthlyayeri ka kuthlikurayeri na amtazi.

¹¹ Ngəni an su tə Hyel ɗəmha təng waci, ka nghyaɓəla akwa Kristi Yesu na Mthlakər mburu.

¹² Akwa Kristi antə mburu ka duna ka hamta jiri ar mwari adzə Hyel kula thlivəra, atar hamta jiri tə mburu kəgari akwa tsa.

¹³ Antə apani I akwa kiɗə giri abbər dza giri aɗiya mtə kamnyar bwani tə I akwa ɗarari kamnyar gir nə wa. Kamnyar bwani ngəni an ata sə haptə səliyir giri.

Bulus Ku Hara Adduwa Kamnyar Mjir Afisa

¹⁴ Kəlara sakatə I akwa dzama ata kəra suayeri apani, I ana zuzuri ka ɓunji ka hara adduwa aka Tədda.

¹⁵ Tsa an alaktə shanga su na ka mpika na akwar amtazi ka na akwa duniya.

¹⁶ Antə I akwa kiɗə Hyel abbər akəla hangkur səliyirni, ka tsa dunautə giri ka Mambələrni, kamnyar ka giri ndzi ka duna atar mambələr giri.

¹⁷ Atar apani antə Kristi ata ndzəndzi akwa ɗəffa giri atar hamta jiri, ka giri ncidzi gyang, ka hara nggilang akwa hirkur.

¹⁸ Tsuwa I akwa hara adduwa abbər ka shanga giri kəga mjir Hyel, wutə dunar nggaɓəla olkur hirkur na ar Kristi, watau baukurari, ka saɓəlkurari, ka nalkurari, ka zurangkurari.

¹⁹ Tsuwa I akwa bara ka giri səndə hirkur na ar Kristi, na ku təra kərathla səndər mda, kamnyar ka giri nghyantədzi ka mpika ka shanga duna na thlata akəla Hyel.

²⁰ Antə kulini, ka shanga səli ka olkur ndzi aka Hyelər mburu, natə atar dunarni na akwa mburu ni, tsa ana hara suayeri təramta shanga su tə mburu ata mzhi kiɗari wala dzamta akwa ɗəffa mburu.

²¹ Ka səli ndzi aka Hyel akwa ikələziya ka akwa Kristi Yesu, har ka mwanta akwa shanga zamanayeri ba saka madi. Amin.