Afisa 2 - KAKAƊU NA ƁƊAKKARKARA

Thlata Akwa Mtəmta Ka Ləkwa Mpikə Na Bilən

¹ Waci giri ndzi apa mji na ku mti, kamnyar tur kələngkər ar giri ka bikayeri damwa tə giri ana hara.

² Sakanda giri ana hara bikayeri tsu apa mambila mjir duniya, giri akwa kələngkər aka shatan na olər suayeri na ka duna akwa duniyayeri tə mda awutə ka nca wa. Tsa an akwa kəthlər akwa ɗəffa mji na ku nggəlar kələngkər aka Hyel.

³ Jiri, shanga mburu ku ndzi apani waci, mburu akwa nu nggukayeri na ar dza mburu, mburu akwa hara suayeri tə dza mburu ka ɗəffa mburu ku mwaɓtə ka mburu hara. Antə apani atar surharar mburu na ar dza, tə mburu ku ɓzamtə ɗəffa Hyel ni, tsa ata sə ɗi mburu tsu apa mambila mjir duniya.

⁴ Amma Hyel, na hir kətadzə mda, ku hir mburu ka duna,

⁵ təng sakatə mburu tsu mtəmtari atar bikər mburu, ka hamta ala mburu mpika akwa sakatə tsa thlentə Kristi akwa mtəmta. Atar kətadza ka ɓɗakkur tə Hyel hara antə giri wutə mbantədzi.

⁶ Kamnyar tsa thlentə mburu akwa mtəmta ata kəma duku ka Kristi, ka na mburu vəi ndzəndzi ata kəma duku ka tsa akwa kuthlikurərni amtazi.

⁷ Hyel hara ngəni kamnyar akwa zaman na akəmazi ka tsa mzhi ncantə jili ɓɗakkur ka hirkur tə tsa hara ala mburu akwa Kristi Yesu.

⁸ Kamnyar atar kətadza ka ɓɗakkur tə Hyel hara antə giri ku wutə mbantədzi atar hamta jiri. Ngəni aɗi kamnyar ɓɗakkur harar giri wa, cauta antə Hyel hara ala giri.

⁹ Aɗi kamnyar ɓɗakkur kəthlər tə giri hara wa, ta mdə laga asə gaya ata kər.

¹⁰ Kamnyar mburu an kəthlərər tsiyari. Tsuwa tsa ku jaktə alaktə mburu bilən akwa Kristi, kamnyar ka mburu mzhi hara suayeri na ɓɗakɓɗaku tə tsa ɗəmha ala mburu təng akwa baɗitari.

Ndzi Duku Akwa Kristi

¹¹ Ka giri ɗangta abbər waci giri an dur gapani atar ya. Mji na ana kəga kərɗa abbər mjir kaciya ni ana kəga giri, giri na kula kaciya ni abbər giri kərɗi. Ngəni ma kaciya na abwar dza tə tsiya mda an hara.

¹² Ka giri ɗangta abbər sakanda giri aɗi damitədzi ka Kristi wa, antə giri aɗi mzhi ndzi akwa nca mjir Israila wa. Tsuwa giri aɗi səndə alkawalayeri tə Hyel hara aka mjirni nə wa. Apani akwa duniya ni, giri aɗi ka sur vəkər wa, antə giri aɗi ka Hyel wa.

¹³ Amma kulini giri akwa Kristi Yesu. Sakanda giri ciju ta Hyel, amma kulini mdə ku səntə giri adzə ni atar mamshir Kristi.

¹⁴ Kamnyar Kristi ka kərni an sənta ala mburu msərakur ni. Tsa an paktə mjir Yahudi ka mjir dur gapani tə da ndzi su duku ni, ka ɓələmta katangga dawakur na ndəkəmta daɓwa mburu ni.

¹⁵ Tsa tsi tsawur Musa kəga suayeri tə mdə thlamta abbər ka mdə hara ni, ka namtə durayeri na suɗə ni tə da ndzi dur duku na bilən akwa tsa, antə msərakur ku wutədzi.

¹⁶ Apani atar mtərni ata udzəm kadləkadla, tsa ku shwalatə daɓwa durayeri ngəni suɗə ni ka Hyel, tə da ndzi su duku, antə dawakur na akwa daɓwa ɗa ni ku kuri.

¹⁷ Antə Kristi ku si ka ngkər labar ar msərakur ala giri na aɗi mjir Yahudi wa ni, giri na ka Hyel ni, ka ngkər aka mjir Yahudi na kudzəhə ka tsa ni tsu apani.

¹⁸ Ai atarni antə shanga mburu ata mzhi mwari adzə Tədda atar laku duku, watau Mambələr Hyel.

¹⁹ Antə kulini, giri na dur gapani ni aɗi mətəpi wala mji sisi kəra wa. Kulini giri an kamba ata kəma duku ka mjir Hyel na ɓɗakkarkara. Giri an mjir kutakəyir Hyel.

²⁰ Shanga mburu ata kəma duku an mbwarni, natə mdə hənta ata kəra səla mbwa tə aposəlayeri ka naɓiyayeri an nci, natə Kristi Yesu surni an pelar kuɗəmari.

²¹ Akwa tsa antə mburu ndzi pakhəpakhari, ka ndzi mbwar vəngkər səli ɓɗakkarkara aka Mthlaku.

²² Tsuwa akwa Kristi antə giri na dur gapani ni ku ndzi bwadukwa mbwa tə Hyel akwa ndzəndzi akwa atar Mambələrni ni.