1 Timothli 1 - KAKAƊU NA ƁƊAKKARKARA

Thlawardzi

¹ I an Bulus natə Hyel na mdər mbantər mburu ka Kristi Yesu, tsawa ali abbər kəi ndzi aposəl ar Kristi, natə mburu akwa vəkər ka tsa ni.

² I akwa rəbuta ala ga, Timothli, ɓzərna na jirari akwa hamta jiri. Ka Hyel na Tədda ka Kristi Yesu na Mthlakər mburu hara ala giri ɓɗakkur, ka tsa kətadzə giri, ka tsa na ala giri msərakur.

Tsaktədzi Ata Kəra Surthlipa Na Ar Thlandər

³ I akwa bara ka gə ɗarndzi ahar Afisa, tsu apatə I pəla ala ga sakatə I akwa lakur mwari ahar Makidoniya nda, kamnyar ka gə pəla aka mji laga na akwa thlipə surthlipayeri na ar thlandər ni ka da zhari.

⁴ Ka gə pəla ala ɗa abbər da aɗiya shamta sakar ɗa akwa makumdlayeri kəga jika thləma kəkayeri na dlyaɗangɗang wa. Kamnyar jili suayeri ngəni ana sə kura akwa beɗi daci, da aɗi ana dlar mji akwa hamta jirər ɗa akwa Hyel wa.

⁵ I akwa hamta ala ɗa tsawu ngəni kamnyar ka da ndzi ka hirkur na jirari, ka dzama na ata ncaɓəla ala mburu abbər su tə mburu akwa harari ni kalkal, ka hamta jiri na jirari.

⁶ Amma mji laga aɗi ngkəi vəi ngəni wa. Da shinadzə bwahila ɗa aka shanga suayeri ngəni, akwa shamta sakar ɗa akwa gariyayeri na kula ampani.

⁷ Da akwa bara ndzi maləmayeri ar thlipə tsawur Musa, amma da aɗi nggaɓəla su tə da akwa pəlari wa, wala suayeri tə da ana gari ata kər ka dza ɗa pwipwiyari apa da asəndə nə wa.

⁸ Mburu asənda abbər tsawu ni ɓɗaku, ma mda ata kəthlər kəgari akwa laku na kalkal.

⁹ Tsuwa mburu asənda abbər mda aɗi hara tsawu ni kamnyar mji na ana hara su kalkal wa, amma kamnyar mji na nggyarɗu, na ka kəra ɗa ɓəɓal, kamnyar mji na kula thlivər Hyel akwa ɗəffa ɗa ka mjir biku, kamnyar mji na namta apa su aɗi na ɓɗakkarkar wa ka mji na hir adiyakur, kamnyar mji na ana tsi baba' ɗa wala mama' ɗa, wala tsi mji damwa.

¹⁰ Mdə hara tsawu ni kamnyar mjir ləka, ka mjir pi ka sal nvwa ɗa, ka mjir həl mda, ka mjir thlandər, ka mjir hara seɗar thlandər, ka mjir hara kəlara su na ku ndzi zum ta surthlipə na ɓɗaku,

¹¹ na səɓəla akwa labar na msəra na ka daraja ni, natə Hyel na ka səli tə mji ana hu thləmari ni hamta ali ni.

Bulus Akwa Usar Hyel Kamnyar Kətadzərni

¹² I akwa usar Kristi Yesu na Mthlakər mburu, na na ali dunar hara kəthlər ngəni. Kamnyar tsa wuta abbər I ata mzhi hara alari kəthlər ni ka jirkur, ka ni kəthlər,

¹³ wala tə waci I ku mnya ɗimi ata kərari, ka hara bwani alari, ka nggənggəl ni ni. Amma Hyel ku kətadzə ra, kamnyar tə I hara suayeri ni akwa kutar tur sənda, kula hamta jiri.

¹⁴ Antə Mthlakər mburu ku hara ali ɓɗakkur na ola, ka ni hamta jiri ka hirkur na akwa Kristi Yesu.

¹⁵ Gari ngəni an jiri, tsuwa kalkal ka mdə dlu ni swakti, abbər, “Kristi Yesu ku si akwa duniya kamnyar mbantə mjir biku.” Tsuwa I an lamba ntang akwa hara biku ni.

¹⁶ Amma Hyel ku kətadzə ra, kamnyar ka Kristi Yesu mzhi kəthlər ka iya, I na olər mjir biku ni, atar jili mbwiɗəffu na ola tə tsa hara ka iya, kamnyar kəi ndzi surthlipə na ola aka shanga mji na ata sə hamta jiri alari, ka wutə mpikə na akur wa.

¹⁷ Antə kulini ka səli ka olkur ndzi aka Hyel har ba saka madi! Kamnyar tsa an Kuthli na ba saka madi, na amtə wa, tə mda awutə ka nca wa, tsuwa Hyel na duku shini. Amin.

Kəthlər Tə Ka Timothli Hara

¹⁸ Ɓzərna Timothli, nggədza suayeri tə ka gə hara, apa su tə naɓiyayeri ku ngkər ata kəra ga akwa saka na təramta Kamnyar atar ɓəlatə suayeri tə mdə pəla ata kəra gə ni, ga ata mzhi mpamta mpa ni ɓɗak laga.

¹⁹ Ka gə kəsi hamta jirər nga akwa Kristi ka jirkur, tsuwa akwa shanga su ka dzamər ngə ncaɓəla ala ga abbər ga aɗi ka biku wa. Kamnyar mji laga aɗi kəthlər ka su tə dzamər ɗəffa ɗa pəla ala ɗa wa, antə da ku hilantə hamta jirər ɗa.

²⁰ Akwa nca ɗa an Himenayus ka Alekzanda, natə I ku hamta ɗa aka Shatan, kamnyar ka da thliptə zhar mnya ɗimi ata kəra Hyel.