Málikɔ 1 - Ɔngana á Kɛ̌kɛ

Ɓɔphɛi ndea Yoáni-Mɓatisi

¹ Wani ande nkpangeɔ á Mbino-Ánjá á Yéso Kiísito, Muna-Mokonga.

² Cɔ, Mokonga ɗán'yɔngisi Isáya mɔtu-nyɔngɔ nɛkɛ ɓe: «Cɔ, nenteki ntɔmi-mbino nɛmɔ mosá akɔ, mmbé aɓɔngisiagande aphe nɛkɔ.

³ Nkpa moci áoaba n'ɛsɔ akpɛ ka nkanda ɓe: ‹Ɓɔngisiagani aphe ndea Mɔkɔta! Mamisani k'akɛ aphe kau dɛ!›»

⁴ Kaɓondɔ, Yoáni-Mɓatisi ɗásɛnɛki ka nkanda n'aɔ̌tɔmia ɓakpa ɓe: «Kětiani tambea anu ájeɗe, ɓánoɓatisɛ, mpɔ Mokonga áimɛ ɓojeɗe nɛnu.»

⁵ Ɓakpa ɓɔbu á ka ntanga-nji á Yudɛ́a na ɓunde á ntanga-nji á Yɛusalɛ́ma, ɓáondonda, ɓáɔyɔnga nyɔngɔ á ɓojeɗe nɛɓɔ. Mpɔ, Yoáni áǒɓatisa ka iɓo Yɔɔdáni.

⁶ Yoáni ɗáɔ́li ngɔ́mbɛ nde ɗáɓáɓɔngisi na sáá á ngamia, áɔ̌ɓɔɛa angeɗe á mpokɔ ka cina á kuju. Eea nɛkɛ ɗátú ɓaáphaa na ɓoki á k'osaa.

⁷ Cɔ, Yoáni ɗéngoɗi ɓakpa áɔyɔnga ɓe: «Nkpa moci aobika mbusa ani, amɔnyɛ́nyi ka ɓukpɛkpɛ, mmbé kékeni gbuta ka koɗa á ngoi á ɓiato nɛkɛ.

⁸ Eme ɗénóɓatisi ka iɓo. Yɛ gǎkɛ, anoɓatisande ka Měma á kanga ɓojeɗe.»

Ɓatisa á Yéso na tombaga akɛ

⁹ Ka mbenɔ ndɔ, Yéso áotóka na Najalɛ́ti á ka Galiláya, ka gǎ mɔtɛ á Yoáni. Yoáni áomɓatisa ka Yɔɔdáni.

¹⁰ Mɔngɔ moci, ɓî Yéso ajúani ka iɓo, áɔɔna koba n'aúkukani, Měma á kanga ɓojeɗe áodida gǔ akɛ ɓea mboe.

¹¹ Ɛsɔ áotóka na koba: «Oɓɛ, onde miki nɛmɔ á ekondi. Nena maseye ka phɔakɔ.»

¹² Kɛ̌kɛndɔ, Měma á kanga ɓojeɗe áɔnsɔndɔɛa ka nkanda.

¹³ Áoika ka nkanda esa nkama gena (40). Kó, Sɛtáni áontombaga. Yéso ɗátú kimoci na ɓanyama, na ɓamalaéka ɓáɔmbɛɗaneaga.

Ekuma ndea Yéso ka Galiláya

¹⁴ Esa moci Yéso áoga na Galiláya ka mbenɔ nde ɗáɓándungisi Yoáni. Áɔtɔmia Mbino-Ánjá ndea Mokonga.

¹⁵ Áogea te: «Cɔ, mbenɔ ajú nga, koɓoamɛ ndea Mokonga a ye tɔ bíbí. Kětiani tambea anu ájeɗe, ɓóɓeekeɛ Mbino-Ánjá.»

Yéso aeɓɔphani ɓagoigi nɛkɛ á k'ama mosá-mosá

¹⁶ Mbusa á wa, Yéso ɗátúɔnyɛ́nya ka motii á etǔ á Galiláya. Kondɔ, áɔ̌ɓɔna ɓaɔphigi ɓaɓɛ, Simɔ́ni na muna-makɛ Andeé, na ɓáomaka moaɓɔ ka etǔ ndɔɔ.

¹⁷ Yéso áǒngoɗea: «Ómoɓeani, nenóbisande ɓaɔphigi á ɓakpa.»

¹⁸ Kɛ̌kɛndɔ, ɓáoɗoa moaɓɔ, ɓáomɓea.

¹⁹ Yéso áɔsɛkɛɗa mosá ábɔa, áɔ̌ɓɔna ɓana Jɛbɛdáyɔ: Yakɔ́ɓɔ na muna-makɛ Yoáni. Ɗáɓátú suɓi á koko na ɓáɔɓɔngisiaga moaɓɔ nɛɓɔ.

²⁰ Kɛ̌kɛndɔ, Yéso áɔ̌ɓɔphana. Ɓɔ, ɓáonɗeketa abaɓɔ Jɛbɛdáyɔ na ɓabɛɗanigi suɓi á koko, ɓáomɓea Yéso.

Yéso anamisi nto á kukuwa á ɓansombo

²¹ Mbusa á wa, Yéso na ɓagoigi nɛkɛ ɓáoga na Kapɛɛnaúmu. Esa á saɓáto, kɛ̌kɛndɔ áongia suɓi éndu á madondanɔ ndea Ɓayúda ka nyɔngɔ á Mokonga, áǒgoisaga ɓakpa.

²² Ɓundɔ ɗáɓátúɔɔ́ka goisaga ndɔ, ɓáotangaaga phɛɛ. Nkókó á goisaga kau ɗátingani n'índe á ɓaɗundu-ɛɔphi nga, ɗáogoisaga ú na kɔkɔta.

²³ Cɔ, suɓi éndu ndɔ, nkpa moci ɗátú na kukuwa á ɓansombo, áokoga,

²⁴ áogea: «Yéso ɓa Najalɛ́ti ekende ɓeogi ně? Obiki kosótindisa? Neokoúba, onde Nto á kanga ɓojeɗe ndea Mokonga.»

²⁵ Yéso áǒkea ɓansombo: «Kɔ́ɓani! Júanani ka nkpa ndee!»

²⁶ Ɓansombo ndɔ ɓáonsuga akpɛ. Ɓáonjuana na ɓáokoga.

²⁷ Ɓakpa ɓɔbu ɓáoyayama, na ka ɓî ɗáɓáoúsianaga: «Eke nde? Goisaga nde akiɗi kɛ̌kɛ ana ɓukpɛkpɛ. Mogáa nde áǒsosea ɓansombo, ɓɔ ɓáɔmɔ́ka.»

²⁸ Kɛ̌kɛndɔ tɔ, ɓoombia á Yéso áɔɛmba k'ɔ́ma bui ka ntanga-nji á Galiláya.

Yéso ěamisi ɓato á esambɔ ɓásii

²⁹ Ka juana aɓɔ k'éndu ndɔ á madondanɔ ndea Ɓayúda ka nyɔngɔ á Mokonga, Yéso, Yakɔ́ɓɔ na Yoáni ɓáoga mɔtɛ á Simɔ́ni na Andeé.

³⁰ Kó, ɓáondonda nyamɔtɔ akɛ na Simɔ́ni mmbé nke, n'aɓondi k'éka nga ɗátú na jónga akpɛ. Ka kiɗia á Yéso tɔ, ɓáongoɗea nyɔngɔ akɛ.

³¹ Yéso áɔsɛkɛɗa bíbí akɛ, áondunga ka njaga, áommesia. Mɔngɔ moci, jónga áonsía. Mpɔ, nke ndɔ, áoúnanaga ka ɓɔ.

³² Cɔ, ajú ye ɔgɔgɔ, ka gǎ á maní, ɓáombikia na ɓasambi ɓɔbu na ɓato á kukuwa á ɓansombo.

³³ Ka ntanga-nji ndɔ, ɓakpa ɓɔbu ɓáodondanaga k'íso á mpume.

³⁴ Yéso áǒamisa ɓato á esambɔ ɗanga-ɗanga ɓásii. Â phɔtɔ ǒjuanisa ɓansombo ɓásii. Áǒimisia ɓansombo gea, ɓákayɔngɛ nga, ɓansombo ɗáɓámúbi.

Yéso aɔtɔmba Galiláya

³⁵ Mama í, ka mɔkɛsuɛ esa n'a phɔ́tɔ na kaiphiɔ, Yéso áojuana, áoga ka nkanda. Kó, áɔmɛma Mokonga.

³⁶ Simɔ́ni na ɓadakɛ ɓáoga ka nkaɓɔ akɛ.

³⁷ Ɓî ɓándondi ye, ɓáongoɗea te: «Ɓakpa ɓɔbu ɓáokokaɓa.»

³⁸ Yéso áǒgea: «Ɓégɛni ka nji angbo, nnde a bîbíbí, nɛ́phɛɛ́ phɔtɔ ɓakpa kó nga, nndɔ ungɔ nebiki í.»

³⁹ Áoga n'aɔtɔmba nji bui nde á ka Galiláya. Áɔ̌phɛa ɓakpa suɓi éndu nɛɓɔ á madondanɔ ndea á Ɓayúda ka nyɔngɔ á Mokonga, â phɔtɔ ǒjuanisa ɓansombo kó.

Yéso anamisi nto á kukuwa á sǔ

⁴⁰ Nto á kukuwa á sǔ moci áobika bíbí á Yéso, áogbuka muanku mosá akɛ, áonɗengemisaga te: «Aoɓá n'okondi, ɔɔtɔka n'omosokosei.»

⁴¹ Yéso áonkuia ngomi, áonanoa njaga, áondunga, áongea te: «Cɔ, nekondi, neosokosei.»

⁴² Kɛ̌kɛndɔ sǔ áontóka, nyama akɛ áoama.

⁴³ Mosá á Yéso úkuia akɛ aphe, â gǎkɛ ɔmphɛa akpɛ te:

⁴⁴ «Kɔ́ntɔ̌miɛ mɔnɔ nkpa. Gǎ ndiu óphangisiɛ mosá á ntoɓeigi-phɛ́a, óphúiɛ phɛ́a nɛkɔ ɓíndɔ Mósa ɗásosi ka ubisa á ɓakpa gea oami.»

⁴⁵ Nto á kukuwa á sǔ ndɔ â ndiu oga okpanga tɔ̌miaga á nyɔngɔ nɛkɛ ka ntanga mosá á ɓakpa ɓɔbu. Kaɓondɔ, Yéso katɔkɛ ye ngia ka ntanga-nji k'íso á ɓakpa, â ndiu oga oika ka nkanda. Ɓakpa ɓâ gǎkɛ otóka ɔma bui, ɓáobika ondonda.