2 Ɓakɔlítɔ 1 - Ɔngana á Kɛ̌kɛ

Nsesɔ

¹ Ka ɓato á kanisa ndea Mokonga, ɓunde ɓá ka Kɔlítɔ, na ka ɓaɓêki ɓɔbu á ka Akáya, sambani! Eme nteki Pɔ́lɔ aámbé neɗundu ɓaoɓa nde kimoci na Timɔtɛ́ɔ. Nende nteki nde ɓa Kiísito Yéso ka nyɔngɔ á mɔphɛ á Mokonga.

² Ambe Abasu Mokonga na Mɔkɔta nɛsu Yéso Kiísito, ánophɛ ɓonjánja-ékondi na ɓujɛjɛ nɛkɛ.

Pɔ́lɔ áonsega Mokonga

³ Obebɔ ka Mokonga, Aba-Mɔkɔta nɛsu Yéso Kiísito, mɛna-ɓonjánja na mphɔngisi-měma asu ka kema bui.

⁴ Nga, aosóphɔngisa měma ka tambaga asu bui, ka gea, ɓéephɔngisɛ phɔtɔ ɓadasu měma ka mbenɔ á tambaga, ɓíndɔ Mokonga ɗági k'ama mosá-mosá ka phɔasu.

⁵ Nga, ɓî ɓeotambaga ásii ɓíndɔ Yéso ɗátambigi, asótúmisi na ɓukpɛkpɛ á phɔngisa á měma á ɓadasu.

⁶ Kaɓɛ ɓesu ɓateki na ɓeotambaga, ande ka gea te, ɓóɓɛ na ɓoamia na ɓukpɛkpɛ ka měma. Ɓî Mokonga asɔphɔngisi měma, ande phɔtɔ ka phɔngisa á měma anu. Mpɔ, ɓôphiphia tambaga nde ɓe ye tɔ kau.

⁷ Kaɓondɔ, ɓena nseɓeɔ ásii ka ɓenu nga, a tɔ ɓíndɔ ɓeotambaga kimoci, a tɔ unge Mokonga aɔphɔngisa měma asu, ɓesu ɓɔbu.

⁸ Ɓaya, ɓekondi ɓóúbɛ base gea, ɓî ɗéɓetambigi phɛɛ ka nji á ka Asía, ɓoɗoko í ɗásɔnyɛ́nyɛi, ɓéoúba te, ɓékéendɛku ye.

⁹ Ɗéɓetú ɓea ɓato á mekakɔ na ɓeoúba te, ɓásómande. Kema ndɔ ɗágeani ka gea, ɓékéseɓeɛ mɔnɔ ɓukpɛkpɛ asu sasasu. Ɓénseɓeɛ ndiu Mokonga mmbé aǒjujúkisa ɓasí.

¹⁰ Yɛ, ɗásoólokisi ka kukuwa na ɓeoúba gea, asoólokisande goto. Eya, ɓembisíí nseɓeɔ nɛsu nga, káɗeketeku amisa asu ka měma.

¹¹ Nga, ɓeoúba gea te, ɓosóengande k'ɛ́mɛmi ka Mokonga, yɛ aámbé aɓeekeande ɛmɛmi ndɔɔ. Mpɔ ɓakpa ɓásii ɓáombeba Mokonga ka nyɔngɔ asu, mbusa áosópha ɓonjánja-ékondi nɛkɛ.

Pɔ́lɔ aánganisi moangɔ á gǎ na Kɔlítɔ

¹² Kema nde aosópha ɓosegi ka měma ande gea, tambea asu mosá á ɓakpa na mosá anu, ande ɗoni kángá á maibe, n'atóki ka ɓonjánja ndea Mokonga. Nga, ɓonjánja ndea Mokonga aunge aosótámbisa ka mokonda. Nna gǎkɛ kɔɓɔɔngɛ ndea ɓakpa unge aosótámbisa.

¹³ Kaɓondɔ, suɓi á ɓaoɓa nɛsu ɗanga-ɗanga, ɓenóɗundui base ka gea, ɓótangɛ, ɓóúbɛ. Neseɓei phɔtɔ gea,

¹⁴ ɓî ɓoɗigimisi nyɔngɔ nɛmɔ ábɔa, ɓoúbande bui suɓi á ɓaoɓa ndee. Kaɓondɔ unge, esa nde Mɔkɔta nɛsu Yéso abikaeka, ɓoɓande na ɓosegi ka ɓesu, ɓíndɔ ɓeɓande ně ka ɓenu.

¹⁵ Cɔ, ɓî a ɓó, ɗéangi júa ani mɔtɛ-anu goto ka gea te, ɓóɓɛ na ngɔwa á dondana ani na ɓenu mɔngɔ iɓɛ.

¹⁶ Ande gea te, ɗénesui donda anu mosá á gǎ ani na Makɛdɔnía. Mbusa, nê goto onódonda ka ja ani gea, ɓómotúmbaneɛ ka gǎ na Yudɛ́a.

¹⁷ Ɓî ɗéangi ɓó, ande gea te, neoanganisaga moangɔ nɛmɔ? Ɓî neoanga moangɔ ndɔ, neoanga ka kokpa, ka ɓeekea nyɔngɔ na yá í mongɔ ímoci?

¹⁸ Cɔ, Mokonga, mɛna-koɗoni, aoúba gea, moangɔ nesu ɗákátú á ɓeekea á nyɔngɔ na yá í mɔngɔ ímoci.

¹⁹ Nga, Muna-Mokonga Yéso Kiísito mmbé eme Pɔ́lɔ, Timɔtɛ́ɔ na Síla ɗɛ́ɓɛnɔtɔ̌mi nyɔngɔ akɛ, ɗákábiki ka nyɔngɔ á ɓeekea kaɓɛ yá á nyɔngɔ. Suɓi akɛ a ndiu tɔ ɗoni.

²⁰ Nga, ka Yéso aámbé Mokonga agi eya ka mɔkɔ nɛkɛ bui ndea Mokonga. Ka yɛ Yéso, ɓeoɓeekea: «Áɓɛ ɓó» ka ɗokomisa á Mokonga.

²¹ Mokonga sasakɛ aámbé ɗásógbagisigi kimoci na ɓenu ka Kiísito. Mokonga sasakɛ aámbé ɗásɔ́sɔmbu.

²² Asóbisíí epe nɛkɛ nnde aoɗigimisa gea, ɓende ɓakpa nɛkɛ n'ande Měma á kanga ɓojeɗe suɓi asu nnde ande moéma á kema bubui nde asóbisi.

²³ Eme gǎkɛ, nembisi Mokonga nɗigimisi ka enda ani. Aoɓá na nɛɔyɔnga mbɛa, ámomowɛ. Kéji ye na Kɔlítɔ ka nyɔngɔ nde neonokuia ngomi.

²⁴ Ké phɔtɔ na siki á soseaga anu ka kema nde akeni na ɓeekea í, ka nyɔngɔ nde, ɓeekea nɛnu ka Yéso a ye tɔ na mǐgi akpɛ. Ɓe tɔ ɔbɛɗanaga kimoci ka gea, ɓóɓɛ na maseye.