1 Ɓakɔlítɔ 1 - Ɔngana á Kɛ̌kɛ

Nsesɔ

^1-2 Ka ɓato á kanisa ndea Mokonga, nnde á ka Kɔlítɔ, sambani. Eme Nteki Pɔ́lɔ aámbé nenóɗundui ɓaoɓa ndee. Yéso Kiísito aámbé ɗámɔɔphani ɓíndɔ Mokonga ɗákondi. Muna-amasu Sɔsitɛ́ni anósambei phɔtɔ. Kiísito ɗánɔɔphani ka gea, ɓóɓɛ ɓakpa nɛkɛ. Ɓo goto tɔ k'ékombo nde ɓáɔmɛma Mɔkɔta nɛsu Kiísito Yéso k'ɔ́ma bui. Yɛ ande Mɔkɔta nɛsu na Mɔkɔta ndea ɓaɓêki ɓɔbu.

³ Ambe ɓonjánja-ékondi na ɓujɛjɛ ndea Abasu Mokonga, na Mɔkɔta Yéso Kiísito áɓɛ na ɓenu.

Ɓonjánja nde ɓetɔi ka Kiísito

⁴ Neonsega Mokonga nɛmɔ esa bui ka nyɔngɔ á ɓonjánja-ékondi nɛkɛ nde anóphi ka nyɔngɔ á jukana anu na Yéso Kiísito.

⁵ Nga, Kiísito anóphi ɛtɔi ásii á yɔnga na úbapha phɛɛ.

⁶ Nyɔngɔ á Kiísito nnde ɗɛ́ɓɛnɔtɔ̌mi ana ɓukpɛkpɛ suɓi anu.

⁷ Kaɓondɔ, ɓókóúki k'égabɔ á ɓonjánja-ékondi ɓî ɓooɓóndea esa nde Mɔkɔta nɛsu Yéso Kiísito asɛnɛkaeka.

⁸ Yɛ, aámbé anóphande ɓukpɛkpɛ ka měma na ka ɓî asungiagande ka gea, ɓákánóyeyɛmɓɛ mɔnɔ esa nde Mɔkɔta nɛsu Yéso Kiísito ajande.

⁹ Mokonga mmbé nnaoanganisa mɔkɔ nɛkɛ, aámbé ɗánɔɔphani gea, ɓójukanɛ n'Anakɛ Yéso Kiísito, Mɔkɔta nɛsu.

Kanisa á ka Kɔlítɔ akatanigi

¹⁰ Ɓaya, nenóɗengemisigi k'ína á Mɔkɔta nɛsu Yéso Kiísito gea, ɔ́kanani, ɓókokatanɛgɛ mɔnɔ. Ɓáni ndiu na měma mo na kanisia mo na yɔngɛa mo.

¹¹ Ai ɓaya! Nɛyɔngi ɓó ka nyɔngɔ nde, ɓato á k'ékombo ndea Kɔlɔ́ɛ ɓábiki omongoɗea gea, ɓoosanaga.

¹² Nekondi ngoɗea anu ɓe: Sɔsɔɓɛ anu, nkpa na nkpa aɔyɔnga yɔnga ínɛkɛ gea: «Eme, nende nkpa nde ɓa Pɔ́lɔ.» Ɓaangbo: «Eme nende ɓa Apɔ́lɔ.» Ɓaangbo: «Eme nende ɓa Pɛ́tɛɛ.» Na ɓaangbo «Eme nende ɓa Kiísito.»

¹³ Cɔ, Kiísito aékatisani? Cɔ, Pɔ́lɔ aámbé ɗánókui ka moyangɔ? Cɔ, ɗáɓánóɓatisi k'ína á Pɔ́lɔ?

¹⁴ Nensegi Mokonga nga, ɗékémɓatisi ka ɓenu, na nna tɔ Kiísipɔ na Gáyɔ.

¹⁵ Kaɓondɔ, kákeni nkpa áyɔngɛ gea, ɗáɓámɓatisi k'ína ani.

¹⁶ Eya, ɗééɓatisi phɔtɔ ɓato á k'ékombo ndea Sɛtɛphánɔ. Kéoúba gea, ɗémɓatisi ye goto nkpa ɓaangbo.

¹⁷ Kiísito ɗákámoteki ka ɓatisa á ɓakpa, ɗámoteki ndiu ka tɔ̌mia á Mbino-Ánjá. Kɛ́ɔtɔmia ú na kɔɓɔɔngɛ á yɔnga á kokpa ka gea, kukuwa á Yéso ka moyangɔ kaɓɛmbɛ kángá kantíti.

Yéso Kiísito ande ɓukpɛkpɛ na kɔɓɔɔngɛ ndea Mokonga

¹⁸ Nyɔngɔ á kukuwa á Yéso ka moyangɔ ande kobóbó ka ɓakpa nde ɓáɓúngigi, a gǎkɛ ɓukpɛkpɛ á Mokonga ka ɓesu íɓundɔ Mokonga asóamisi ka měma.

¹⁹ Ɓáɗundu suɓi á Ɓuku á Mokonga ɓe: «Netúkatúkande kɔɓɔɔngɛ ndea ɓato á kɔɓɔɔngɛ, neyande úbapha ndea ɓaúbaphi.»

²⁰ Cɔ, nto á kɔɓɔɔngɛ awani? Ngoisigi-ɛɔphi awani? Nto á úbapha á ka mokonda awani? Mokonga kákěti phɔ́ kɔɓɔɔngɛ ndea ka mokonda nde ka kobóbó?

²¹ Cɔ, ɓato á ka mokonda na kɔɓɔɔngɛ nɛɓɔ bui, ɗáɓákátɔki úba á Mokonga ɔma nde ɗáɔnisi kɔɓɔɔngɛ nɛkɛ base. Kaɓondɔ unge, Mokonga asui amisa á ɓakpa ka měma, ɓunde ɓaoɓeekea ka ɓeana na ɓɔphɛi á moyangɔ, nnde ɓáogea te ande á kobóbó.

²² Nga, Ɓayúda ɓá phɔtɔ ɔmɛma phangia á ketangaɔ na ɓunde ɓáná Ɓayúda, ɓáokaɓa kɔɓɔɔngɛ.

²³ Cɔ, ɓesu gǎkɛ, ɓɛɔphɛa nyɔngɔ á Kiísito ímbé ɗáɓánkɔkɛigi ka moyangɔ. Ka Ɓayúda, ande ephiphi ájeɗe. Ka ɓunde ɓáná Ɓayúda ande kobóbó.

²⁴ Ka ɓunde gǎkɛ Mokonga ɗáɛ́ɓɔphani, kaɓɛ Ɓayúda, kaɓɛ ɓunde ɓáná Ɓayúda, Kiísito ande ɓukpɛkpɛ ndea Mokonga na kɔɓɔɔngɛ ndea Mokonga.

²⁵ Ka nyɔngɔ nde, kobóbó nde ɓáte Mokonga aně, ande kɔɓɔɔngɛ phɛɛ kɔnyɛ́nya kɔɓɔɔngɛ ndea ɓakpa. Ɓɔɔlɔ nde ɓáte Mokonga aně, ande ɓukpɛkpɛ phɛɛ kɔnyɛ́nya ɓukpɛkpɛ ndea ɓakpa.

²⁶ Ɓaya, kanisiani phɔ́ mɔphani nde Mokonga ɗánɔɔphani. Ande gea, ka ianaga á kokpa, sɔsɔɓɛ anu, ɓato á kɔɓɔɔngɛ ɓá tɔ ɓábɔa, ɓato á ɓukpɛkpɛ ɓá tɔ ɓábɔa, ɓato á ɓophombia ɓá tɔ ɓábɔa.

²⁷ Mokonga ɗásɔmbu gǎkɛ kema á kobóbó á ka mokonda ka kusa á ɓato á kɔɓɔɔngɛ na soni. Ɗásɔmbu phɔtɔ kema á ɓɔɔlɔ á ka mokonda ka kusa á ɓato á ɓukpɛkpɛ na soni.

²⁸ Mokonga ɗásɔmbu kema á kanga ɓophombia á ka mokonda na kema á jǎi-jǎi á ka mokonda na nnde nna na kantíti, ka túkatúka á kema nde ana ɓoombia.

²⁹ Kaɓondɔ, nna na nkpa nde aɔtɔka něɗokomisi mosá á Mokonga.

³⁰ Nga, Mokonga aámbé anójúkanisi na Kiísito Yéso. Kiísito aámbé ande kɔɓɔɔngɛ ka ɓesu nnde atóki ka Mokonga. Mokonga aosótanga ɓato á koɗoni mosá akɛ, aosósokosea na koɗaga asu ka ɓojeɗe ka nyɔngɔ á Kiísito.

³¹ A tɔ ɓíndɔ ɓáɗundu suɓi á Ɓuku á Mokonga gea: «Mmbé aokonda éɗokomisa, éɗokomisɛ ka nyɔngɔ á Mɔkɔta.»