Jobe 5 - O Mikanda Ikola

Ilifaji u bhana kaiula kua Jobe kuila a sote Nzambi

¹ Kindala-phe ixana hanji; bhuala muthu u kuitaia? O kiki-phe kua anju nanhi, ku ua-nda ku bilukila?

² Kuma ió ua tobho o njinda iê iene i mu dia; o kiôua-phe a mu jibha kuala muanu uê-muène.

³ Ua tobho nga mu muene kiambote muene, kuila kala ua mu ta jindanji; maji mu kithangana ngoho, dibhata diê nga di te mázui.

⁴ O anʼé kubhuluka kua a kala dikanga; a a sanujuina muene bhu muelu; ki bhu kala ngó muthu u a kudila.

⁵ O idima iê ki íbhia, a i dié ngó kuala mukua nzala, ua bhingi ni iii iala mu minha muene muène mua i katula; umonhi uê uoso a u minha kuala kingulungumba.

⁶ Mbata ima ioso ku mundu iala ni kuku ku i tunda; o ituxi ue ki i fuáfue ngó mu mavu ahatu.

⁷ Maji ku muthu kuene ku tunda o ituxi, kala o jisoso ja túbhia ki ji tunda bhu jiko phala kutuka, ni kuia bhulu.

⁸ Maji eme-phe, ngi sota Nzambi; mu kuzuela kuami ngi talela kua muene.

⁹ Muene u bhanga ima ia makota i bhonza ku ijiia, ni isunji iavulu ki i xikina ku i tanga.

¹⁰ Muene u nokesa o mvula mu ngongo anga u tumikisa o menha mu mikáu.

¹¹ Phala ua tolo o dijina a mu tule ditala dia dileka; o ió ua bhiti ni thambi a kale mu sanguluka ni jimbote ja vulu.

¹² O ixinganeku ia jinjimu, Muene u i kitula kingoho, phala maku mâ a lémbue kubhanga ioso ia solo o mixima iâ.

¹³ Muene, o jingijiie u ji kuatela mu kuijiia kuâ; o kikutu kia isuéia, ka ki ehela.

¹⁴ Kuma mu muanha, phala ene ku kala kitombe; o mu kumbi dia mediia, aia ni kubabata kala mu usuku.

¹⁵ Nzambi muene u kudila ua tate, ku xibhata i tunda mu kanu diâ; ua tate u mu bhulula bhu maku a kiiala kia nguzu.

¹⁶ Mukonda dia kienhiki, ngadiama uala ni kia ku dielela; mukua ituxi, ituxi iê i mu xita o dikanu.

¹⁷ Tala-ze, kuma muthu ió ua zediua, uoso a mu bazela kuala Nzambi; eie-phe o kubazela kua Muteni-a-ioso ki ku ku kuate usudi.

¹⁸ Mbata muene se u bhanga fidila, muene-muène u i tumbʼê dingi: muene se ua kuama, maku mê ene muene a saka.

¹⁹ Ua kà ku bhulula mu makubhondalala ma samanu; o lua kasambuadi ku ibha ki ku ku bhixila.

²⁰ Mu nzala, ua kà ku bhulula ku kalunga; o mu ita, ua kà ku bhulula ku undanda ni ku xibhata.

²¹ Ku kibetu ki tunda bhu dimi, muene ua kà ku kondeka; ki kuà keza kibuika, eie ku kala ni uoma.

²² O kia kèza kibuika ni nzala, eie ua kʼòlela; o iama i kuama mu ngongo, ki ia kà ku kuata uoma.

²³ Kuma katé ni matadi mu mikáu, ua kà kuata na-u ukamba; o iama ia iangu ua kà di tuma na-iu kiambote.

²⁴ Hé ua kà kʼijiia kuila o dibhata dié dia tungu ni kutululuka; ua kà nhunga mu dibhata dié dioso, ki bhu kala kima ki ku kamba.

²⁵ Anga ua kà kʼijiia ue kuila, o mbutu ié ia kà sokoloka muene, o muiji ué ua kà di bhanga kala iangu ia mukáu mu ngongo.

²⁶ O mu mbila ua kà bokona-mu kiá ua kuka muene, mukuâ ni kiene kumuna o kita kia tiliku bhu thembu iê.

²⁷ Talesa-ze, ima ioso iii tua ijiia kiá kiambote, kiene muene ki ialʼiki; ivua-kiu-phe, u xinganeke muene phala o mbote ié eʼmuène.