Matiye 5 - Testament ke Siki 1960 (Kabba Laka)

¹ Tokou Jésus wo dooudjé ke baya bayan lé, nè nal do tokou err té. Tokou nè nisi nange ndjè kao gè tédjé dé rè té.

² Nè nteï tè ntòdjou tar ndjè kao gè tédjé, mpana,

³ Madji éh kedè, dèdè ke nto dangetédjé deo ndil té, mbata béh kö ke dara to mbata lodè.

⁴ Madji éh kedè, dèdè ke nnò ke ongou, mbata dèdè da kisi ke mè woul.

⁵ Madji éh kedè, dèdè ke mèdè to dèkèkè, mbata dèdè da kinga nange nèn to né ndouba.

⁶ Madji éh kedè, dèdè ke boo ke kounda dadè mbata tar ke gaté gaté, mbata mèdè a ndan.

⁷ Madji éh kedè, dèdè ke nda mè madji, mbata dèdè da kinga mè madji.

⁸ Madji éh kedè, dèdè ke mèdè ndaa kaï, mbata dèdè da ko Allah.

⁹ Madji éh kedè, dèdè ke nto ndjè moso tar, mbata dabardè ngandjé lo Allah.

¹⁰ Madji éh kedè, dèdè ke ngädè ke tar mbata tar ke gaté gaté, mbata béh kö ke dara to mbata lodè.

¹¹ Madji éh kesè tokou dooudjé tadjisè ke ngäsè ke tar, ke ngange tar ngem ke madjang dang dang dòsè té mbata tar lom.

¹² Ekoukidjé, isidjé ke rònèl nya, mbata kouka losè éh dara tokou bo, mbata tokou ban dooudjé ngà prophètedjé ke tar ke éh dongor kèté aresè.

¹³ Sésè etoidjé to katé ke nange nèn, a tokou katé nèl ang a da karè ntél nèl to di wa? Nè nto madji mbata né kada ang, a ta kongou koro ke ta kare dooudjé mbòï ke gòldè.

¹⁴ Sésè etoidjé to lokarè ke nange nèn. Béh ke dò err té a kiyaa rè pi.

¹⁵ Dooudjé ounda pourou lampe té ta kounda kö karè té ang, dounda dò kake té ke tarr ta kare ndokoo dèdè toï ke mè kei té.

¹⁶ Aridjé lokarè losè ndokoo kem dooudjé té, baa ta karedè do koula ke madji losè, ke ta kòsou gadji Bòsésè ke éh dara.

¹⁷ Edjidjé ang ke mam ndé ta toudjou tar ndedji aséh prophètedjé, mam ndé ta toudjoudè ang, a ta karedè ndé to tar ke tokoro.

¹⁸ Mbata tokoro ma mpa maresè, sar dara ke nange nèn ndai ang bai, ngon tar maketourou aséh tar dang dang lo tar ndedji ndai ba kada ang, sar né toï a dé baa.

¹⁹ Tokou ban, doou ke mbeté tar ndedji ke ngadji ngadji, ke tòdjou dooudjé ban tò, da barè yéh ke ngadji ngadjiba mè béh kö té ke dara, a doou ke ngemdè ke tòdjoudè dooudjé, da barè yéh ke boui mè béh kö té ke dara.

²⁰ Mbata ma mpa maresè, tokou gaté gaté losè ndai yéh ke ngà ndjè da maketourou ndedjidjé ke Pharisiendjé ang, sésè a téhdjé mè béh kö té ke dara ndò kada ang.

²¹ Sésè woidjé ke dèdè mpa dare dooudjé ke leo, Ase kare i tòl doou ang. Doou ke tòl doou ase téh loou saria té.

²² A ma mpa maresè, dooudjé kada kada toï ke ongou dadè ke ngoködè, dase téh loou saria té. Doou ke tadji ngoköè ase téh rò ndjè gange sariadjé té, ke nè ke mpana, I mbe, nase kao loou kem pourou té.

²³ Tokou ban, tokou i ao ke né kare ba dò bann té, tokou i edji mei té ke ngoköi éh ke tar dòi té,

²⁴ Iya né kare ba loi nò bann té, ao moso tar ke ngoköi dongor, gè té edé ta kare né kare ba loi.

²⁵ Moso tar ke ndjè toula dòi loshénè loshénè tokou i ao sa deo ta kao loou saria té, na dòmadjang a nè na kilai dji ndjè gange saria té, ke ndjè gange saria a kilai dji ndjè pourou té, ke a kilai kei koula té.

²⁶ Tokoro ma mpa mari, i a téh daka ndò kada ang, nderèng i a kouka ngon narè ke to dòbon baa.

²⁷ Sésè woidjé ke dèdè mpa leo, Ase kare i da kaiya ang.

²⁸ A ma mpa maresè, dooudjé kada kada toï ke aa dène ke boo ke ta to sa, nè nda kaiya sa mèa té mbä.

²⁹ Tokou kemi ke kòl eri ta kari da madjang, etò kemi ke dang, ilè deo eo sei, to madji wota mbata loi tokou barkem ròi kada a nai, wota ta kare dila ròi toï loou kem pourou té.

³⁰ Tokou dji ke kòl eri ta kari da madjang, egangè, ilè deo eo sei, to madji wota mbata loi tokou barkem ròi kada a nai, wota ta kare ròi toï ao loou kem pourou té.

³¹ Dèdè mpa leo tò, Doou ke touba dènè la, ase kare nè narè maketourou tar touba dènè.

³² A ma mpa maresè, dooudjé kada kada toï ke touba dènè lodè, tokou to tar to loou to madjang ang, dèdè ndadè to dènè kaiya. Doou ke taa dènè ke ntoubè mbä, nè nda kaiya.

³³ Sésè woidjé mare bai ke dèdè mpa dare dooudjé leo, Ase kare i oubou yo ke ngem ang, a ase kare i ouka are Mbaibé Seigneur tar koubou yo loi.

³⁴ A ma mpa maresè, oubidjé yo kada ang, ke ri dara ang mbata nè nto ngèndé gange tar lo Allah.

³⁵ Aséh ke ri nange ang mbata nè nto né kongou gòlè, aséh ke ri Jérusalem ang mbata nè nto béh lo tokou Mbaibé.

³⁶ Oubou yo dòi té ang, mbata i ase da bi dòi kare poutou aséh ndoul kada ang.

³⁷ Ase kare tar ke sésè epaidjé to tar aä aséh eë, mare tar wota yéh ke nèn to lo ndjè kembaa.

³⁸ Sésè woidjé ke dèdè mpa leo, Kem mbata kem, ngange mbata ngange.

³⁹ A ma mpa maresè, mbetidjé doou ke madjang ang. A tokou doou kada oundai kambòri ke kòl, etourou marè arè tò.

⁴⁰ Tokou mare doou kada ndiki ta kao sei loou gange tar té ta taa koubou ke tarr loi, arè koubou ke bo loi tò.

⁴¹ Tokou doou kada waai ke singa ta kao deo bo kourou deo kada, ao sa kourou deo djo.

⁴² Are doou né ke nè ndoudji, mbeté né ke doou ndiki ta tounai ang.

⁴³ Sésè woidjé ke dèdè mpa leo, Ase kare i ndiki doou ke ndjè nin kei mari ke ta mbeté ndjè kembaa loi.

⁴⁴ A ma mpa maresè, ndikidjé ndjè kembaadjé losè, edoudjidjé Allah mbata dèdè ke ngäsè ke tar.

⁴⁵ Baa ta kare sésè edéidjé ngandjé lo Bòsésè ke éh dara. Mbata nè nare kade la téh dò ndjè ke madjang, ke dò ndjè ke madji tò. Nè noula ndi dò ndjè ke gaté gaté, ke dò ndjè ke gatang tò.

⁴⁶ Mbata tokou sésè ndikidjé dèdè ke ndikisè, nè kouka losè to deo di té wa? Ndjè taa narè lʼimpôtdjé da tokou ban tò ang wa?

⁴⁷ Tokou sésè edaidjé laphia ngakösè kadaba, sésè edaidjé né ke madji wota ke maredjé da wa? Dooudjé ke to Gentildjé da tokou ban tò ang wa?

⁴⁸ Tokou ban, ase kare sésè edéidjé madji toï deo kadaba tokou Bòsésè ke dara to madji toï.