Matiye 4 - Testament ke Siki 1960 (Kabba Laka)

¹ Tokou ban Ndil ndja oula Jésus ta kao mè kòr té, ta kare Satan nèè.

² Kade dòsò ke til dòsò nè nön mourou ang, gè té boo dè.

³ Ndjè kere dé pa are Jésus, Tokou i to Ngon lo Allah, epa are err nèn ta tél pila mourou.

⁴ Jésus tél tar pana, Maketourou lo Allah pana, To to tar lo doou ta kisi ke tébe nga mourou ke kadè ang, a to nga tar toï ke téh ta Allah té.

⁵ Tokou ban Satan ao sa béh té ke madji toï, narè nisi dè tokou kei Allah té ke ndeo.

⁶ Nè mpa narè, Tokou i to Ngon lo Allah, ekoudja ourou nange, mbata maketourou lo Allah pana, Nè na kare angedjé la ta ngemi, ke, Dèdè da laai ke djidè, na dòmadjang a gòli a kòsou err té.

⁷ Jésus pa arè, Maketourou lo Allah pa mare bai, Ase kare i naa Mbaibé Allah loi ang.

⁸ Satan tél ao sa dò err té ke ndeo nya, nè ntòdjè béh kö ke nange nèn toï ke ndokoo lodè.

⁹ Nè mpa nare Jésus, Tokou i oso nange epitim, ma ma karidè toï.

¹⁰ Tokou ban Jésus pa arè, Etél ke dang Satan, maketourou lo Allah pana, Ase kare i piti Mbaibé Allah loi, ke ta da sa kadaba.

¹¹ Tokou ban Satan ïyè, ke wo, angedjé dé rè té ta da sa.

¹² Tokou Jésus wo dila Jean kei koula té, nè ntéh nao Galilée té.

¹³ Nè nïya Nazareth nao nisi Capernaüm té, mbòr tokou man té, nange té ke Zabulon ke Naphthali.

¹⁴ Ta kare tar ke prophète Ésaïe pa leo dé to tar ke tokoro,

¹⁵ Nange ke Zabulon ke nange ke Naphthali, deo ta kao tokou man té, ke nange ke toura man Jourdain té, Galilée lo Gentildjé,

¹⁶ Dooudjé ke isi londoul té, do tokou lokarè, ke mbata dèdè ke disi loou kò ndil yo té, loou arè mbata lodè mbä.

¹⁷ Ke ndé tén lé, Jésus ounkotè ta pa tar pana, Mbetidjé kedji né da ke madjang, mbata béh kö ke dara éh ngosiba.

¹⁸ Tokou nè ndja kare tokou man Galilée té, nè no ngakö-nadjé djo, Simon ke dèdè mmarè na Pierre ke Andrè ngoköè. Dèdè dao dila boura mè man té, mbata dèdè nto ndjè ndön mandjé.

¹⁹ Jésus pa aredè, Edéidjé gom té, ma ma dasè to ndjè ndön dooudjé.

²⁰ Loshénè loshénè dèdè dïya boura lodè, dao gè té.

²¹ Tokou nè nao ndai ngadji, nè no mare ngakönadjé djo, Jacques ngon lo Zébédée ke Jean ngoköè. Dèdè disi mè to té ke bòdèdè Zébédée, dao ntòrou kem boura lodè. Jésus bardè.

²² Loshénè loshénè dèdè dïya to ke bòdèdè, dao go Jésus té.

²³ Nè ndja do nange té ke Galilée toï, nao ntòdjou tar mè kei Allah té lodè, nè mpa tar ke madji lo béh kô, ke nè nòrou rò too toï ke né toï horo dooudjé té ke da ròdè madjang.

²⁴ Tar la bar do nange té ke Syrie toï. Dèdè ndé ke ndjè rò toodjé toï rè té, dèdè ke disi ke rô too ke ongou dang dang, ke ndjè ndildjé ke madjang, ke ndjè woeidjé, ke ndjè ke oso mete, ke nè nda nare ròdè dé madji.

²⁵ Dooudjé baya baya ke Galilée, ke Décapole, ke Jérusalem, ke Judée ke toura man Jourdain té, dao gè té.