Matiye 3 - Testament ke Siki 1960 (Kabba Laka)

¹ Ndò té ke nou, Jean ndjè da baptême téh, nao mpa tar mè kòr té, nange té ke Judée.

² Nè mpana, Mbetidjé kedji né da ke madjang, mbata béh kö ke dara éh ngosiba.

³ Mbata yèn to nè ke prophète Ésaïe pa tar la, tokou nè mpana, To to ndou doou ke ourouki mè kòr té, Edaidjé deo lo Mbaibé Seigneur, Edaidjé deo la gaté gaté.

⁴ Jean oula koubou bi da djambal, ke nè ntò koulaa ndar berè té, ke né kousa la to ebètèdjé ke oubou tèdjé ke mè kòr té.

⁵ Ndè té ke nou, dooudjé ke Jérusalem ke dèdè ke Judée toï, ke dèdè ke nange té toï mbòr man Jourdain té, ntéh ndé rò Jean té.

⁶ Nè ndadè baptême mè man Jourdain té, tokou dèdè mpa né ke madjang lodè ke daka.

⁷ Tokou nè no mare Pharisiendjé ke Sadducéendjé baya ndé ta kinga baptême, nè mpa naredè, Sè ngan horomahodjé, na ndedjisè ta kaïn saria ke ata dé wa?

⁸ Anidjé kandé ke a tòdjou ke sésè mbetidjé kedji né da ke madjang mbä.

⁹ Edjidjé ta pa mèsè té ang, Abraham to bòdjèdjè, mbata ma mpa maresè, Allah ase ta da ngandjé kare Abraham ke err nèn.

¹⁰ Loshénè nèn tina to kò kake té, tokou ban kake kada kada toï ke an kandè ke madji ang, ntoukadè, diladè pouro.

¹¹ Mam ndasè baptême ke man mbata mbetidjé kedji né da ke madjang, a nè ke nao ndé gom té noutam ke singa, ma mase kwaa ndar kongou gòlè ang. Nè na dasè baptême ke Ndil ke madji toï ke pourou tò.

¹² Kaa to né to dja té, nè na kouta loou to né la, nè na mbòn kandè kongou mè dam té la, a nè na nounga kisè ke pourou ke woei ndò kada ang.

¹³ Bana Jésus ï Galilée té, nao rò Jean té mbòr man Jourdain té ta kare Jean dè baptême.

¹⁴ A Jean ata mbetè, nè mpana, To tar lom ta kinga baptême dji té, a i dé ròm té wa?

¹⁵ Jésus tél pa arè, Are eda tokou ban loshénè, mbata to madji ta kare djèdjè nda né ke gaté gaté toî ase. Tokou ban Jean ndiki gè.

¹⁶ Tokou Jésus inga baptême mbä, nè ntéh mè man té ke daka loshénè loshénè, wo, ta dara teï, nè no Ndil lo Allah disi tokou egoutou isi dè té.

¹⁷ Wo, ndou téh dara pana, Yèn to Ngonem ke mam ndikè nya, rom nèlem nya mbata la.