Matiye 28 - Testament ke Siki 1960 (Kabba Laka)

¹ Go ndò sabbat té, tokou loou nai arè ang bai, ke ndò té ke dongor ndò shiri, Marie Magdala ke mare Marie to, dèdè dao ta ko bwa yo.

² Wo, nange yè nya, mbata ange lo Mbaibé Seigneur kada ï dara dé ourou nange, nè nòrou tokou err, nè nisi dè té.

³ Kèmè to tokou ndi ke tél, koubou la to ndaa tokou kòdjou neige.

⁴ Bel da ndjè pouroudjé nya mbata la, ròdè isa, dèdè ndé tokou dooudjé ke woei.

⁵ Ange pa are dènèdjé, Edaidjé bel ang, mbata mam ngeré sésè esangidjé Jésus ke ntòlè do kake dèse té mbä.

⁶ Nè néh nèn ang, mbata nè nï mba deo kadaba tokou nè mpa leo, edéidjé woidjé loou ke Mbaibé Seigneur to kendé.

⁷ Bana abidjé ndjange, epaidjé are ndjè kao gè tédjé, nè nï mè bwa yo té mbä. Woidjé, nè nao Galilée té dongor naresè. Sésè a koèdjé nou. Woidjé, ma mpa maresè mbä.

⁸ Tokou ban dèdè dïya bwa yo loshénè ke bel ke rònèl nya, daïngòrou ta kao pa kare ndjè kao gè tédjé.

⁹ Wo, Jésus ingadè, nè mpana, Laphia. Dèdè ndé dwaa gèlè, nwalè.

¹⁰ Bana Jésus pa aredè, Edaidjé bel ang, abidjé epaidjé are ngakömdjé ta kao Galilée té, dèdè da kom nou.

¹¹ Tokou dèdè dao dao, wo mare ndjè pouroudjé ke ngem ta bwa, dao béh mpa dare tokou ndjè kòrdjé né toï ke téh.

¹² Tokou dèdè mbòna ke tokou dooudjé, dèdè ndedjina, dèdè dare narè nya ndjè pouroudjé.

¹³ Dèdè mpana, Epaidjé are dooudjé, Ndjè kao gè tédjé dé boukou ninè tokou djèdjè ntibi.

¹⁴ Tokou tar nèn oso mbi mbai té, dja djòlè, dja da kare tar oso dòsè té ang.

¹⁵ Tokou ban ndjè pouroudjé taa narè, dèdè nda tokou ntòdjoudè, ban tar nèn bar horo Juifdjé té sar bokonè.

¹⁶ A ndjè kao gè tédjé ke dòkou gérè kada dao Galilée té do tokou err té, loou ke Jésus pa aredè.

¹⁷ Tokou dèdè doè, dèdè mpitè, a maredjé mainatar.

¹⁸ Jésus dé ròdè té, nè mpa naredè, mpana, Darem singa toï ke dara ke yéh ke nange.

¹⁹ Tokou ban abidjé, edaidjé ndjè kao gom té horo gel dooudjé té toï, edaidjédè baptême ke ri Bòi, ke Ngon, ke Ndil ke madji toï.

²⁰ Etòdjidjédè ta ngem né toï ke mam ntòdjousè leo, ke woidjé, ma méh kesè ke ndò toï sar ndò té ke goukou.