Matiye 27 - Testament ke Siki 1960 (Kabba Laka)

¹ Tokou loou arè mbä, tòkou ndjè kòrdjé ke tòkou dooudjé horo dooudjé té ndedjina ta kare ntòl Jésus.

² Dèdè ntò Jésus dao sa darè Pilate, ke to ndjè kö nange.

³ Tokou Judas, ndjè ndokè, wo dèdè ngange saria yo dè té, nè mbeté kedji né da ke madjang la, nè ntél ke narè argent dòmouta rò tòkou ndjè kòrdjé té ke tòkou dooudjé.

⁴ Nè mpana, Mam nda né ke madjang mbata mam ndoko mese ke madjang goto kendé. Dèdè mpana, Yèn to tar lodjè wa? Yèn to tar loi.

⁵ Nè nila narè argent nange mè tòkou kei Allah té, nè ntéh daka. Nè nao ntò gòsè ndja ke koulaa nna tarr.

⁶ Tòkou ndjè kòrdjé oun narè argent pana, Deo tar ndedji té to madji ta kiladè sandoukou narè té ang, mbata to narè mese.

⁷ Tokou ban dèdè ndedjina horodè té, dèdè ndoko ndòò lo ndjè kouba andji ke narè nèn, ta doubou ndjè mbaadjé kendé.

⁸ Tokou ban dèdè mmar ndòò nèn, Nange mese sar bokonè.

⁹ Bana tar ke prophète Jérémie pa leo, dé to tar ke tokoro, pana, Dèdè doun narè argent dòmouta, narè ndoko doou ke mare ngandjé lo Israël toura dè té leo.

¹⁰ Dèdè daredè mbata ndòò lo ndjè kouba andji, deo kadaba tokou Mbaibé Seigneur tòdjoum.

¹¹ Bana Jésus arr nò ndjè kö nange té, ndjè kö nange doudjè, I to Mbaibé lo Juifdjé wa? Jésus pa arè, I pa ban.

¹² Tokou tokou ndjè kòrdjé ke tokou dooudjé ntoula dè, nè ntél tar kada ang.

¹³ Bana Pilate pa arè, I wo tar ke baya ke dèdè mpa dòi té ang wa?

¹⁴ Nè ntél mpa tar kada narè ang, ntél tar dò tar toula kada ang, tokou ban mè ndjè kö nange edji nya.

¹⁵ Bana ke ndò tokou mourou té toï, to tar lo ndjè kö nange ta kòrou ndjè kei koula kada kare dooudjé ke baya, nè ke dèdè ndikè.

¹⁶ Ndò té ke nou, dèdè déh ke tòkou ndjè kei koula kada, ria na Barabbas.

¹⁷ Tokou ban, tokou dèdè mbòna mbä, Pilate pa aredè, Sésè ndikimdjé ta kòrou na karesè wa, Barabbas aséh Jésus, nè ke mmarè na Christ?

¹⁸ Mbata nè ngeré dèdè dare Jésus dja tè mbata mè dadè.

¹⁹ Tokou nè nai nisi dò ngèndé gange saria té, dènè la oula rè té pana, Eda né kada ke doou ke gaté gaté nèn ang, mbata ma minga ongou nya mbata la bokonè ke ni.

²⁰ A tòkou ndjè kòrdjé ke tòkou dooudjé ndedji dooudjé ta doudjou mbata Barabbas, ke ta tòl Jésus.

²¹ Ndjè kö nange pa aredè mare bai, Sésè ndikimdjé ta kòrou na karesè horodè té ke djo nèn wa? Dèdè mpana, Barabbas.

²² Pilate pa aredè, Bana mam nda di ke Jésus, nè ke mmarè na Christ wa?

²³ Dèdè toï mpana, Are ntòlè dò kake dèse té. Nè mpana, Mbata di wa, nè nda né ke madjang di wa? A dèdè mpa ke tarr wota, Are ntòlè dò kake dèse té.

²⁴ Tokou ban, tokou Pilate wo nè nda pi, a boula nya ao ï, nè noun man, nè ntoko dja nò dooudjé té ke baya mpana, Tar mese lo doou ke gaté gaté nèn òrou dòm ang, to tar losè ndja.

²⁵ Dooudjé toï tél tar pana, Are mese la to dòdjè té ke dò ngandjé té.

²⁶ Tokou ban nè nòrou Barabbas naredè. Gè té a nè nounda Jésus ke djoula, nè nwèè naredè ta kare ntòlè dò kake dèse té.

²⁷ Bana ndjè pouroudjé lo ndjè kö nange ao ke Jésus mè kei gange saria té, dèdè mbòn ndjè pouroudjé lodè toï nòè té.

²⁸ Dèdè dòrou koubou la toï, doula tokou koubou ke kasè rè té.

²⁹ Dèdè doudjou djòkedò konn, doula dè té, dèdè doula kòbou dja té ke kòl. Dèdè dongou mekedjé gòldè nange nòè té, dèdè nkoukè mpana, Laphia, Mbaibé lo Juifdjé.

³⁰ Dèdè ntiwëré kèmè té, dèdè ntaa kòbou ntounda dè.

³¹ Gè té ke dèdè nkoukè mba, dèdè dòrou tokou koubou, dèdè doula koubou la ndja rè té, ke dèdè dao sa ta tòlè do kake dèse té.

³² Tokou dèdè dao ndja daka, dèdè dinga doou kada ke Cyrène, ria na Simon, dèdè dwaa doou nèn ta karè noto kake dèse lo Jésus.

³³ Tokou dèdè ntéh loou té ke mmarè na Golgotha, ke pana, Loou singa do,

³⁴ Dèdè darè vin ke dèdè mpolè ke keiël ta kare naih, a tokou nè nnaa, nè mbeté ta kaih.

³⁵ Tokou dèdè ntòlè do kake dèse té mba, dèdè nkai koubou la horodè té deo dòò né mbadi té.

³⁶ Bana dèdè disi nange, dèdè ngemè nou.

³⁷ Do loou ke dè té, dèdè dounda maketourou gange saria la ke pana, Yèn to Jésus Mbaibé lo Juifdjé.

³⁸ Bana dèdè ntòl ndjè boukoudjé djo do kake dèse té sa, kada er kòl, kada er gèl.

³⁹ Dèdè ke ndai nou nkoukè, doun dòdè,

⁴⁰ Dèdè mpana, I ke ndiki ta toudjou tokou kei Allah, ke ta da marè ke ndò mouta, adji ròi ndja. Tokou i to Ngon lo Allah, edisi nange ke do kake dèse té.

⁴¹ Tòkou ndjè kòrdjé ke ndjè da maketourou ndedjidjé ke tokou dooudjé nkoukè ban to, mpana,

⁴² Nè nadji mare dooudjé, nè nase kadji rè ndja ang. Nè nto Mbaibé lo Israël, are nè ndisi nange ke do kake dèse té loshénè, a djèdjè dja ko mèdjè té sa.

⁴³ Nè nounda mèa do Allah té, are Allah adjè bashénè tokou nè ndiki gè sa, mbata nè mpana, Mam nto Ngon lo Allah.

⁴⁴ Ndjè boukoudjé ke dèdè ntòldè dò kake té sa, dèdè ntadjè deo kadaba tokou ban tò.

⁴⁵ Bana tokou kade arr dana ase misä, loou ndoul dò nange té toï nderèng kade tél ase djikada.

⁴⁶ Ke kade djikada Jésus pa ke tarr, Éli, Éli, lama sabachthani? Yèn pana, Allah lom, Allah lom, mbata di a i ïyam nga wa?

⁴⁷ Mare dooudjé ke arr ngosiba nou, tokou dèdè do tar nèn, dèdè mpana, Doou nèn bar Élie.

⁴⁸ Kada ke horodè té aïngòrou loshénè loshénè, noun kougal dousou ke vin ke mase, nto ke kòbou noula ta karè naih.

⁴⁹ Maredjé toï pana, ïya, aredjè djo tokou Élie a dé ta kadjè.

⁵⁰ Jésus pa ke tarr marè wota, ke noula ndil la.

⁵¹ Wo, tokou koubou mè tokou kei Allah té tir dana djo, ï tarr tir nderèng òrou nange. Nange yè ke err ria.

⁵² Ta bwa yo teï, ke mare rò ndjè ko mè tédjé nya ke woei leo ï.

⁵³ Tokou Jésus ï mba nga dèdè ntéh bwa yo té ke daka, dèdè dao mè béh té ke madji toï, dèdè ntéh no dooudjé té ke baya.

⁵⁴ Tokou ndjè ngem ndjè pouroudjé ke dèdè ke déh sa ke dao ngem Jésus, do nange yè ke né ke téh, bel dadè nya, dèdè mpana, Tokoro doou nèn to Ngon lo Allah.

⁵⁵ Dènèdjé baya éh tén to, dèdè darr dèbè eo ta ko tar, dèdè ke dï Galilée té dao go Jésus té nda sa.

⁵⁶ Marie Magdala, ke Marie ko Jacques ke Joseph, ke ko ngandjé lo Zébédée éh horodè té.

⁵⁷ Tokou kade woei mba, doou ke ndjè né kinga ke Arimathée dé, ria na Joseph, nè ndja nto ndjè kao go Jésus té to.

⁵⁸ Nè nao rò Pilate té, ndoudjè mbata nin Jésus. Bana Pilate are tè ta karè.

⁵⁹ Joseph oun nin lé, nè nkè ke koubou lin ke madji.

⁶⁰ Nè ndoubè mè bwa yo té la ndja, ke nè nourou mè tokou err té leo, nè nila tokou err ta bwa yo tén, nè nao.

⁶¹ Marie Magdala ke mare Marie, dèdè déh nou, disi mbòr bwa yo té.

⁶² Ke bara, ke to ndò gè té ndò da né Pâque, tokou ndjè kòrdjé ke Pharisiendjé mbona rò Pilate té.

⁶³ Dèdè mpana, Mbai, mèdjè olè do tar té ke ndjè kere ngem nèn pa tokou nè nisi kem ba, Gè té ndò mouta ma ma kï.

⁶⁴ Tokou ban are tai ta kare ngem dòbarè ngeng nderèng ase ndò mouta, mbata dòmadjang a ndjè kao gè tédjé a dé boukou ninè, baa da pa kare dooudjé, Nè nï mè bwa yo té mba, bana tar ngem ke goukou a to madjang wota yéh ke dongor.

⁶⁵ Pilate pa aredè, Sésè éhdjé ke ndjè pouroudjé ta ngem, abidjé, ngemidjé tokou sésè asidjé.

⁶⁶ Tokou ban dèdè dao, dèdè doutou ta bwa yo ngeng ke err ke rëté kèmè, ke ndjè pouroudjé ta ngem éh kedè.