Matiye 26 - Testament ke Siki 1960 (Kabba Laka)

¹ Tokou Jésus eo ta pa tar nèn toï, nè mpa nare ndjè kao gè tédjé,

² Sésè egeridjé gè té ndò djo ndò Pâque a dé, ke da kwaa Ngon lo doou ta tòlè dò kake dèse té.

³ Bana tòkou ndjè kòrdjé ke tòkou dooudjé ke horo dooudjé té mbòna mè kei té lo mbai lo ndjè kòrdjé, ria na Caïphe.

⁴ Dèdè ndedjina horodè té ta kwaa Jésus ke gousou ta tòlè.

⁵ A dèdè mpana, Ke ndò mourou té ang, na kare dooudjé ounda boula.

⁶ Ndò ke Jésus éh Béthanie mè kei té lo Simon ndjè bandji,

⁷ Dènè kada dé rè té ke kou albatre ke dousou ke yambo ke ndoko ke narè nya. Nè nongou yamb o dò Jésus té tokou nè nisi ta table té.

⁸ Tokou ndjè kao gè tédjé wo né nèn, mèdè toodè nya mpana, Né nèn ntoudjou ban mbata di wa?

⁹ Mbata dase labe ndoko yambo nèn ta kinga narè nya, ta kai narè dangetédjé.

¹⁰ A mbata Jésus geré né nèn, nè mpa naredè, Edaidjé ongou ke dènè nèn mbata di wa? Mbata nè nda né ke madji narem.

¹¹ Mbata dangetédjé éh kesè ke ndò toï, a ma misi kesè ke ndò toï ang.

¹² Né ke nè nda mbata nè nongou yambo nèn rom té, nè nda rom ta doubou ninim.

¹³ Tokoro ma mpa maresè, loou toï ke da pa tar ke madji nèn do nange té nèn toï, da pa tar né ke dènè nèn da mbata kedji do tar té la.

¹⁴ Bana kada horodè té ke dòkou gérè djo, ria na Judas Iscariot, ao rò tokou ndjè kòrdjé té.

¹⁵ Nè mpana, Sésè aremdjé di tokou mam nwèè maresè wa? Dèdè darè narè argent dòmouta.

¹⁶ Lé té ndja nè nsange deo ke madji ta ndokè.

¹⁷ Ke ndò té ke dongor ndò mourou ke nda ke oum ang, ndjè kao go Jésus tédjé dé rè té pana, I ndikidjè ta da né loou té ke da wa, ta kari ön mourou Pâque?

¹⁸ Nè mpana, Abidjé mè béh té ke rò doou té kada, epaidjé arè. Ndjè tòdjou tar pana, Ndò lom éh ngosiba, ma ma kon mourou Pâque mè kei té loi ke ndjè kao gom tédjé.

¹⁹ Ndjè kao gè tédjé da tokou Jésus tòdjoudè, dèdè nda mourou Pâque.

²⁰ Tokou kade woei mba, nè nisi ta table té ke ndjè kao gè tédjé dòkou gérè djo.

²¹ Tokou dèdè dao dön mourou, nè mpana, Tokoro ma mpa maresè, kada horosè té a ndokom.

²² Ongou dadè nya, dounkotè ta pa karè kada kada, Sè ma wa, Mbaibé Seigneur?

²³ Nè ntél tar mpana, Nè ke noula dja mè kaa té naaté sem, nè na ndokom.

²⁴ Ngon lo doou ao deo kadaba tokou maketourou lo Allah pa tar la, a ongou a kö doou ke ndoko Ngon lo doou. To madji wota kare doudjou dooun lé ang.

²⁵ Judas, nè ke ndokè, pana, Sè ma wa, Ndjè tòdjou tar? Nè mpa narè, I pa ban mba.

²⁶ Tokou dèdè dao dön mourou, Jésus oun mourou, nè mmar tar ke madji dè té, nè nkai nare ndjè kao gè tédjé mpana, Etaaidjé, öndjé, yèn to rom.

²⁷ Nè noun ngonarè, tokou nè nda woio mba, nè naredè mpana, Aihdjé kendé sésè toï.

²⁸ Mbata yèn to mesem mbata tar kwaana medji ke siki, mesem ke ongou nange mbata dooudjé baya, ta kïya né ke madjang.

²⁹ Ma mpa maresè, ma ma kaih man kandé ndouou nèn marè ang nga, nderèng ndè tén lé ke ma maih kesè ke siki mè béh ko té lo Bòi.

³⁰ Gè té goukoudang dèdè dòsou pa lo Allah kada, dèdè ntéh daka, dao kare err Olivier té.

³¹ Bana Jésus pa aredè, Ma ma to né kare mèsè toosè tilti nèn, mbata maketourou lo Allah pa, Ma ma kounda ndjè koul batidjé, ke batidjé ke koutou a särèna loou té ke dang dang.

³² A gè té ma mï mbä nga, ma ma kao Galilée té dongor karesè.

³³ Pierre pa ke tarr arè, Tokou mèdè toï a toodè sei, ma, mem a toom sei ngadji ang.

³⁴ Jésus pa arè, Tokoro ma mpa mari, tilti nèn ndja, dongor könra no, i a mbetem gar mouta.

³⁵ Pierre pa arè, Tokou to tar lom ta kwoei sei, ma ma mbeti ang. Ndjè kao gè tédjé toï pa tar tokou ban.

³⁶ Bana Jésus ao kedè loou té ke ria na Gethsémané, nè mpa nare ndjè kao gè tédjé, Isidjé nèn, tokou ma mao yon, mam ndoudjou Allah.

³⁷ Nè nare Pierre ke ngandjé lo Zébédée djo dao sa, ongou ao dousou mèa ke mèa öè.

³⁸ Bana nè mpa naredè, Mem isi ke ongou nya ngosiba ta kwoei, isidjé nèn, ngemidjé sem.

³⁹ Nè ndai ngadji, noso ke natenè nange, nè ndoudjou Allah mpana, Bòi, tokou ase ta kare da tokou ban, are ngonarè nèn ndai dòm té, a eda né ke mam ndiki ang, eda né ke i ndja ndiki.

⁴⁰ Nè ndé rò ndjè kao gè tédjé, nè nodè dao ntibi, nè mpa nare Pierre, Di wa, i ase ta ngem sem ngadji ang wa?

⁴¹ Ngemidjé, edoudjidjé Allah baa ta kare osoidjé né kere té ang, mbata ndil ndiki tokoro, a da rò isi ke singa ang.

⁴² Nè ntél nao ndoudjou Allah mare bai gar djo, Bòi, tokou yèn ase ta ndai ang baa ma maih, eda né ke i ndiki.

⁴³ Nè ntél mare bai, nodè dao ntibi mbata bi dadè nya.

⁴⁴ Tokou nè nïyadè mare bai, nè nao ndoudjou Allah gar mouta, nè mpa tar deo kadaba tokou nè mpa dongor.

⁴⁵ Bana nè ndé rò ndjè kao gè tédjé, nè mpa naredè, Ao tibidjé, ao waaidjé ròsè bai wa? Woidjé, ndò ase mbä, ndoko Ngon lo doou dji dooudjé té ke ndjè né da ke madjang.

⁴⁶ Idjé tarr, djao, woidjé ndjè ndokom ao dé ngosiba.

⁴⁷ Tokou nè nao mpa tar bai, Judas dé, doou ke horodè té ke dòkou gérè djo, dooudjé dé sa baya baya ke kiaa ke kake, dèdè ke tokou ndjè kòrdjé ke tokou dooudjé douladè.

⁴⁸ Doou ke ndjè ndoko Jésus aredè né tòdjou, nè mpana, Doou ke mam nto mbia, yèn a to nè, wèèdjé.

⁴⁹ Nè ndé rò Jésus té bashénè ba mpana, Laphia Ndjè tòdjou tar. Nè nto mbia.

⁵⁰ Jésus pa arè, Nam, eda né ke i dé ta da. Bana dèdè ndé doula djidè dwaa Jésus.

⁵¹ Wo, doou kada horodè té ke éh ke Jésus, oula dja òrou kiaa la touka mbi bere lo mbai lo ndjè kòrdjé gange.

⁵² Jésus pa arè, Etél oula kiaa loi bòlè té, mbata dè dè toï ke doun kiaa da kwoei deo kiaa té.

⁵³ Edjidjé ke ma mase doudjou Bòi ang wa, ke bashénè ba nè na koula angedjé baya baya gar dòkou gérè djo?

⁵⁴ A tokou ban maketourou lo Allah a dé to tar ke tokoro deo té ke da wa, ke pana ase ta dé tokou ban?

⁵⁵ Lé té ndja Jésus pa are dooudjé ke baya baya, Sésè edéidjé ao sangemdjé tokou ndjè boukou ke kiaa ke kake ta kwaam wa? Ke ndò ke ndò ma misi mè tokou kei Allah té ntòdjou tar, a sésè waamdjé ang.

⁵⁶ A né nèn toï dé baa ta kare maketourou lo prophètedjé dé to tar ke tokoro. Bana ndjè kao gè tédjé toï ïyè, daïn.

⁵⁷ Bana dèdè ke dwaa Jésus dao sa rò Caïphe té, mbai lo ndjè kòrdjé, loou té ke ndjè da maketourou ndedjidjé ke tokou dooudjé mbòna kendé.

⁵⁸ Pierre ao gè té ngosi ang, nao nderèng mè ndooko té lo mbai lo ndjè kòrdjé, nè nao mè té nisi ke padjadjé ta ko deo ke tar nèn a tounga.

⁵⁹ Tokou ndjè kòrdjé ke ndjè gange sariadjé toï nsange tar nadji ngem do Jésus té, ta karedè deo ta tòlè.

⁶⁰ A dèdè dinga kada ang, lé ndjè pa tar nadji ngem baya téh. Gè té goukou maredjé djo téh,

⁶¹ Dèdè mpana, Doou nèn pana, Ma mase toudjou tokou kei Allah, ke ta da marè bai ke ndò mouta.

⁶² Mbai lo ndjè kòrdjé ï tarr, nè mpana, I éh ke tar ta tél ang wa? Yèn to di a dèdè dao mpa dòi té wa?

⁶³ A Jésus isi tè moundou. Mbai lo ndjè kòrdjé pa arè, Mam ndoudji ke ri lo Allah ke tébe, epa aredjè tokou i to Christ ndja, Ngon lo Allah.

⁶⁴ Jésus pa arè, I pa ban mbä. A ma mpa maresè, gè té goukou nèn, sésè a koidjé Ngon lo doou tokou nè nisi dò dji kòl té ke singa lo Allah, ke nao ndé dò ndi té ke il ke dara.

⁶⁵ Bana mbai lo ndjè kòrdjé tir koubou la pana, Nè mpa tar sä. Djèdjè ndiki mare ndjè pa tar nadji mbata di wa? Sésè woidjé tar sä ke nè mpa loshénè.

⁶⁶ Egangidjé tar di wa? Dèdè ntél tar mpana, Nè nase ta kwoei.

⁶⁷ Bana dèdè ntiwëré kèmè té, ntoundè ke maredjé toundè ke dabala djidè.

⁶⁸ Dèdè mpana, Epa ke daka aredjè, i Christ, na toundai wa?

⁶⁹ Pierre isi ke daka mè ndooko té, ngonlokisi ke dènè kada dé rè té. Nè mpana, I éh ke Jésus doou ke Galilée té tò.

⁷⁰ Nè mmai nòdè té toï mpana, Tar ke i pa mam ngeré ang.

⁷¹ Tokou nè nao daka kare kei té, mare ngonlokisi ke dènè woè. Nè mpa nare dooudjé ke arr ngosiba, Doou nèn éh ke Jésus ke Nazareth tò.

⁷² Nè mmai mare bai ke koubou yo, Mam ngeré doou nèn ang.

⁷³ Gè té ngadji dooudjé ke arr ngosiba dé rò Pierre té pana, Tokoro, i to kada horodè té tò, mbata tar ke i pa tòdjou tar loi.

⁷⁴ Bana nè noubou yo dè té ndja, nè ntadji mpana, Mam ngeré doou nèn ang. Loshénè loshénè könra nò.

⁷⁵ Pierre edji tar ke Jésus pa, Dongor könra nò, i a mbetem gar mouta. Nè nao daka, nè nnò ke man kèmè ke ongou.