Matiye 22 - Testament ke Siki 1960 (Kabba Laka)

¹ Jésus pa aredè mare bai ke tar gousou, pana,

² Béh kö ke dara asena ke mare mbaibé kada ke da mourou kisi kei mbata ngonè ke dingao.

³ Nè noula beredjé la ta bar dèdè ke nè ndoudjoudè ta kon mourou kisi kei, a dèdè ndiki ta dé ang.

⁴ Nè ntél noula mare beredjé bai mpana, Epaidjé aredè, dèdè ke mam ndoudjoudè ta dé, Woidjé mam nda mourou lom ase toï mba, mam ntòl mangedjé ke né kouldjé ke eme, né toï ase mba. Edéidjé ta kon mourou kisi kei.

⁵ Dèdè do tar tokou tar ke ba, dao deo té lodè ndja, kada ao mè ndoo té la, marè ao kei ndoko né té la.

⁶ Maredjé waa beredjé la dadè madjang nya, ke ntòldè.

⁷ Ongou da mbaibé nya, nè noula ndjè pouroudjé la ntòl ndjè toï dooudjé nèn, ke nè ënro béh lodè.

⁸ Bana nè mpa nare beredjé la, Mourou kisi kei ase mba, a dèdè ke mam ndoudjoudè dongor, dèdè dase ang.

⁹ Tokou ban abidjé to deo té, edoudjidjé dooudjé toï ke ingaidjédè ta dé kon mourou kisi kei.

¹⁰ Beredjén lé ao deo bo mbòn dooudjé toï ke dingadè, ndjè ke madjang ke ndjè ke madji to, tokou ban kei dènè dousou ke ndjè ke mmardè.

¹¹ A tokou mbaibé dé mè kei té ta ko ndjè ke mmardè, nè no doou kada nou ke oula koubou mourou kisi kei ang.

¹² Nè mpa narè, Nam, i dé mè kei té ke deo di wa, tokou koubou mourou kisi kei goto? Nè nòrou tè ka ang.

¹³ Bana mbaibé pa are nganlokisidjé la, Etoidjé dja ke gòlè, ilèdjé londoul té ke daka. Loou té ke nou dooudjé a nò ke man kemdè ke da kousa ngangedè.

¹⁴ Mbata mmar dooudjé tokou baya, a mbere kada kada ba.

¹⁵ Bana Pharisiendjé ao toulana ta sangè ke tar ke tè té.

¹⁶ Dèdè doula ndjè kao godè té deo kadaba ke Hérodiendjé, dèdè mpana, Ndjè tòdjou tar, djèdjè ngeré i to doou ke gaté gaté, ke tòdjou deo tar lo Allah ke tokoro, ke i éh ke ròkoul lo doou kada ang, mbata i wo da rò dooudjé ang.

¹⁷ Tokou ban epa aredjè né ke i wo madji. Tar ndedji pana ase ta kouka lʼimpôt kare César aséh ta kouka ang wa?

¹⁸ Jésus geré gousou lodè, nè mpana, Mbata di a sésè naamdjé wa, sè ndjè kere ngemdjé?

¹⁹ Etòdjoumdjé narè lʼimpôt. Dèdè ndé ke narè kada darè.

²⁰ Jésus pa aredè, Né ke dounda narè tén, ke ri ke kendé to to lo doou ke da wa?

²¹ Dèdè mpa darè, To to lo César. Tokou ban nè mpa naredè, Aridjé César né ke to lo César, aridjé Allah né ke to lo Allah.

²² Tokou dèdè do tar nèn, mèdè ounda dò biä. Dèdè dïyè, dao loou té ke dang.

²³ Ndè tén ndja, Sadducéendjé dé rè té, dèdè ke mpana kï lo dooudjé bwa yo té goto. Dèdè ndoudjè tar,

²⁴ Mpana, Ndjè tòdjou tar, Moïse pana, Tokou doou woei, tokou nganè goto to tar lo ngoköè ta taa dènè la, ta koudjou nè ngandjé tourou ngoköè té.

²⁵ Bana ngakönadjé shiri éh horodjè té leo, yéh ke dongor taa dènè, nè noei, ke mbata nganè goto nïya dènè la nare ngoköè.

²⁶ Ngoköè ke djo ke yéh ke mouta da ban tò nderèng dèdè shiri toï.

²⁷ Gè té dèdè toï dènèn lé woei.

²⁸ Tokou ban ndò kï mè bwa yo té, dènèn lé a dé to dènè lo na horodè té ke shirin lé wa? Mbata dèdè toï ntèè to dènè leo.

²⁹ Jésus tél tar aredè pana, Sésè éhdjé ke tar ke tokoro ang, mbata sésè egeridjé maketourou lo Allah aséh singa lo Allah ang.

³⁰ Mbata ndò kï mè bwa yo té, da taa dènè ang ke da kare dènè ngao ang, a dèdè da to tokou angedjé ke dara.

³¹ A tar kï mè bwa yo té, etouraidjé né ke Allah pa aresè leo ang wa, tokou nè mpana,

³² Mam nto Allah lo Abraham, ke Allah lo Isaac, ke Allah lo Jacob? Nè nto to Allah lo ndjè yodjé ang, nè nto to Allah lo ndjè ke kem.

³³ Tokou dooudjé ke baya baya wo tar nèn, mèdè ounda do biä mbata tar ke Jésus tòdjou.

³⁴ Tokou Pharisiendjé wo tokou Jésus eo rè tar lo Sadducéendjé mba nga, dèdè mbona.

³⁵ Mare kada horodè té ke to ndjè da maketourou ndedji, doudjè tar ta nèè.

³⁶ Ndjè tòdjou tar, tokou tar ndedji di a bo wota marè mè maketourou ndedji té wa?

³⁷ Jésus pa arè, Ase kare ndiki Mbaibé Allah loi ke mei toï, ke ndil loi toï, ke kedji loi toï,

³⁸ Yèn to tokou tar ndedji ke dongor ke bo wota.

³⁹ Tar ndedji ke djo tokou lo marè éh nèn, Ase kare i ndiki doou ke ndjè nin kei mari tokou i ndiki ròi ndja.

⁴⁰ Tar ndedji toï ke prophètedjé to do tar ndedji té ke djo nèn.

⁴¹ Tokou Pharisiendjé ke mbona nai loou kadaba, Jésus doudjoudè tar,

⁴² Nè mpana, Mèsè edjidjéna di mbata lo Christ wa? Nè nto ngon lo na wa? Dèdè mpa darè, Ngon lo David.

⁴³ Nè mpa naredè, Tokou ban a deo té lo Ndil David barè Mbaibé Seigneur deo di té wa, tokou nè mpana,

⁴⁴ Mbaibé Seigneur pa ke Mbaibé Seigneur lom, Isi do dji kòlem té, sar mam nda ndjè kembaadjé loi kare dèdè disi ko gòli té.

⁴⁵ Tokou David barè na Mbaibé Seigneur, a deo di a nè nto ngonè wa?

⁴⁶ Doou kada ase tél tar ang, ke gè tén sar mare ndò, doou kada ase doudjè mare tar ang.