Matiye 21 - Testament ke Siki 1960 (Kabba Laka)

¹ Tokou dèdè ndé ngosiba ke Jérusalem, ke dèdè ntéh Bethphagé té, ke err Olivier té, Jésus oula ndjè kao gè tédjé djo.

² Nè mpa naredè, Abidjé béh té ke to nòsè té, loshénè loshénè sésè a koidjé kororo ke ntèè, ke ngonè éh sa, etoutidjédè, edéidjé kedè rom té.

³ Tokou mare doou kada pa tar kesè, epaidjéna, Mbaibé Seigneur ndja ndikidè, nè na karedè ndé loshénè loshénè.

⁴ Nda né ban ta kare tar ke prophète pa leo dé to tar ke tokoro, pana,

⁵ Epa are ngon ke dènè ke Sion, Wo, mbaibé loi ao dé ròi té, Ke mèa ke to dèkèkè, nè nisi do kororo té, do bao, ngon kororo té.

⁶ Ndjè kao gè tédjé ao da tokou Jésus pa aredè.

⁷ Dèdè ndé ke kororo ke ngon kororo, dèdè dongou koubou lodè dèdè té, ke Jésus isi dè té.

⁸ Mare dooudjé ke baya baya nadji koubou lodè deo bo, maredjé tete kam kake labe deo bo.

⁹ Dooudjé ke baya baya ke ao kèté ke dèdè ke dao goukou, dèdè mpa ke tarr, mpana, Hosanna ke Ngon lo David. Madji éh ke nè ke ndé ke ri lo Mbaibé Seigneur. Hosanna ke loou té ke tarr wota toï.

¹⁰ Tokou nè ntéh mè béh Jérusalem té, boula dousou mè béh té toï, dèdè mpana, Yèn to na wa?

¹¹ Dooudjé ke baya baya pana, Yèn to prophète Jésus ke Nazareth, ke Galilée té.

¹² Jésus ande tokou kei Allah té, nè ntouba ndjè né labedjé toï, ke dèdè toï ke ndoko né mè tokou kei Allah té. Nè ntila table lo dooudjé ke ao mbel narè, ke ntila ngèndé lo ndjè ke labe derdjé.

¹³ Nè mpa naredè, Maketourou lo Allah pana, Da bar kei lom kei doudjou Allah. Sésè edaidjé to boudja boukou.

¹⁴ Ndjè kem tèdjé ke ndjè ke oso mete ndé rè té mè tokou kei Allah té, nè nda nare ròdè dé madji.

¹⁵ Tokou tokou ndjè kòrdjé ke ndjè da maketourou ndedjidjé do né ke nda, ke ngandjé ke mpa ke tarr mè tòkou kei Allah té, Hosanna ke Ngon lo David, mèdè toodè nya.

¹⁶ Dèdè mpa dare Jésus, I wo tar ke dèdè mpa wa? Jésus pa aredè, Aä, sésè etouraidjé maketourou ndò kada ang wa, I are piti ke gaté gaté téh ta ngandjé ke kasè, ke ngandjé ke il mba.

¹⁷ Nè nïyadè, nè ntéh daka mè béh tén, nao Béthanie té, nè nto nou.

¹⁸ Ke sindò tokou nè nao ntél ke mè béh tén, boo dè.

¹⁹ Nè no kake toungoutisa mbòr deo té, nè nao rè té, nè ninga né kada ang sè kamè ba. Nè mpa narè, Ase kare i an kandé mare ndè kada ang. Kake toungoutisan lé toutou ke lé té ndja loshénè loshénè.

²⁰ Tokou ndjè kao gè tédjé wo né nèn, mèdè edji nya mpana, Kake toungoutisan lé toutou ke lé té ndja loshénè loshénè deo di té wa?

²¹ Jésus tél tar aredè pana, Tokoro ma mpa maresè, tokou sésè woidjé mèsè té ke emaidjé tar ndè kada ang, sésè a daidjé né ke nda ke kake toungoutisa nèn ke kadè ang, a tokou sésè epaidjé ke err nèn, I tarr, oso mè tòkou man katé té, nè na da ban.

²² Né dang dang toï ke sésè edoudjidjé deo doudjou Allah té, sésè a kingaidjé tokou sésè éhdjé ke ko mè té.

²³ Tokou nè nande mè tòkou kei Allah té, tòkou ndjè kòrdjé ke tòkou dooudjé lo dooudjé ndé rè té tokou nè nao ntòdjou tar. Dèdè mpana, I da né nèn ke ri na wa, aséh na ari tè tokou ban wa?

²⁴ Jésus tél tar aredè pana, Ma ma doudjousè tar kada tè, tokou sésè etélidjé tar epaidjé arem, bana ma ma pa karesè ke ri na baa mam nda né nèn tè.

²⁵ Baptême lo Jean ï da wa? Ke dara aséh lo dooudjé wa? Dèdè mmaitar horodè té, Tokou djèdjè mpana, Ke dara, nè na pa karedjè, Mbata di baa woidjé tar la mèsè té ang wa?

²⁶ A tokou djèdjè mpana, Lo dooudjé, bel dadjè mbata lo dooudjé ke baya baya, mbata dèdè toï mpana Jean to prophète.

²⁷ Tokou ban dèdè ntél ke tar dare Jésus, Djèdjè ngeré ang. Nè mpa naredè, Ma ma pa karesè ang to ke ri na mam nda né nèn.

²⁸ Sésè edjidjéna di wa? Mare doou éh ke ngandjé ke dingao djo. Nè nao rò ngon té ke dongor mpana, Ngonem, ao da koula mè ndoo kake ndouou té bokonè.

²⁹ Nè ntél tar mpana, Mam ndiki ang, a gè té nè mbeté kedji né da ke madjang la, nè nao.

³⁰ Nè nao rò ngon té ke djokem, nè mpa deo kadaba. Ngon tél tar pana, Ma mao Bòi, a nè nao ang.

³¹ Ke horodè té ke djo, na da tokou bèdjè ndiki wa? Dèdè mpana, Yéh ke dongor. Jésus pa aredè, Tokoro ma mpa maresè, ndjè taa narè lʼimpôtdjé ke dènè kaiyadjé dao mè béh ko té lo Allah dongor daresè.

³² Mbata Jean dé ròsè té deo té ke gaté gaté, ke sésè woidjé mèsè té sa ang, a ndjè taa narè lʼimpôtdjé ke dènè kaiyadjé do mèdè té sa. Lé gè té tokou sésè woidjé né nèn, sésè mbetidjé kedji né da ke madjang losè ang, ke woidjé mèsè té sa ang.

³³ Woidjé mare tar gousou. Leo ndjè kei kada éh tén ke doubou ndoo kake ndouou. Nè nila singaa girè té. Nè nourou bwa mbata tokou biri korè né man kandè kendé. Nè nda kei ke ngal, nè nïyè nare mare dooudjé ta kare ngem. Nè nao mare béh té ke dang.

³⁴ Tokou nai koudja kandé ndouou dé ngosiba, nè noula beredjé la rò dooudjé té ke ndjè ngem ndoo ta taa kandé.

³⁵ Dooudjé ke ndjè ngem ndoo waa beredjé la, dèdè ntounda kada, ntòl marè, ke ntila marè ke err.

³⁶ Ndjè kei oula mare beredjé baya wota yéh ke dongor, dèdè nda deo kadaba kedè to.

³⁷ Gè té nè noula ngonè ke dingao ròdè té, mpana, Dèdè da da bel lo ngonem.

³⁸ Tokou dooudjé ke ndjè ngem ndoo wo ngonè, dèdè mpana horodè té, Yèn to ndjè kwaa né ndouba, edéidjé, aredjè ntòlè, dja kwaa né ndouba la.

³⁹ Dèdè dwèè dilè ngange ndoo kake ndouou té, dèdè ntòlè.

⁴⁰ Tokou ban tokou ndjè ndoo kake ndouou dé, nè na da di ke ndjè ngem ndoo nèn wa?

⁴¹ Dèdè mpa darè, Nè na tòï ndjè ke madjang nèn ke yo ke madjang, ke nè na kare ndoo kake ndouou nèn mare dooudjé ke ndjè ngem ndoo, dèdè ke da karè kandè ke nai lodè ndja.

⁴² Jésus pa aredè, Sésè etouraidjé mè maketourou té lo Allah ang bai, Err ndja ke dooudjé ke ndjè da kei mbeté mba, dé to tokou kikil kei. Yèn to né ke Mbaibé Seigneur da ke to madji nya kemdjè té?

⁴³ Tokou ban ma mpa maresè, da kòrou béh ko lo Allah djisè té, da karè dji gel dooudjé té ke a tél karè kandè.

⁴⁴ Doou ke oso do err tén a tete rè, a tokou errn lé oso do doou té nè na gourou rè.

⁴⁵ Tokou tokou ndjè kòrdjé ke Pharisiendjé do tar gousou la, dèdè ngeré nè mpa dèdè té ndja.

⁴⁶ A tokou dèdè nsange ta kwèè, bel dadè mbata dooudjé ke baya baya, mbata dooudjé woè tokou lo prophète.