Matiye 20 - Testament ke Siki 1960 (Kabba Laka)

¹ Mbata béh kö ke dara to tokou ndjè kei ke téh daka ke sindò ta doudjou ndjè kouladjé mbata ndòò kake ndouou la.

² Gè té nè ndiki gè kedè mbata narè denier kada ke ndò kada, nè naredè dao mè ndòò kake ndouou té la.

³ Tokou kade ï dél ase mouta nè nao daka, nè no mare dooudjé ke arr nata té ba.

⁴ Nè mpa naredè, Abidjé mè ndòò kake ndouou té tò, ke ma ma karesè né ke to gaté gaté. Tokou ban dèdè dao.

⁵ Tokou nè nao daka mare bai tokou kade arr dana ase misä, ke tokou kade tél ase djikada, nè nda deo kadaba.

⁶ Ke lowoul té tokou kade ase dòkou gérè kada nè nao daka, nè no maredjé arr ba, nè mpa naredè, Mbata di a sésè arridjé ba nèn kade toï wa?

⁷ Dèdè mpa darè, Mbata doou kada aredjè koula ang. Nè mpa naredè, Abidjé mè ndòò kake ndouou té tò.

⁸ Tokou kade woei mbä, ndjè ndòò pa are doou ke ndjè ngem né la, Ebar ndjè kouladjé aredè kouka lodè, ounkotè ke ndjè ke goukou nderèng ndjè ke dongor.

⁹ Tokou dèdè ke dao koula té ngosi ke kade dòkou gérè kada ndé, dèdè kada kada toï dinga narè denier kada.

¹⁰ Bana tokou ndjè ke dongor dé, dèdè dedjina da kinga marè wota, a dèdè kada kada toï dinga narè denier kada.

¹¹ Tokou dèdè dinga narè lodè, dèdè mmaitar ke ndjè kei.

¹² Dèdè mpana, Ndjè ke goukou da koula kade ngadjiba ke i aredè ndé naaté kedjè, djèdjè ke djoto né dan kade té toï tokou loou tounga.

¹³ A nè ntél tar nare kada horodè té mpana, Nam, mam nda sei madjang ang, i ndiki gè sem mbata narè denier kada ang wa?

¹⁴ Etaa né ke to loi, ao. Mam ndiki ta kare ndjè ke goukou deo kadaba tokou ma mari.

¹⁵ Ma mase da né ke mem ndiki ke né ke to né lom ang wa? Aséh kemi to madjang mbata mam nda madji wa?

¹⁶ Tokou ban ndjè ke goukou a to ndjè ke dongor, ke ndjè ke dongor a to ndjè ke goukou.

¹⁷ Tokou Jésus ao ta kao Jérusalem té, nè mmar ndjè kao gè tédjé dòkou gérè djo loou té ke dang, nè mpa naredè ke deo,

¹⁸ Woidjé, djèdjè djao Jérusalem té, ke da kila Ngon lo doou dji tokou ndjè kòrdjé té ke ndjè da maketourou ndedjidjé, dèdè da gange saria yo dè té.

¹⁹ Dèdè da kilè dji Gentildjé té ta karedè nkoukè, ke ta koundè, ke ta tòlè kake dèse té, a na kï ke ndò ke mouta.

²⁰ Bana ko ngan lo Zébédée dé rò Jésus té ke nganè ke dingao, nè nongou mekedjé gòlè ndè té, nè ndoudjè mbata mare né.

²¹ Jésus pa arè, I ndiki di wa? Nè mpa nare Jésus, Epa ta kare nganem ke dingao djo nèn, kada ta kisi do dji té ke kòl, ke kada do dji té ke gèl mè béh ko té loi.

²² Jésus tél tar pana, Sésè egeridjé né ke sésè edoudjidjé ang. Sésè asidjé ta kaih ke ngonarè ke ma ma kaih wa? Dèdè mpa darè, Djèdjè djase.

²³ Nè mpa naredè, Sésè a kaihdjé ke ngonarè lom, a ta kisi do dji kòlem té ke do dji gèlem té to tar lom ta kare ang, to mbata lodè dèdè ke Bòi da loou tokou ban mbata lodè.

²⁴ Tokou dèdè dòkou do tar nèn, mèdè toodè nya ke ngaköna ke djo nèn.

²⁵ Jésus bardè dé rè té pana, Sésè egeridjé mbaidjé lo Gentildjé waadè ngeng, ke tokou dooudjé lodè pa ngeng.

²⁶ A to tokou ban horosè té ang, nè ke ndiki ta dé bo wota horosè té, nè nase kisi ngonlokisi losè.

²⁷ Nè ke ndiki ta dé doou ke dongor horosè té, nè nase da bere losè.

²⁸ Deo kadaba tokou Ngon lo doou dé ta kare nda ngonlokisi la ang, a ta da ngonlokisi, ke ta kare tébe la tokou lo andé ta kouka né dooudjé nya.

²⁹ Tokou dèdè ntéh daka béh Jericho té, dooudjé ke baya baya ao gè té.

³⁰ Wo, dooudjé ke ndjè kem tòdjé djo isi mbòr deo té. Tokou dèdè do ke mbidè Jésus ao ndai, dèdè mpa ke tarr, Mbaibé Seigneur, Ngon lo David, eda mè madji kedjè.

³¹ Dooudjé ke baya bayan lé ndangedè, mpa daredè ta kare disi tadè moundou, a dèdè mpa ke tarr wota, Mbaibé Seigneur, Ngon lo David, eda mè madji kedjè.

³² Jésus arr loou kada, bardè pana, Sésè ndikimdjé ta kare nda di maresè wa?

³³ Dèdè mpa darè, Mbaibé Seigneur, are kemdjè teï.

³⁴ Jésus da mè madji, nè nòrou kemdè, loshénè loshénè dèdè do loou, ke dèdè dao gè té.