Matiye 17 - Testament ke Siki 1960 (Kabba Laka)

¹ Gè té ndò misä, Jésus bar Pierre ke Jacques ke Jean ngoköè, nè nao kedè dò err té kada ke ndeo nya, dèdè ndja.

² Nè ntél rè nòdè té, kèmè ndokoo tokou kade, koubou la dé ndaa tokou lokarè.

³ Wo, Moïse ke Élie ntéh ròdè té, dèdè mpa tar sa.

⁴ Pierre pa are Jésus, Mbaibé Seigneur, to madji ke djèdjè djéh nèn, tokou i ndiki ma ma da kei kam mouta nèn, kada mbata loi, kada mbata lo Moïse, ke kada mbata lo Élie.

⁵ Tokou nè nai nao mpa tar bai, wo, ndi ke il ke ndokoo dibidè, ndou téh mè ndi té ke il pana, Yèn to Ngonem ke mam ndikè nya, ròm nèlem nya mbata la, woidjé tar la.

⁶ Tokou ndjè kao gè tédjé wo ndou nèn, dèdè ndebe kemdè nange, bel dadè nya.

⁷ Jésus dé òroudè pana, Ïdjé tarr, edaidjé bel ang.

⁸ Tokou dèdè dòrou kemdè ke tarr, dèdè do mare doou kada ang, sè Jésus kadèba.

⁹ Tokou dèdè dï dò err té dao ndisi, Jésus ndedjidè pana, Né ke sésè woidjé mbä, epaidjé are mare doou kada ang nderèng gè té ke Ngon lo doou ï mè bwa yo té.

¹⁰ Ndjè kao gè tédjé doudjè, Bana mbata di a ndjè da maketourou ndedjidjé pana, Élie ase ta dé dongor wa?

¹¹ Nè ntél tar mpana, Élie a dé tokoro ta tél né toï tourè té ke leo.

¹² A ma mpa maresè ke Élie dé mbä, ke dèdè ngerè ang, a dèdè nda sa né ke mèdè ndiki. To tokou ban Ngon lo doou a kinga né ongou djidè té tò.

¹³ Bana ndjè kao gè tédjé geré nè mpa tar lo Jean ndjè da baptême naredè.

¹⁴ Tokou dèdè ndé rò dooudjé té ke baya baya, doou kada dé rò Jésus té, nongou mekedjé gòlè nòè té, mpana,

¹⁵ Mbaibé Seigneur, eda mè madji ke ngonem ke dingao, mbata nè nto ndjè mengeréng ke ongou dè nya, mbata nè noso mè pourou té gar baya, ke mè man té gar baya tò.

¹⁶ Mam ndé sa rò ndjè kao goi té, a dèdè dase da rè madji ang.

¹⁷ Jésus tél tar pana, Dooudjé ke ndjè ko mè té ang, ke ndjè né da ke gatang, ma kisi kesè ndò ban wa? Ndò ban wa baa mem a kenge ang? Edé sa nèn arem.

¹⁸ Jésus ndangè, ndil ke madjang téh mè té ke daka, a ngon ke dingao dé madji lé té ndja.

¹⁹ Bana ndjè kao gè tédjé dé rò Jésus té hoi pana, Mbata di a djèdjè djase touba ndil ang wa?

²⁰ Nè mpa naredè, Mbata ko mè té losè to ngadjiba. Mbata tokoro ma mpa maresè, tokou ko mè té losè ase tokou kandé sénevé kada, sésè a paidjé kare tokou err nèn, Ngese ke dang loou té ke nèn, ao loou té ke nou, nè na ngese ke né kada a kouta dòsè ang.

²¹ Ndil ke ban ase ta téh ke mare deo ke dang ang, sè deo doudjou Allah ke deo kïya mourou kadaba.

²² Tokou dèdè déh Galilée té, Jésus pa aredè, Dèdè da kare Ngon lo doou dji dooudjé té.

²³ Dèdè da tòlè, gè té ndò mouta nè na kï. Ongou dadè nya.

²⁴ Tokou dèdè ndé Capernaüm té, ndjè taa narè lʼimpot ke djo ao rò Pierre té pana, Ndjè tòdjou tar loi ouka narè lʼimpot djo nèn ang wa?

²⁵ Nè mpana, Aä. Tokou nè nande mè kei té la, Jésus pa arè dongor, pana, I edji di wa, Simon? Mbaibédjé ke nange nèn taa narè lʼimpot djo aséh mare lʼimpot ke dji ndjè ke da té wa? Ke dji ngandjé té, aséh ke dji dooudjé té ke dang wa?

²⁶ Tokou Pierre pana, Ke dji dooudjé té ke dang, Jésus pa arè, Bana ngandjé ao dòdè to lél pè.

²⁷ A ta kare djèdjè ndé to né karedè ongou ang, ao tokou man té, ila kii, waa kaindji ke téh daka ke dongor, tokou i teï tè, i a kinga narè ase narè sò, edjï aredè mbata lom ke i tò.