Matiye 15 - Testament ke Siki 1960 (Kabba Laka)

¹ Bana Pharisiendjé ke ndjè da maketourou ndedjidjé ke Jérusalem ndé rò Jésus té, dèdè mpana,

² Mbata di a ndjè kao goi tédjé mbeté tar lo tokou dooudjé wa? Mbata dèdè ntoko djidè ang tokou dao dön mourou.

³ Nè ntél tar naredè mpana. Mbata di a sésè mbetidjé tar ndedji lo Allah ta ngem tar béh losè ndja wa?

⁴ Mbata Allah pana, Ebel bòidjé ke köindjè, ke, Nè ke mpa tar madjang do bèdjè té aséh do këndjè té, ase kare ndjè nèn woei tokoro.

⁵ A sésè epaidjé, Tokou doou kada pa are bèdjè aséh këndjè, Né ke i ase ta kinga djim té marè Allah mba. Nè nase piti bèdjè ang.

⁶ Tokou ban mbata tar béh losè ndja, sésè edaidjé tar ndedji lo Allah dé to né ke ba.

⁷ Sè ndjè kere ngemdjé. Ésaïe pa tokoro leo tar losè tokou nè mpa,

⁸ Dooudjén lé ke ndjè belem tadè té, a mèdè mbetem dèbè eo.

⁹ Dèdè mpitim ba, Dèdè ntòdjou tar lo dooudjé tokou tar ndedji.

¹⁰ Nè mmar dooudjé nare ndé rè té, nè mpa naredè, Woidjé, egeridjé,

¹¹ To né ke ao mè kil doou té ke da doou madjang ang, to né ke téh mè kil doou té ke da doou madjang.

¹² Bana ndjè kao gè tédjé dé pa arè, I geré mè Pharisiendjé toodè tokou dèdè do tar nèn wa?

¹³ Nè ntél tar mpana, Kamnai toï ke Bòi ke dara doubou ang a tòrou.

¹⁴ Iyaidjédè, dèdè nto ndjè kem tèdjé ke tòdjou deo mare ndjè kem tèdjé. Tokou ndjè kem tè tòdjou deo are mare ndjè kem tè, dèdè djokem da koso mè bwa té.

¹⁵ Pierre pa arè, pana, Etòdjoudjè tar gousoun lé.

¹⁶ Nè mpana, Sésè ndja tè nai egeridjé gel tar ang bai wa?

¹⁷ Woidjé ang wa, né toï ke ao kil doou té, nao mèa té ke ntéh daka dè shi té?

¹⁸ A né ke ï mè doou té, ntéh tè té, to né nèn ke da doou madjang.

¹⁹ Mbata kedji ke madjang, ke tar toï doou, ke kaiya, ke tar to loou to ke madjang, ke boukou, ke tar nadji ngem, ke tadji ntéh ke mè doou té.

²⁰ To né nèn ke da doou madjang, a ta kön mourou ke dji ke ntoko ang, a da doou madjang ang.

²¹ Jésus ï loou té ke nou, ntéh nao nange té ke Tyr ke Sidon.

²² Wo, dènè Cananite kada ke nange té ke nou dé pa ke tarr, pana, Eda mè madji sem, Mbaibé Seigneur, Ngon lo David, ngonem ke dènè isi ke ndil ke madjang nya.

²³ A Jésus tél tar kada arè ang. Ndjè kao gè tédjé dé doudjè nya, pana, Arè nao mbata nnò godjè té.

²⁴ Nè ntél tar mpana, Doulam rò batidjé té ke nai ke kei lo Israël kadaba.

²⁵ Dènè dé ongou mekedjé gòlè nòè té pana, Mbaibé Seigneur, eda arem.

²⁶ Nè ntél tar mpana, To madjang ta taa mourou lo ngandjé ta kare bisidjé.

²⁷ Dènè pana, Aä, Mbaibé Seigneur, a bisidjé ndja ön kese mourou ke oso nange kö table té lo ebèèdèdè.

²⁸ Bana Jésus tél tar arè pana, Dènè, ko mè té loi tokou boui. Da da kari tokou mei ndiki. Lé té ndja ngonè ke dènè dé madji.

²⁹ Jésus ï loou té ke nou ao ndja mbòr man té ke Galilée. Nè nal dò err té, nè nisi nange nou.

³⁰ Dooudjé ke baya baya dé rè té, dèdè ndé ke dooudjé ke oso mete, ke ndjè kem tòdjé, ke ndjè ke pa tar ang, ke ndjè ke djidè woei, ke maredjé baya. Dèdè dongoudè nò gòlè té, nè nda ròdè naredè ndé madji.

³¹ Tokou ban mè dooudjé ke baya baya edji nya tokou dèdè do ndjè ke pa tar ang, dao mpa tar madji, ndjè ke djidè woei, djidè dé madji, ndjè ke oso mete, dao ndja madji, ke ndjè kem tòdjé wo loou, dèdè dòsou gadji Allah lo Israël.

³² Tokou ban Jésus bar ndjè kao gè tédjé are ndé rè té, pana, Mam nda mè madji ke dooudjé baya bayan lé, mbata dèdè disi sem ndò mouta nga, ke déh ke mourou ang. Mam ndiki ta karedè dao mèdè boo ang, na dòmadjang a singa lodè goto ke deo.

³³ Ndjè kao gè tédjé pa arè, Dja kinga mourou mè kòr té da wa, a kase kare dooudjé baya baya tokou ban dön wa?

³⁴ Jésus pa aredè, Isidjé ke mourou ban wa? Dèdè mpana, Shiri, ke mare kaindjidjé ngadji ngadji.

³⁵ Nè mpa nare dooudjé ke baya baya ta kare disi nange.

³⁶ Nè noun mourou ke shiri nèn ke kaindjidjé, gè té ke nè nda woio mbä, nè nkai nare ndjè kao gè tédjé, ke ndjè kao gè tédjé are dooudjé ke baya bayan lé.

³⁷ Dèdè toï dön mèdè ndan. Dèdè mbòn kese mourou ke nai dousou karè shiri.

³⁸ Dèdè ke dön mourou nto dingaodjé dourou sò, ke mare dènèdjé ke ngandjé to.

³⁹ Tokou nè noula dooudjé ke baya baya nare dao, nè nao mè to té, nè ntéh nange té ke Magadan.