Matiye 14 - Testament ke Siki 1960 (Kabba Laka)

¹ Ndò té ke nou, Hérode mbai ke er kada wo tam Jésus,

² Nè mpa nare nganlokisidjé la, Yèn to Jean ndjè da baptême, nè nï mè bwa yo té, mbata yèn tokou singa ban da koula mèa té.

³ Mbata Hérode waa Jean leo, ntòè nilè kei koula té mbata tar lo Hérodias, dènè lo Philippe ngoköè.

⁴ Mbata Jean pa arè, Deo tar ndedji té to tar loi ta tèè to dènè ang.

⁵ Nè ndiki ta tòl Jean a bel dè mbata lo dooudjé, mbata dèdè do Jean tokou lo prophète.

⁶ Tokou ndò koudjou Hérode ase, ngon lo Hérodias ke dènè laa nò dooudjé té ke mbòna, ke nnèl Hérode.

⁷ Tokou ban nè mpa ke koubou yo nare ngon, ta karè né ke nè na doudjè.

⁸ Mbata këndjè toulè, nè mpana, Arem mè sèmbé té nèn dò Jean ndjè da baptême.

⁹ Mè mbai tooè, a mbata yo ke nè noubou narè, ke mbata dooudjé ke mbòna sa, nè mpa ta karè.

¹⁰ Nè noula ta koudja gòsou Jean mè kei koula té.

¹¹ Dèdè ndé ke dè mè sèmbé té dare ngon ke dènè, nè nao nè rò këndjè té.

¹² Ndjè kao go Jean té, dé, doun ninè ndoubè, dèdè dao mpa dare Jésus.

¹³ Tokou Jésus wo tar nèn, nè ntéh loou té ke nou nao mè to té, nao mare loou té ke dang ke dooudjé éh kendé ang. Tokou dooudjé ke baya baya wo tar nèn, dèdè ntéh béh té dao gè té ke gòldè.

¹⁴ Tokou nè ntéh kongo té, nè no dooudjé baya baya, nè nda mè madji kedè, nè nòrou rò too lo ndjè rò toodjé ke horodè té.

¹⁵ Tokou kade woei mbä, ndjè kao gè tédjé dé rè té pana, Loou nèn to mè mou ke kade goto, are dooudjé bayan lé ao béh ta ndoko mourou mbata lodè ndja.

¹⁶ Jésus pana, Dèdè dase ta kao ang, sésè aridjédè mourou dön.

¹⁷ Dèdè mpa darè, Mourou mi ke kaindjidjé djo ba to djidjè té nèn.

¹⁸ Nè mpana, Edéidjé né arem.

¹⁹ Bana nè mpa nare dooudjé ke baya baya ta kisi nange do mou té, nè noun mourou ke mi ke kaindji ke djon lé, nè naa loou ke dara, mmar tar ke madji dè té, nè nkai mouroun lé dana nare ndjè kao gè tédjé, ke ndjè kao gè tédjé are dooudjé ke baya bayan lé.

²⁰ Dèdè toï dön mèdè ndan. Dèdè mbòn kese mourou ke nai dousou karè dòkou gérè djo.

²¹ Dèdè ke dön mourou nto dingaodjé ngosiba ke dourou mi ke mare dènèdjé ke ngandjé to.

²² Loshénè loshénè nè noula ndjè kao gè tédjé ta kao mè to té, ta kao toura man té dongor karè tokou nè nai nare dooudjé ke baya ta kao.

²³ Gè té ke nè nare dooudjé ke baya ao mba, nè nal do err té ke kadèba ta doudjou Allah. Tokou kade woei mba nè néh nou ke kadèba.

²⁴ Lé té ndja to ao do tokou man té deo eo, man ï ke to mbata lél gangedè.

²⁵ Ke do bakebé nè nao ròdè té, nè nao ndja do tokou man té.

²⁶ Tokou ndjè kao gè tédjé wo nè nao ndja do tokou man té, bel dadè nya, mpana, Yèn to ouma. Dèdè dourouki mbata bel dadè.

²⁷ Loshénè loshénè Jésus pa aredè, pana, Aridjé mèsè isi dèkèkè, yèn to ma, edaidjé bel ang.

²⁸ Pierre tél tar arè pana, Mbaibé Seigneur, tokou to i ndja epa arem ta kao ròi té do man té.

²⁹ Nè mpana, Edé. Tokou ban Pierre téh mè to té, nao ndja do man té, nao rò Jésus té.

³⁰ A tokou nè no lél oula nya, bel dè nè nao ta ken ke man té, nè mpa ke tarr, Mbaibé Seigneur, adjim.

³¹ Loshénè loshénè Jésus oula dja wèè, mpa narè, Doou ke ndjè ko mè té ngadji, i maitar mbata di wa?

³² Tokou dèdè dao mè to té lél gange.

³³ Dèdè ke disi mè to té mpitè, mpana, Tokoro i to Ngon lo Allah.

³⁴ Tokou dèdè dao toura man té mba, dèdè ntéh kongo té ke Génésareth.

³⁵ Tokou dooudjé ke loou té ke nou woè, dèdè doula nange té ke nou toï, dèdè ndé rè té ke ndjè rò toodjé toï.

³⁶ Dèdè ndoudjè nya ta karedè dòrou ta koubou la ba, dèdè toï ke dòrou, ròdè dé madji.