Matiye 13 - Testament ke Siki 1960 (Kabba Laka)

¹ Ndò tén lé, Jésus téh mè kei té ke daka, nao nisi kare tokou man té.

² Dooudjé baya baya mbona sa, tokou ban nè nao mè to té nisi kendé, dooudjé ke baya baya toï arr ta kongo té.

³ Nè mpa mare tar naredè nya ke tar gousou, mpana, Doou kada ao ta doubou kandé ko.

⁴ Tokou nè nao ndoubou ko, mare kandé ko gaï mbòr deo té, eldjé dé ön ko.

⁵ Mare kandé ko oso do err té, loou ke nange ourou ke té nya ang, dèdè ntéh loshénè loshénè mbata nange ourou nya ang.

⁶ Tokou kade téh a noungadè, ke mbata ngiradè goto, dèdè ntoutou.

⁷ Mare kandé ko oso horo konn té, konn lé ndou, ntòldè.

⁸ Mare kandé ko oso nange té ke madji, dèdè ntéh, dan kandé ko, maredjé an dòdòkou, maredjé an dòmisä, maredjé an dòmouta.

⁹ Nè ke néh ke mbi ke ka ko, ase kare nè no.

¹⁰ Tokou ban ndjè kao gè tédjé dé pa arè, I pa aredè ke tar gousou mbata di wa?

¹¹ Nè ntél tar naredè mpana, Daresè ta kare egeridjé tar béh kö ke dara ke yarè, a mbata lodè da karedè ban ang.

¹² Mbata nè ke néh ke né, da karè marè dè té, ke nè na kéh ke né baya baya, a nè ke néh ke né ang, lé né ke to dja té ka da taa.

¹³ To mbata yèn ke ma mpa kedè ke tar gousou, mbata dèdè do ke kemdè a do gatang, ke dèdè do ke mbidè a do gatang, ke dèdè ngerè gelè ang.

¹⁴ Tar ke prophète Ésaïe pa dé to tar ke tokoro deo té lodè, ke pana, Sésè a koidjé ke mbisè tokoro, a sésè a geridjé gelè ndò kada ang. Sésè a koidjé ke kemsè tokoro, a sésè a koidjé madji ndò kada ang.

¹⁵ Mbata mè dooudjé nèn oi diriri, Ke mbidè outou ta ko madji ang, Ke dèdè nnïm kemdè. Na dòmadjang a dèdè da ko ke kemdè ke da ko ke mbidè, ke mèdè a geré madji, ke dèdè da tél ta karem ndadè madji.

¹⁶ Madji éh ke kemsè mbata kemsè wo, ke mbisè mbata mbisè wo.

¹⁷ Tokoro ma mpa maresè, prophètedjé ke dooudjé ke gaté gaté baya ndiki nya ta ko né ke sésè woidjé, a dèdè do ang, ke mbidè ndiki ta ko tar ke sésè woidjé, a dèdè do ang.

¹⁸ Bana woidjé tar gousou lo doou ke doubou kandé ko.

¹⁹ Ndò ke doou kada kada wo tar béh ko ke nè ngerè gelè ang, ndjè kembaa dé òrou né ke ndoubou mèa té, yèn to yéh ke gaï mbòr deo té.

²⁰ Tar lo yéh ke oso do err té, to to nè ke no tar ndja ke nè ntaa loshénè loshénè ke koukou,

²¹ Mbata goi tar lé to mèa té ang, nè ngem ndò baya ang, a tokou né ongou aséh ngätar ï mbata tar ndja, loshénè loshénè nè noso.

²² Tar lo yéh ke oso horo konn té, to to nè ke no tar ndja, a koula la ke ta da né la nange nèn, ke kere ka né kinga to tar ndja a nè nan ang.

²³ Tar lo yéh ke oso nange té ke madji, to to nè ke no tar ndja ke nè ngeré gelè. Nè nan kandè tokoro, mare kada kada an dòdòkou, marè an dòmisà, marè an dòmouta.

²⁴ Nè mpa mare tar gousou naredè, mpana, Béh kö ke dara asena ke doou kada ke doubou kandé ko ke madji mè ndòò té la.

²⁵ A tokou dooudjé tibi, ndjè kembaa la doubou tiro horo ko té, a nè nao ke dang.

²⁶ Tokou ban, tokou kam téh mbä an kandè, bana tiro téh tò.

²⁷ Dooudjé ke to beredjé lo doou ke ndjè kei dé, mpa darè, Ebèèdjèdjè, i doubou ko ke madji mè ndòò té loi ang wa? Tokou ban mbata di a tiro to kendé wa?

²⁸ Nè mpa naredè, Ndjè kembaa da né nèn. Beredjé pa arè, Tokou ban, i ndikidjé ta kao tòroudè wa?

²⁹ Nè mpana, Eë, mbata dòmadjang a tokou sésè etòridjé tiro, sésè a tòridjé kandé ko deo kadaba kedè.

³⁰ Aridjédè ntòkou naaté nderèng ndò koudja ko, ndò koudja ko té ma ma pa kare ndjè koudja ko, Mbòidjé tiro dongor, etòidjé tiro ta kila pouro, a ongidjé ko mè dam té lom.

³¹ Nè mpa mare tar gousou naredè, mpana, Béh kö ke dara to tokou kandé sénevé ke doou kada oun doubou mè ndòò té la.

³² Nè nto kandé ke së ba, a tokou nè ntòkou mbä nè ndé mbo nouta kamnai toï, nè ndé to kake, tokou ban eldjé ke ï tarr dé da kei lodè barkemè té.

³³ Nè mpa mare tar gousou naredè, Béh kö ke dara to tokou sér ke dènè oun polonè ndoudjou mourou ase kaa mouta, nderèng toï ti.

³⁴ Tar nèn toï Jésus pa are dooudjé ke baya baya ke tar gousou, a nè mpa tar kada naredè ang ke to tar gousou ang.

³⁵ Tar nèn to ta kare tar ke prophète pa leo dé to tar ke tokoro, Ma ma teï tam ke tar gousou, Ma ma pa tar ke yarè leo baa ndò kounkoutou da nange nèn.

³⁶ Tokou ban nè nïya dooudjé ke baya baya, nao mè kei té. Ndjè kao gè tédjé dé rè té pana, Etòdjoudjè gel tar gousou lo tiro ke mè ndòò té.

³⁷ Nè ntél tar mpana, Nè ke ndoubou kandé ko ke madji to Ngon lo doou.

³⁸ Ndòò lé to to nange nèn, ke kandé ko ke madji to to ngandjé ke béh kö té, tiro to to ngandjé lo ndjè kembaa.

³⁹ Ndjè kembaa ke douboudè to Satan. Ndò koudja ko to dòbon ndò ke nange nèn, ndjè koudja ko to angedjé.

⁴⁰ Deo kadaba tokou ntò tiro dongoudè pouro, to tokou ban dòbon ndò ke nange nèn.

⁴¹ Ngon lo doou a koula angedjé la, dèdè da mbòn né toï ke are dooudjé ta da madjang, ke ndjè né da ke madjangdjé toï ke mè béh kö té la.

⁴² Dèdè da kongoudè kem pourou té, loou té ke nou dooudjé a nò ke man kemdè ke da kousa ngangedè.

⁴³ Gè té nèn ndjè ke gaté gaté a ndokoo tokou kade mè béh kö té lo Bòdèdè. Nè ke néh ke mbi ke ka ko, ase kare nè no.

⁴⁴ Béh kö ke dara to tokou né kinga ke yarè mè ndòò té kada, ke doou kada inga ke iyèè bai, bana mbata mèa koukou nè nao nlabe né la toï ke nè ndoko ndòòn lé.

⁴⁵ Marè bai, béh kö ke dara to tokou ndjè né ndoko ke sange meré perle ke madji.

⁴⁶ Tokou nè ninga meré perle kada ke narè ngeng, nè nao nlabe né la toï, ke nè ndoko meré perle nèn.

⁴⁷ Marè bai, béh kö ke dara to tokou boura ke dèdè dila mè tòkou man té, ke waa mare kaindjidjé ke dang dang.

⁴⁸ Tokou boura dousou mbä, dooudjé òrou boura dò kongo té, disi nange dòrou kaindjidjé ke madji, dongoudè mè djo té, a ntila yéh ke madjang koro.

⁴⁹ A to tokou ban dòbon ndò ke nange nèn. Angedjé a téh daka, da kai ndjè ke madjang ke ndjè ke gaté gaté.

⁵⁰ Dèdè da kongoudè kem pourou té, loou té ke nou dooudjé a nò ke man kemdè ke da kousa ngangedè.

⁵¹ Woidjé gel tar nèn toï wa? Dèdè mpa darè, Aä.

⁵² Nè mpa naredè, Tokou ban, ndjè da maketourou ndedjidjé kada kada toï, ke ntòdjoudè gel tar mbata béh kö ke dara, nto tokou ndjè kei ke òrou né ke siki ke né ke leo ke né kinga la.

⁵³ Tokou Jésus eo ta pa tar gousou nèn, nè nïya loou ke nou nao.

⁵⁴ Tokou nè ndé béh té la ndja, nè ntòdjoudè tar mè kei Allah té lodè, tokou ban mèdè ounda dò biä, dèdè mpana, Doou nèn inga kemkarè nèn ke tòkou koula nèn da wa?

⁵⁵ Nè nto ngon lo ndjè koudja kake ang wa? Ri këndjè na Marie ang wa? Ngaköè to Jacques ke Joseph ke Simon ke Jude ang wa?

⁵⁶ Ngakönanè toï isi horodjè té ang wa? Tokou ban doou nèn inga né nèn toï da wa?

⁵⁷ Mèdè toodè sa. A Jésus pa aredè, Prophète inga piti loou té toï, bè ndja mè béh té la, ke mè kei té la ndja ninga piti kendé ang.

⁵⁸ Nè nda tokou koula baya nou ang, mbata do mèdè té ang.