Matiye 10 - Testament ke Siki 1960 (Kabba Laka)

¹ Jésus bar ndjè kao gè tédjé dòkou gérè djo dé rè té. Nè naredè tè ta kare ntouba ndildjé ke madjang, ke ta kòrou rè too toï, ke ta da rè dooudjé karedè ndé madji toï.

² Ri ndjè kouladjé dòkou gérè djo to tokou ban, yéh ke dongor to Simon ke dèdè mmarè na Pierre, ke André ngoköè, Jacques ngon lo Zébédée ke Jean ngoköè.

³ Philippe ke Barthélemy, Thomas ke Matthieu ndjè taa narè lʼimpôt, Jacques ngon lo Alphée, ke Thaddée.

⁴ Simon Cananite ke Judas Iscariot, doou ke ndjè ndoko Jésus.

⁵ Dèdè dòkou gérè djo nèn Jésus ouladè, nè mpa naredè, Abidjé ke deo lo Gentildjé kada ang, abidjé mè béh té lo Samaritaindjé kada ang.

⁶ Ase kare sésè abidjé rè batidjé té ke kei lo Israël ke nai.

⁷ Tokou sésè abidjé epaidjé tar ke madji, epaidjéna, Béh ko ke dara éh ngosiba.

⁸ Òridjé rò too lo dooudjé, aridjé doou ke woei mba ï, edaidjé rò ndjè bandjidjé are ndé madji, etoubaidjé ndildjé ke madjang. Sésè ingaidjé né ba, aridjé né ba.

⁹ Ounidjé narè lor aséh narè argent aséh mbaingira ke bòl losè ang.

¹⁰ Ounidjé bòl ta kao nè deo bo ang, aséh koubou djo ang, ke ndar gòlsè ang, ke kake djisè té ang to, mbata ndjè koula ase kinga mourou la.

¹¹ Tokou béh aséh ngon béh ke sésè abidjé kendé, esangidjé doou ke mè béh tè ke madji ase, isidjé sa nderèng sésè etéhdjé.

¹² Tokou sésè abidjé mè kei té, edèidjé laphia.

¹³ Tokou kei to madji ase, aridjé mè woul losè dé dè té, tokou bo nto madji asang, aridjé mè woul losè tél ròsè té.

¹⁴ Tokou doou kada kada taasè ang, ke do tar losè ang, etoundaidjé boum nange ke gòlsè té tokou sésè ïyaidjé kei aséh béhn lé.

¹⁵ Tokoro ma mpa maresè, ndò gange saria té, saria lo béhn lé a to wota saria nange té ke Sodome ke Gomorrhe.

¹⁶ Woidjé, ma moulasè tokou lo batidjé horo ndjakemdjardjé té, tokou ban isidjé ke kemkarè tokou lo li, a isidjé ke mè ke madji tokou lo derdjé.

¹⁷ Ngemidjé madji mbata lo dooudjé, mbata dèdè da kwaasè kare ndjè gange sariadjé, ke da koundasè mè kei Allah té lodè.

¹⁸ Dèdè da kao kesè no mbaidjé ke mbaibédjé té mbata tar lom, ta pa tar nadji nòdè té, ke no Gentildjé té to.

¹⁹ Tokou dèdè dwaasè dao kesè, esangidjé mèsè ang tar di baa a paidjé aséh tar ke sésè a télidjé nè wa, mbata kaden lé ndja da karesè tar ke sésè a kasidjé pa.

²⁰ Mbata to sésè ke epaidjé tar ang, a to Ndil lo Bòsésè ke pa deo té losè.

²¹ Ngaköna ke dingao a kwaa ngoköè ta kare ntòlè, bòngon a da ke ngonè ban to. Ngandjé a kï ta mbeté bòdèdè ke ködèdè ta kare ntòldè.

²² Dooudjé toï a mbetésè mbata rim ndja, a nè ke nwaa are ngeng sar ndò té ke goukou, nè na kinga kadji.

²³ Tokou dèdè ngäsè ke tar béh té ke kada, aïndjé ke mare béh té, mbata tokoro ma mpa maresè, sésè a ndaidjé horo béh té ke Israël toï ang dongor Ngon lo doou dé.

²⁴ Ndjè kao go doou té wota ndjè tòdjè tar ang, ke bere wota ebèèdjè ang.

²⁵ To asenga tokou ndjè kao go ndjè tòdjou tar té to asena sa, ke tokou bere to asena ke ebèèdjè. Tokou dèdè dounda ri doou ke ndjè kei na Béelzébul, dèdè da toura ri dooudjé ke kei la madjang wota ang wa?

²⁶ Tokou ban edaidjé bel lodè ang, mbata né kada ke iyaa ke a téh daka ang goto, aséh né ke yarè ke da geré ang goto.

²⁷ Né ke ma mpa maresè gongeï té, epaidjé ke lokarè té, né ke sésè woidjé hoi, epaidjé ke tarr dò kei té.

²⁸ Edaidjé bel lodè ang ke ntòl da rò a dase tòl ndil ang. Madji wota ebelidjé nè ke nase toudjou ndil ke da rò djokem loou kem pourou té.

²⁹ Dèdè ndoko kolé djo ke ngon narè kada ang wa? Ke kada lodè a koso nange ang tokou Bòsésè ndiki gè ang.

³⁰ A bi dòsè ndja ntoura toï mbä.

³¹ Tokou ban, edaidjé bel ang, sésè madji wotaidjé kolé nya.

³² Tokou ban, dooudjé kada kada toï ke pa tar lom nò dooudjé té, ma ma pa tar lodè nò Bòi té ke isi dara tò.

³³ A doou ke mbetem nò dooudjé té, ma ma mbetè nò Bòi té ke isi dara té tò.

³⁴ Edjidjé ang ke mam ndé ta kare mè woul nange nèn, mam ndé ta kare mè woul ang, a ta kare tokou kiaa.

³⁵ Mbata mam ndé ta kare doou mbeté bèdjè, ke ta kare ngon ke dènè mbeté këndjè, ke ta kare dènè mbeté moumèdjè.

³⁶ Ndjè kembaadjé lo doou a to dooudjé ke kei la ndja.

³⁷ Doou ke ndiki bèdjè aséh këndjè wotam, nè nasem ang. Nè ke ndiki ngonè ke dingao aséh ngonè ke dènè wotam, nè nasem ang.

³⁸ Nè ke noto kake yo la ke nao gom té ang, nè nasem ang.

³⁹ Nè ke ninga tébe la, nè na nai, a nè ke tébe la nai mbata lom, nè na kingè.

⁴⁰ Doou ke taasè, ntaam tò, ke doou ke taam, ntaa nè ke noulam.

⁴¹ Nè ke ntaa prophète mbata nè nto prophète, nè na kinga kouka lo prophète. Nè ke ntaa doou ke gaté gaté mbata nè nto doou ke gaté gaté, nè na kinga kouka lo doou ke gaté gaté.

⁴² Doou ke are ngonarè man ke woul are kada lo dèdè ke ngadji nèn lé, mbata nè nto ndjè kao gom té, tokoro ma mpa maresè, kouka la a nai ang.