Koula 9 - Testament ke Siki 1960 (Kabba Laka)

¹ Saul nai ta kem tar ongou ke tar tòl dooudjé dò ndjè kao go Mbaibé Seigneur té. Nè nao rò mbai té lo ndjè kòrdjé,

² Nè ndoudjè mbata maketourou ta kao né kei Allah té ke Damas, tokou ban tokou nè ninga maredjé ke Deo té nèn ndja, dingaodjé aséh dènèdjé, nè nase tòdè ta dé kedè Jérusalem té.

³ Tokou nè nao ndja ke deo, nè ndé ngosiba ke Damas, loshénè loshénè lokarè ke dara ndokoo kirè,

⁴ Nè noso nange, nè no ndou ke pa arè na, Saul, Saul, mbata di a ngäm ke tar wa?

⁵ Saul pana, I to na wa, Mbaibé? Nè mpana, Mam nto Jésus, nè ke i ngë ke tar.

⁶ Ï tarr ao mè béh té, dèdè da pa kari né ke i ase ta da.

⁷ Dooudjé ke ao sa arr tadè moundou, dèdè do ndou tar lé, a dèdè do doou kada ang.

⁸ Saul ï nange, tokou nè nteï kèmè nè nase ta ko loou ang, tokou ban dèdè dwaa dja dao sa Damas té.

⁹ Nderèng ndò mouta nè no loou ang, nön mourou ang ke naih man ang tò.

¹⁰ Mare ndjè kao go Jésus té kada éh Damas té ria na Ananias. Mbaibé Seigneur pa arè ke ni, Ananias. Nè mpana, Ma méh nèn. Mbaibé Seigneur.

¹¹ Mbaibé Seigneur pa arè, Ï tarr ao deo ke ria na Gatégaté, edoudjou mè kei té lo Judas mbata doou kada ke Tarse, ria na Saul, mbata wo, nè nao ndoudjou Allah.

¹² Nè no ke ni doou kada ke ria na Ananias dé rè té, ila dja dè té, baa ta kare nè nase ko loou bai.

¹³ Ananias tél tar pana, Mbaibé Seigneur, ma mo tar lo doou nèn ta dooudjé té baya baya, nè ke nda né ke madjang nya ke ndjè ko mè tédjé ke Jérusalem té.

¹⁴ Nè néh nèn ke ta tokou ndjè kòrdjé ta to dèdè toï ke mmar ri.

¹⁵ A Mbaibé Seigneur pa are Ananias, Ao, mbata doou nèn to djo ke ma mberè mbata ma ndja, ta karè noto rim horo Gentildjé té ke mbaibédjé té, ke ngandjé té lo Israël.

¹⁶ Mbata ma ma tòdjè né ongou nya ke nè nase kinga mbata rim.

¹⁷ Tokou ban Ananias ao, nao mè kei té. Tokou nè nila dja dò Saul té, nè mpana, Ngoköm Saul, Mbaibé Jésus ndja ke téh ròi té ke deo tokou ao dé, noulam ta kari wo loou, ke ta kare mei dousou ke Ndil ke madji toï.

¹⁸ Loshénè loshénè né tokou ngoi kaindji téh kèmè té, nè no loou nga. Tokou ban nè nï tarr, ninga baptême.

¹⁹ Nè nön mourou, ke nè ninga singa madji. Nè nisi ke ndjè kao go Jésus té ke Damas mare ndò ke dang bai.

²⁰ Nè mpa tar lo Jésus loshénè loshénè mè kei Allah té kada kada toï, mpana, Jésus ndja to to Ngon lo Allah.

²¹ Mè dooudjé toï ke woè ounda do biä, dèdè mpana, Nè nto doou nèn ke toudjou dooudjé ke bar ri nèn ke Jérusalem té ang wa? Ke nè ndé nèn mbata tar nèn ta tòdè, ta kao kedè nò tokou ndjè kòrdjé té.

²² A singa lo Saul dé wota ke kèté ke kèté, nè ndai Juifdjé ke isi Damas té ke gousou, mbata nè ntòdjoudè Jésus to to Christ ndja ke tokoro.

²³ Goukoudang ke ndò baya ndai mbä, Juifdjé toulana horodè té ta tòlè.

²⁴ A Saul wo tar toula lodè. Dèdè ngem tadeo beh kade rem tilti rem ta tòlè.

²⁵ A ndjè kao gè tédjé ounè tilti ke do ndooko té, darè ndisi nange mè karè té.

²⁶ Tokou nè ndé Jérusalem té, nè nda ta mbona ke ndjè kao go Jésus té. Bel dadè toï mbata la, mbata ke mèdè té mpana nè nto ndjè kao go Jésus té ang.

²⁷ A Barnabas wèè ao sa rò ndjè kouladjé té, nè mpa naredè deo té ke Saul wo Mbaibé Seigneur deo bo, ke Mbaibé Seigneur pa tar sa, ke deo té ke Saul pa tar ke ri Jésus ke bel ang Damas té.

²⁸ Tokou ban nè ntéh, nè ntél nao horodè té ke Jérusalem.

²⁹ Nè nao mpa tar ke ri Mbaibé Seigneur ke bel ang. Nè mpa tar ke nè mmaitar ke Hellénistedjé, a dèdè dao nsange deo ta tòlè.

³⁰ Tokou ndjè ke to ngaködjèdjè wo tar nèn, dèdè dao sa Césarée té, dèdè doulè béh Tarse té.

³¹ Tokou ban dooudjé ke kei Allah isi ke mè woul nange té ke Judée ke Galilée ke Samarie toï, ke dèdè ntòkou tokou dao ndja ke bel lo Mbaibé Seigneur deo ndedji té lo Ndil ke madji toï, dèdè ndé baya wota.

³² Tokou ban, tokou Pierre ao loou dang dang ndja horodè té toï, nè ndé rò ndjè ko mè tédjé ke isi Lydde té to.

³³ Béh té ke nou, nè ninga mare doou kada, ria na Enée, nè nto twa té la bal djidjo, ke debe rè woei.

³⁴ Pierre pa arè, Enée, Jésus Christ dai madji, ï tarr, ekè twa loi. Nè nï tarr loshénè loshénè.

³⁵ Dooudjé toï ke isi Lydde ke Saron té doè, dèdè ntourou mèdè ntél rò Mbaibé Seigneur té.

³⁶ Mare ndjè kao go Jésus té kada isi béh té ke Joppé, ria na Tabitha, ri nèn pana Dorcas aséh Kai. Dènè nèn da koula madji nya, ke nè nda mè madji nya to.

³⁷ Ke ndò té ke nou, rè tooè nè noei. Tokou dèdè ntokè ke man ase, dèdè dao sa kei té ke to do marè té.

³⁸ Mbata Lydde éh ngosiba ke Joppé, tokou ndjè kao go Jésus té wo Pierre isi nou, dèdè doula dooudjé djo rè té, ke ndoudjè nya, Edé ròdjè té loshénè loshénè, ngebe ang.

³⁹ Tokou ban Pierre ï tarr, ao kedè. Tokou nè ndé kei mbä, dèdè dao sa kei té ke to do marè té. Dènè ndoubadjé toï arr mbòrè té, dao nnò. Dèdè ntòdjou Pierre koubou ke Dorcas our tokou nè nisi né kedè ba.

⁴⁰ A Pierre aredè ntéh daka toï, nè nongou mekedjé gòlè nange, nè ndoudjou Allah. Goukoudang nè ntourou rè ke rò nin té, nè mpana, Tabitha, ï tarr. Nè nteï kèmè, tokou nè no Pierre, nè nï nisi dò gòlè té.

⁴¹ Pierre oula dja wèè ke tarr. Tokou ban nè mmar ndjè ko mè tédjé ke dènè ndoubadjé, nè naredè dènè nèn ke tébe.

⁴² Tar nèn bar téh béh té ke Joppé toï, ke dooudjé baya wo mèdè té ke Mbaibé Seigneur.

⁴³ Pierre isi béh té ke Joppé ndò baya ke Simon ndjè da ngira.