Koula 6 - Testament ke Siki 1960 (Kabba Laka)

¹ Ndè té ke ndjè kao go Jésus té an nya, dooudjé ke to Hellénistedjé maitar ke dooudjé ke to Hébreudjé, mbata tar dènè ndouba lodè ikidè tokou dèdè nkai né ke ndò ke ndò.

² Dèdè dòkou gérè djo mmar ndjè kao go Jésus té toï, dèdè mpana, To tar ke gaté gaté ang mbata lodjè ta kïya ta pa tar lo Allah ta da koula table.

³ Tokou ban ngakömdjé, esangidjé dooudjé shiri horosè té ke dooudjé pa tar lodè madji, ke mèdè dousou ke Ndil ndja ke kemkarè tò, dèdè ke djèdjè djase bardè ke daka ta da koula nèn.

⁴ Bana djèdjè ndja, dja ngem ta doudjou Allah ke ta da koula pa tar maketourou.

⁵ Tar ke dèdè mpa nèl dooudjé ke baya baya toï. Dèdè mmar Etienne, doou ke dousou ke ko mè té ke Ndil ke madji toï, dèdè mmar Philippe, ke Prochore, ke Nicanor, ke Timon, ke Parménas, ke Nicolas, doou ke Antioche ke ao tourou rè Juif.

⁶ Dèdè ntòdjoudè ndjè kouladjé, dèdè ndoudjou Allah ke dila djidè dodè té.

⁷ Tar lo Allah bar nya ke ndjè kao go Jésus té an baya baya Jérusalem té, ke mare ndjè kòrdjé baya wo mèdè té tò.

⁸ Etienne dousou ke mè madji ke singa, nda tòkou né ta kare mè dooudjé ounda dò biä nya, ke né tòdjou ke nè nda horo dooudjé té.

⁹ Tokou ban mare dooudjé horodè té ke nto ndjè kei Allah ke ri keiè na Affranchis, ke maredjé ke Cyrénéen, ke maredjé ke Alexandrin, ke maredjé ke Cilicie ke Asie, dèdè dï mmaitar ke Etienne.

¹⁰ A dèdè dase ta kouta kemkarè ke Ndil ke nè mpa kendé ang.

¹¹ Tokou ban dèdè mmar mare dooudjé goukou hoi bè ta pa, Djèdjè djoè nè mpa tar sä do Moïse té ke Allah.

¹² Dèdè ntourou mè dooudjé ke tòkou dooudjé ke ndjè da maketourou ndedjidjé, dèdè ndé dè té, dèdè dwèè dao sa rò ndjè gange sariadjé té.

¹³ Dèdè mmar ndjè pa tar nadji ngem, ke mpana, Doou nèn ïya ang ta pa tar mbeté loou ke madji nèn ke tar ndedji.

¹⁴ Mbata djèdjè djoè nè mpana Jésus ke Nazareth nèn a toudjou loou nèn, ke nè na tourou tar béh ke Moïse aredjè leo.

¹⁵ Dèdè toï ke disi loou gange saria té, tokou dèdè dèè somomo, dèdè do kèmè to tokou kem ange.