Koula 28 - Testament ke Siki 1960 (Kabba Laka)

¹ Gè té ke djèdjè toï ntéh nou ase, djèdjè djo ri nange nèn na Malte.

² Dooudjé ke nange té nèn da kedjè madji nya. Dèdè nyél pourou ke dèdè ntaadjè madji toï, mbata ndi ao ere ke koul ö nya.

³ Paul tò takir, tokou nè ndadè pouro horomaho téh mbata pourou noungè, ke nè ndò dji Paul.

⁴ Tokou dooudjé ke béh té nèn wo li ke na dja té, dèdè mpana horodè té, Tokoro doou nèn to ndjè toï doou. Nè ntéh mè tòkou man té ba, a tar nadji ndiki ta karè nisi tébe ang.

⁵ Paul yè li mè pourou té ke mare né kada dè ang.

⁶ Dèdè ngebe ta ko sè rè a ti nya, aséh nè na koso na kwoei loshénè loshénè. Tokou dèdè ngebe gè eo, ke dèdè do mare né ke madjang kada dè ang, dèdè ntourou kedji lodè, dèdè mpana nè nto mare allah kada.

⁷ Ngosiba ke loou té ke nou, ndòò kada kada to ke to ndoo lo tòkou doou ke nange té nou, ria na Publius. To nè ke ntaadjè ke nè ngemdjé madji ndò mouta.

⁸ Tar téh tokou ban, bo Publius to ke rò too, rè nounga nya ke nè ndènge ke mese. Paul ao ta koè, nè ndoudjou Allah, nè nila dja dè té, nè narè ndé madji.

⁹ Tokou nè nda ban mbä, mare dooudjé toï do nange té ke nou ke isi ke rò too, dèdè ndé tò, ke rò too lodè goto, ndé madji.

¹⁰ Dèdè mpitidjè ke né nya. Tokou djèdjè djao ta kao dò man té, dèdè daredjè né toï ke doudjè, dongou mè to té.

¹¹ Gè té nnè mouta, djèdjè djao ke to kada lo Alexandrie, ria na Ndounga ke dingao. To nèn to nai koul té mbòr nange té ke man ïya dana.

¹² Tokou djèdjè ntéh Syracuse, djèdjè djisi nou ndò mouta.

¹³ Ke loou té ke nou, djèdjè djao mbòr kongo té, djèdjè ntéh Reggio té. Gè té ndò kada lél ke ber ï, ke ndò djo djèdjè ntéh Pouzzoles té.

¹⁴ Djèdjè djinga ndjè ke to ngaködjèdjè nou. Dèdè ndoudjoudjè ta kisi ndò shiri. To tokou ban djèdjè ntéh Rome té.

¹⁵ Tokou ndjè ke to ngaködjèdjè ke Rome té wo tar lodjè, dèdè ndé nderèng gong té ke Appius ke Kei kisi Mouta ta kingadjè. Tokou Paul wodè, nè nda woio Allah ke mèa isi dèkèkè.

¹⁶ Tokou djèdjè ntéh. Rome té, dare Paul ta kisi kei la ndja ke kadè, ke ndjè pourou kada ke ngemè.

¹⁷ Gè té ndò mouta, Paul bar tokou dooudjé lo Juifdjé. Tokou dèdè mbona toï mbä nè mpa naredè, Ngakömdjé, mam nda né kada ta mbeté Juifdjé ang, aséh ta mbeté tar béh lo kadjèdjè, baa dèdè dwaam mè béh Jérusalem té, dilam dji Romaindjé té.

¹⁸ Tokou dèdè nsange gel tar lom mbä, dèdè ndiki ta karem mao daka ba, mbata dèdè dinga né kada ta karem moei ang.

¹⁹ A tokou Juifdjé mbeté, ma mase doudjou ta ko César, yèn ka ma méh ke tar kada ta toula dò dooudjé ke béh té lom ang.

²⁰ Tokou ban mbata tar nèn, mam ndoudjou ta kosè ke ta pa karesè, mbata to mbata tar mè ngebe lo Israël ke dèdè ntòm ke koulaa narè nèn.

²¹ Dèdè mpa darè, Djèdjè djinga maketourou ke Judée mbata tar loi ang, ke ndjè ke to ngaködjèdjè kada ke dé nèn ntoula aséh mpa tar madjang dòi té ang.

²² A djèdjè ndiki ta ko tai té tar ke i wo mei té, mbata dò tar té lo dooudjé ke dang nèn, djèdjè ngeré dooudjé mbeté tar nèn loou té toï.

²³ Tokou ban dèdè ntoura ndò kada darè, dèdè ndé rè té mè kei té la baya. Nè nòrou gel tar naredè ke sindò nderèng lowoul. Nè mpa tar nadji béh ko lo Allah, ke nè nsange ta karedè do tar lo Jésus mèdè té, deo té lo tar ndedji lo Moïse ke tar maketourou lo prophètedjé tò.

²⁴ Maredjé wo mèdè té deo tar té ke nè mpa, maredjé wo mèdè té ang.

²⁵ Tokou ban, mbata dèdè ndiki gè horodè té ang, dèdè ntéh daka goukoudang Paul pa mare tar kada mbä. Ndil ke madji toï pa gaté gaté né ke mpa nare kasésè deo té lo prophète Ésaïe, mpana,

²⁶ Ao rò dooudjé té nèn, epana, Sésè a koidjé ke mbisè tokoro, a sésè a geridjé gelè ndò kada ang, Sésè a koidjé ke kemsè tokoro, a sésè a koidjé madji ndò kada ang.

²⁷ Mbata mè dooudjé nèn oi diriri, Ke mbidè outou ta ko madji ang, Ke dèdè nnïm kemdè, Na dòmadjang a dèdè da ko ke kemdè, Ke da ko ke mbidè ke mèdè a geré madji, Ke dèdè da tél ta karem ndadè madji.

²⁸ Tokou ban aridjé mèsè geré tar nèn, doula ke tar kadji lo Allah nèn dare Gentildjé. Dèdè da ko.

²⁹ Tokou nè mpa tar nèn mba, Juifdjé ao daka, dèdè mmaina tar horodè té nya.

³⁰ Paul isi nou bal djo ase mè kei té la ndja, ke nè ndoko ta kisi kendé. Nè ntaa dooudjé toï ke dé rè té.

³¹ Nè mpa tar béh ko lo Allah, ke nè ntòdjou gel tar lo Mbaibé Jésus Christ ke daka tesèrè, doou kada òkou deo la ang.